Momo lie tu Pokuila Kolonumbi Viembimbiliya?

ANGA hẽ olonumbi Viembimbiliya viatiamẽla koku lipekela ka vi tiamisiwila vali koloneke vilo kuenda vi tateka omunu oku lianja? Sio, hacoko. Ovio, vi tu kuatisa oku yuvula ovina vimue ndeci:

▪ Ovovei a sambuka a tunda kukahonga

▪ Oku mina osimbu omunu ka tokekisile olohuela

▪ Ovitangi vi tunda koku tepa olohuela

▪ Utima u ku vetela evelo

▪ Osõi yoku lavisiwa la vakuẽle

Ululiki wetu Yehova Suku, * o yongola okuti tu kuata esanju kuenda tu kuatisiwa lolombanjaile viaye. Suku oku “longisa eci ci ku kuatisa.” (Isaya 48:17) Omunu wosi o kuama olonumbi Viembimbiliya viatiamẽla koku lipekela:

▪ O taviwa la Suku

▪ O kuata ombembua yovutima

▪ O pamisa ukamba waye vepata

▪ O kuata onduko yiwa

▪ O likuatela esumbilo

Nye o sukila oku linga nda ku kasi oku pokola kolonumbi Viembimbiliya viatiamẽla kovituwa viwa? Anga hẽ citava oku pongolola ekalo liomuenyo wove? Anga Suku o ka ku yambula omo liovilinga viove vĩvi viosimbu?

Kũlĩhĩsa ndoco: Vana vatiamẽlele kekongelo Liakristão kocita catete, kefetikilo va kala vakuakahonga, vakahokolo, kuenda va kala vakuakulipekela lomanu vakuavimatamata vimuamue viuyali. Pole va nõlapo oku pongolola ekalo liomuenyo wavo kuenje va kuatisiwa calua. (1 Va Korindo 6:9-11) Koloneke vilo, olohuluwa vialua viomanu voluali, via siatavo oku linga  apongoloko aco. Ovo va siapo omuenyo wupuepue kuenje va siata oku kuatisiwa calua omo lioku pokola kolonumbi Viembimbiliya. Kũlĩhĩsa ulandu wa Sara, una wa tukuiwa kocipama catete.

“Nda Yeva Ekavuluko”

Sara wa limbuka okuti omuenyo ũvi a kala oku ambata ka wo nenelele elianjo kuenda esanju a yonguile oku kuata. Eye wa popia hati: “Nda liyeva okuti utima wange wa tindila. Nda kuata osõi kuenda ohele yoku mina loku kuatiwa luvei umue u sambuka. Pole, lalimue eteke nda puile ekolelo liokuti kuli Suku, kuenda nda kũlĩhĩle okuti ekalo liomuenyo wange li kasi oku U sumuisa. Nda enda oku liyeva okuti nda vĩhisua kuenda nda suvukile omuenyo wange.”

Sara wa sanga ongusu yoku pongolola ekalo liomuenyo waye. Eye wa sandiliya ekuatiso kolonjali viaye vana okuti Olonbamgi via Yehova. Handi vali, wa pingavo ekuatiso kakulu vekongelo. Eye wa popia hati: “Nda komohavo calua ocikembe kuenda ocisola olonjali viange kuenda akulu vekongelo va lekisa kokuange.” Sara wamisako hati, “Nda yeva ekavuluko.”

Cilo Sara o kasi oku tekula omãla vavali lika liaye. Eye wa popia hati: “Lalimue eteke nda kuatele osõi yoku sapuila omãla vange catiamẽla konjila yĩvi nda nõlele. Ndi yongola okuti va kuata elomboloko liovitangi ndi kasi oku liyaka lavio omo lioku sinila olonumbi via Suku. Ocimãho cange, oku va kuatisa oku limbuka okuti oku pokola kolonumbi via Suku viatiamẽla koku lipekela ci kuatisa oku kuata uhayele uwa, kuenda oku tula utima. Nda kũlĩha okuti Suku wa tu ĩha olonumbi evi omo eye ka yongola okuti tu liyaka lovitangi.”

Ove o podolavo oku limbuka ekuatiso li tunda koku kuama olonumbi via Suku yocisola. Embimbiliya li popia hati: “Ovisila via Yehova via sunguluka, vi sanjuisa utima. Ocihandeleko ca Yehova ca pua eko, ci yelisa ovaso. . . . Oku vi [pokola] ku kuete onima ya lua.”—Osamo 19:8, 11. *

[Atosi Pombuelo Yemẽla]

[Elomboluilo lielitalatu kemẽla 8]

Vana va sepula olonumbi Viembimbiliya, va siata oku liyaka lesumuo lialua

[Elomboluilo lielitalatu kemẽla 9]

Vana va pokola kolonumbi Viembimbiliya, va kuete utima wa yela kuenda ukamba uwa vepata