Longisa Omãla Vove

Ovo va Tukuiwa Vati, ‘Omãla Vocindindimo’

NDA kuli ovikẽlu viombela, tua siata oku yeva ovindindimo. Ove hẽ wa siata oku kuata usumba?— * Yesu olondonge viaye vimue vivali, wa vi tukula hati, ‘Omãla Vocindindimo.’ Tu kũlĩhĩsi esunga liaco.

Olondonge viaco vivali via Yesu, Tiago la Yoano. Ovo va kala omunu la manjaye, omãla va Sebedeo lukãi waye Salome. Salome, citava okuti wa kala manji a Maria ina ya Yesu. Omo liaco, Yesu la Tiago, kuenda Yoano va kala apalume haivo akamba okuti va kulila kumosi.

Sebedeo wa kala ukuakutamba olõsi lomãla vaye Tiago la Yoano. Tiago la Yoano va kala pokati ka vana Yesu a nõlele tete oco va linge olondonge viaye. Eci a va laleka, va siapo upange wavo lonjanga yalua kuenje vo kuama. Noke Yesu wa nõla 12 kolondonge viaye oco va linge ovapostolo. Tiago la Yoano va tiamẽlelevo kocimunga caco.

Eci pa kambele olosãi vimue osimbu ka file, Yesu kumue lovapostolo vaye va kala oku enda ko Samaria kocikanjo cimue colomunda. Owola yaco ekumbi lia enda kuenda ovo va kava. Pole, va Samaria ka va yonguile okuti Yesu kuenda ovapostolo vaye va lala volupale luavo. Ove hẽ wa kũlĩha esunga liaco? — Tu kũlĩhĩse.

Yesu kumue lolondonge viaye va kala va Yudea, kuenda va Yudea va suvukile omanu vo ko Samaria. Pole, Yesu ka kuatele ocituwa caco. Eye wa lekisa ohenda ku va Samaria,  kuenje Tiago la Yoano va sukililevo oku ci linga. Pole, olondonge evi vivali via temẽle calua omo okuti vamue va Samaria ka va va yolele, kuenje va pula Yesu hati: ‘O yongola okuti tu pinga ondalu yi tunda kilu oco yivalie?’ Nye o sima okuti oco Yesu a tambulula?— Yesu wa va sapuila okuti ovisimĩlo viavo ka via sungulukile! Tiago la Yoano va sukilile oku lilongisa ndomo va lekisa ohenda.

Ocitangi cikuavo Tiago la Yoano va kuatele, onjongole yoku livelisapo. Osimbu Yesu ka file, ovo va tuma inavo oco a popie la Yesu hati: “Sokiya okuti omãla vange, ava vavali, va tumala vusoma wove, ukuavo kondio yove, ukuavo kepĩli liove.” Eci olondonge vikuavo ekũi via yeva eci Tiago la Yoano va linga, va tema calua. Ove hẽ nda wa temavo?—

Citava okuti nda wa tema. Momo ka tu sanjukila oku mola okuti vakuetu va livelisapo. Noke Tiago la Yoano va limbuka okuti ovisimĩlo viavo via kala vĩvi kuenda ka va lekisile ohenda, kuenje va pongoloka. Ovo veya oku kala ovapostolo vamue vakuacisola haivo vakuahenda. Nye tu lilongisa kovolandu ava?—

Ulandu wa Yesu u tu longisa okuti tu sukilavo oku lekisa ohenda ku vakuetu. Yesu wa tata ciwa omanu, oku kongelamo alume, akãi, kuenda omãla. Ove hẽ o ka amamako oku ivaluka ongangu yaye kuenda oku yi kuama?—

[Etosi Pombuelo Yemẽla]

[Elomboluilo lielitalatu kemẽla 19]

TANGA VEMBIMBILIYA LIOVE

[Elomboluilo lielitalatu kemẽla 19]

Marko 3:17

Mateo 27:55, 56; Marko 15:40, 41

Mateo 4:18-22

Yoano 4:4-15, 21-26; Luka 9:51-55

Mateo 20:20-24; Marko 10:35-37, 41