Ombangulo Yimue Yatiamẽla Kembimbiliya​—Anga hẽ Yesu Eye Suku?

OLOMBANGI VIA YEHOVA vi sole calua oku sapela lomanu catiamẽla Kembimbiliya. Anga hẽ, kuli epulilo limue liatiamẽla Kembimbiliya okuti o yongola oku kũlĩha etambululo liaco? O yongola hẽ oku kũlĩha alongiso amue ale ovituwa vietavo Liolombangi Via Yehova? Nda oco, eci o lisanga lavo, ku ka kuate ohele yoku sapela lavo catiamẽla kondaka yaco. Ovo va ka kuata esanju lioku sapela love.

Ulandu ukuãimo, u lekisa ombangulo yimue Ombangi ya Yehova yi pondola oku kuata lomunu umue a lisungue laye. Tu sokololi ndeci okuti, Ombangi yimue ya Yehova o tukuiwa hati, Karen, weya konjo yukãi umue o tukuiwa hati, Samantha.

Ocili Okuti Ove ku Tava ku Yesu?

Samantha: Ulongisi wetavo liange wa ndi sapuila okuti Olombangi Via Yehova ka vi tava ku Yesu. Anga hẽ, eci ocili?

Karen: Linga u sapuile okuti etu tu tava ku Yesu. Handi vali, tua kũlĩha okuti oku kolela kokuaye ci kuete esilivilo koku popeliwa.

Samantha: Ame ndi tavavo ku Yesu.

Karen: Puãi ove lame tua kolela kovina vimuamue. Onduko yange Karen. Citava okuti ndi kũlĩha onduko yove?

Samantha: Onduko yange Samantha. Nda sola calua oku ku kũlĩha.

Karen: Lamevo nda sola calua oku ku kũlĩha, a Samantha. Ove pamue o lipula ndoco: ‘Nda Olombangi Via Yehova vi tava ku Yesu, momo lie omanu va popela ovina vikuavo?’

Samantha: Ndi yongola oku ci kũlĩha.

Karen: A Samantha, loku teta onimbu ndu ku sapuila okuti, tua kolela ku Yesu, pole, ka tu tava kovina viosi omanu va popia viatiamẽla kokuaye.

Samantha: O pondola hẽ oku tukula ondaka yimue?

Karen: Oco. Omanu vamue va popia hati, Yesu wa kala ño omunu umue uwa. Pole, etu ka tu tava kocisimĩlo caco.

Samantha: Lamevo si ci tava.

Karen: Eci oco ocina cikuavo ove lame tua kolela. Uvangi ukuavo wowu wokuti Olombangi Via Yehova ka vi tava kalongiso a lipatãla lovina Yesu a popia viatiamẽla kukamba waye la Isiaye.

Samantha: Eci ci lomboloka nye?

Karen: Atavo alua a longisa okuti Yesu eye Suku. Pamue eci oco wa longisiwavo.

Samantha: Oco, momo ulongisi wetavo liange wa popia okuti Suku la Yesu vamuamue.

Karen: Ove hẽ o tava okuti onjila ya velapo yoku lilongisa ocili catiamẽla ku Yesu, oku kũlĩhĩsa ovina a popia viatiamẽla kokuaye muẽle?

Samantha: Ndi tava kondaka eyi.

Nye Yesu a Popia?

Karen: Kũlĩhĩsa ocinimbu cimue Cembimbiliya ci tu kuatisa oku kuata elomboloko liondaka yaco. Kũlĩhĩsa eci tu tanga kelivulu lia Yoano 6:38. Yesu wa popia hati: “Sia tundilile kilu oku linga ocipango cange, te ocipango cu wa numa.” Olondaka evi citava okuti vi kapa omanu vatatahãi nda Yesu wa kala Suku ale sio.

 Samantha: Nye o yongola oku popia?

Karen: Kũlĩhĩsa okuti Yesu wa popia hati, ka tundilile kilu oku iya palo posi oco a linge ocipango caye muẽle.

Samantha: Ocili, eye wa popia hati weya palo posi oku linga ocipango ca Una wo tuma.

Karen: Pole, nda Yesu eye Suku, helie wo tumile oku iya palo posi? Kuenda momo lie Yesu a tavela oku linga ocipango Comunu waco?

Samantha: Cilo ñasi oku kuata elomboloko liovina o kasi oku popia. Pole, sia kolelele okuti ocinimbu eci cimosi ceca uvangi wokuti Yesu hayeko Suku.

Karen: Kũlĩhĩsa eci Yesu a popia onjanja yikuavo. Kocipama cikuavo celivulu lia Yoano Yesu wa popia olondaka vimuamue. Citava okuti o tanga elivulu lia Yoano 7:⁠16?

Samantha: Citava. “Yesu wa va kumbulula, hati, Okulonga kuange hakuangeko te ku wa numa.”

Karen: Nda pandula a Samantha. Ndomo ca lekisiwa vocinimbu eci, anga hẽ Yesu wa longisa ovisimĩlo viaye muẽle?

Samantha: Sio, eye wa popia okuti ovina a longisa via tunda ku Una wo tuma.

Karen: Pamue tu lipula vali ndoco: ‘Helie wa tumile Yesu? Kuenda helie wo wĩha ocili eye a longisa komanu?’ Anga hẽ Omunu waco wa velapo okuti Yesu ci sule? Ocili okuti, omunu wa tuma wa velapo una wa tumiwa.

Samantha: Ovina evi, viwa. Lalimue eteke nda tangele ocisonehua eci.

Karen: Kũlĩhĩsavo olondaka via Yesu vi sangiwa kelivulu lia Yoano 14:​28, ku popia hati: “Wa yevi eci nda popia lene siti, Ngenda kuenje njiya vali kokuene. Nda wa soleli, nda wa sanjukili omo ngenda ku Isia, momo Isia wa mbelapo, ame ndi sule.” Ndomo ca lekisiwa vocinimbu eci, Yesu wa litendele ndati la Isia?

Samantha: Eye wa popia okuti, Isia wa velapo, eye o sule. Ndi sima okuti, eye wa tendele Suku okuti wa velapo.

Karen: Ocili. Pole, oco o kũlĩhe uvangi ukuavo, konomuisa eci Yesu a sapuila olondonge viaye ndomo ca lekisiwa kelivulu lia Mateo 28:18. Ocinimbu eci ci popia hati: “Uviali wosi wokilu lowu wokilu lieve wa nyihiwa.” Anga hẽ, Yesu wa popia hati tunde kosimbu wa kuatele ale uviali wosi?

Samantha: Sio, eye wa popia hati wo wĩhiwa.

Karen: Nda Yesu eye Suku, ndamupi vo wĩha vali uviali wosi? Kuenda helie wo wĩha?

Samantha: Ndi ka sokolola ciwa ondaka eyi.

Helie a Kala Oku Sapela Laye?

Karen: Kuli ocina cikuavo ca siata oku kapa omanu vatatahãi nda Yesu eye muẽle Suku.

Samantha: Ocina caco nye?

Karen: Ceci tu tanga catiamẽla kepapatiso lia Yesu. Kũlĩhĩsa ulandu u sangiwa kelivulu lia Luka 3:​21, 22. Citava hẽ okuti o tanga ovinimbu evi?

Samantha: “Eci omanu vosi va papatisiwa, leci Yesu a papatisiwavo yu wa kala loku likutilila, oco ilu lia yuluka. Kuenje espiritu sandu lio wila letimba ndopomba, kuenda ondaka ya tunda kilu, yiti Ove Vumõlange wa soliwa, nda ku sanjukila.”

Karen: Wa limbuka hẽ eci Yesu a kala oku linga, eci a papatisiwa?

Samantha: Wa kala oku likutilila.

Karen: Oco muẽle. Pole, pamue tu lipula ndoco: ‘Nda Yesu eye Suku, kulie a kala oku likutilila?’

Samantha: Eli epulilo limue liwa. Ndi ka pulisa ulongisi wetavo liange.

Karen: Kuli ovina vikuavo tu sukila oku kũlĩha. Ivaluka okuti eci Yesu a tunda vovava, omunu umue wa vangula okupisa kilu. Wa limbuka eci Omunu waco a popia?

Samantha: Eye wa popia hati, Yesu Omõlaye una A sole, kuenda wo sanjukila.

Karen: Oco muẽle. Nda Yesu eye Suku, helie wa popia olondaka viaco via tunda kilu?

Samantha: Sia la sima kondaka eyi, ndomo wa ci lombolola.

 Momo Lie va Tukuiwila Vati, “Isia” Kuenda “Mõla”?

Karen: Tu konomuise vali ocina cikuavo: Tua tanga okuti Yesu wa tukula Suku hati, Isiaye wo kilu. Handi vali, eci Yesu a papatisiwa, ondaka ya tunda kilu yo tukula hati, Omõlaye. Kuenda Yesu wa litukula hati, Omõla a Suku. Nda o yongola oku ndi longisa oku kuata elomboloko liokuti kuli omanu vamue vavali okuti vamuamue, ocindekaise cipi catiamẽla kukamba wepata o pondola oku tukula?

Samantha: Ndi tukula ukamba u kasi pokati komunu la manjaye.

Karen: Citava okuti, o tukula omãla volonjamba. Pole, Yesu wa tukula Suku hati Isia kuenda eye wa litukula Ndomõla. Nye o sima okuti oco Yesu a yonguile oku popia?

Samantha: Cilo nda limbuka eci o yongola oku popia. Yesu wa tukula omunu umue okuti ukulu haeye wa velapo okuti omunu ukuavo ci sule.

Karen: Oco muẽle. Sokolola ndoco: Ove o sokolola okuti ocindekaise eci comunu la manjaye ale comãla volonjamba, ca sunguluka. Nda Yesu wa kale Suku, ku simi hẽ okuti omo lioku kala Ulongisi wa Velapo, nda wa kuata ovisimĩlo vimuamue vioku lisokisa?

Samantha: Ocili.

Karen: Pole, Yesu ka ci lingile. Eye wa tukula ondaka “Isia” kuenda “Mõla” oco a lombolole ukamba u kasi pokati kaye la Suku.

Samantha: Ove wa tukula ondaka yimue yiwa.

Nye Olondonge Viatete Via Yesu Via Popia?

Karen: Osimbu sia endele, ndi yongola oku sapela love catiamẽla kondaka yikuavo nda ci ku ecelela.

Samantha: Citava. Handi ñuete akukutu amue.

Karen: Nda Yesu eye Suku, ku simi hẽ okuti olondonge viaye nda via situlula ondaka yaco?

Samantha: Ci kuete esunga.

Karen: Pole, Vovisonehua ka mu sangiwa elongiso liaco. Kũlĩhĩsa eci upostolo Paulu, umue pokati kolondonge viatete via Yesu a soneha. Kelivulu lia va Filipoi 2:​9, wa lombolola eci Suku a linga noke yoku fa kua Yesu kuenda epinduko liaye. Eye wa popia hati: “Suku wo kemainya kuenje wo luka onduko ya piãla olonduko vikuavo viosi.” Ndomo ca lekisiwa vocinimbu eci, nye Suku a lingila Yesu?

Samantha: Ocinimbu eci ca lekisa okuti Suku wo kemainya.

Karen: Oco muẽle. Pole, nda Yesu wa lisokele la Suku osimbu ka file, kuenje noke Suku wo kemainya, ka ci lomboloka okuti Yesu wa velapo Suku? Omunu o pondola ndati oku velapo okuti Suku ci sule?

Samantha: Ka citava. Ka ci tẽliwa.

Karen: Ndi tava kondaka eyi. Lovina tua konomuisa ndeti, anga hẽ o pondola oku sima vali okuti Embimbiliya li longisa hati, Yesu eye Suku?

Samantha: Sio, haicoko. Embimbiliya li popia okuti Yesu Omõla a Suku.

Karen: Ocili. A Samantha u sapuila okuti Olombangi Via Yehova via sumbila ocikele ca Yesu. Tua kolela okuti okufa kuaye nda Mesiya wa likuminyiwa, kua yulula onjila yoku popela omanu vosi vakuekolelo.

Samantha: Ndi tavavo kocisimĩlo eci.

Karen: Pamue o lipula vali ndoco: ‘Tu lekisa ndati olopandu ku Yesu omo lioku eca omuenyo waye oco tu kuatisiwe?’ a

Samantha: Ulandu owu wa ndi komõhisa calua.

Karen: Citava okuti ndi tiuka vali oco ndi ku lekisa atambululo Embimbiliya. Osemana yiya o ka kala konjo kowola ndeyi?

Samantha: Oco ndi kala konjo.

Karen: Nda pandula, tu li sanga eteke likuavo.

[Etosi pombuelo yemẽla]