Ove hẽ o yongola oku kũlĩha ocili catiamẽla ku Suku, ndomo a tuwa, eci a sole leci a nyãle? Yehova Suku o situlula ocili cosi catiamẽla kokuaye, lekuatiso Liondaka Yaye, Embimbiliya. Pole, lomue o pondola oku tanga Embimbiliya okuti o kuata elomboloko lia suapo. Momo lie? Momo oku kuata ukũlĩhĩso wa tiamẽla ku Suku, esumũlũho limue lia velapo okuti havosiko va li tambula. Tu konomuisi eci Yesu a popia catiamẽla kondaka yaco.​—Tanga Mateo 11:25.

Ocinimbu caco ci fetika ndoco: “Eteke liaco Yesu wa [popia] hati.” Citava okuti Yesu wa tukula olondaka viaco omo liulandu umue wa pita. Eye wa pisa omanu va kala valupale atatu o ko Galilea lolondaka vi kuete unene. (Mateo 11:20-24) Ove pamue o lipula ndoco: ‘Citava ndati okuti, omanu vana va mola ovikomo via Yesu va likala ocili?’ Omanu vaco, ka va tavele momo va tĩlisile ovitima viavo.​—Mateo 13:10-15.

Yesu wa kũlĩha okuti, oco tu kuate elomboloko liatiamẽla ku Suku, tu sukila ovina vivali ndeci: Oku kuatisiwa la Suku, kuenda oku kuata utima wa sunguluka. Yesu wa popia hati: “A Tate, a Cime cilu losi, hu sivaya omo wa sitikila ovina evi kolonoño la vakualondunge kuenje wa vi situluila komãla.” Wa limbuka hẽ esunga lieci tu tendela okuti, oku kũlĩha ocili ci sangiwa Vembimbiliya, esumũlũho limue lia velapo? Yehova okuti, eye “Cime cilu losi” o pondola oku sitika ale oku situlula ocili ndomo ci litava locipango caye. Pole, Suku poku situlula ocili ka lekisa ocame. Oco hẽ kolonepa vipi a situluila ocili Cembimbiliya komanu vamue, okuti komanu vakuavo sio?

Yehova eca ocali caye kambombe, pole, wa suvuka vakuepela. (Tiago 4:6) Eye wa sitikila ocili “ku vakualondunge kuenda kolonoño” violuali lulo, la vana va lilongisa calua kuenje, omo liepela, va sima vati, ka va sukila ekuatiso lia Suku. (1 Va Korindo 1:19-21) Pole, Suku o situluila ocili “komãla” okuti, ambombe haivo vakuesunguluko liutima. (Mateo 18:1-4; 1 Va Korindo 1:26-28) Yesu, Omõla a Suku, wa kũlĩhĩle ciwa ovisimĩlo viomanu vaco. Omo okuti asongui vetavo va lilongisile calua, va kuata epela kuenje, ka va tavele kesapulo Yesu a va kundila, pole, vakuakupipa ombisi omo liumbombe wavo, va tava. (Mateo 4:18-22; 23:1-5; Ovilinga 4:13) Ocili okuti kua kalavo olohuasi vimue kuenda ava va lilongisa calua okuti, va lekisa umbombe, kuenje, va linga olondonge via Yesu.​—Luka 19:1, 2, 8; Ovilinga 22:1-3.

Tu kũlĩhĩsi vali epulilo tua linga kefetikilo liokuti: Ove hẽ o yongola oku kũlĩha ocili catiamẽla ku Suku? Nda oco, o ka lembelekiwa calua poku limbuka okuti, Suku ka tava vana va litenda vati, vakualondunge violuali lulo. Pole, o tava, vakualondunge violuali vana va liketisa. Nda o lilongisa Embimbiliya lesunguluko liutima, Yehova o ka ku kuatisa okuti o kuata elomboloko liocili catiamẽla kokuaye. Kuenje, oku u kũlĩha ciwa, ci ka ku nenela esanju cilo, lelavoko lioku kuata “omuenyo wocili” una a likuminya oku eca ku vakuesunga, voluali luokaliye palo posi, luna lu kasi ocipepi. a​—1 Timoteo 6:12, 19; 2 Petulu 3:13.