WA CI KŨLĨHA?

Va Yudea kocita catete va enda oku pongiya ndati ocivimbi osimbu ka ca kendiwile?

Va Yudea va enda oku kenda ocivimbi veteke liaco omunu a fa. Ovo va enda oku ci linga omo liasunga avali. Liatete lieli okuti, etimba liomunu wa fa lia enda oku nyolẽha lonjanga omo liowuya walua wa kala Kutakelo. Liavali lieli okuti, kotembo yaco omanu va enda oku sima okuti, nda ocivimbi ka ca kendiwile keteke liaco, ci koka elaviso kocivimbi, kuenda kepata liaye.

Vavanjeliu kuenda kelivulu Liovilinga, mu sangiwa ovolandu akuãla atiamẽla komanu va kendiwa veteke va fa. (Mateo 27:57-60; Ovilinga 5:5-10; 7:60–8:2) Rahele ukãi wa Yakoba wa fa eci va kala oku linga ungende kumue lepata liaye. Omo liaco, ka va pongiyile ocivimbi loku tiukila kepata liavo oco ci kendiwe. Pole, Yakoba wo kenda veleva limue konele ‘yonjila yoku enda ko Beteleme.’—Efetikilo 35:19, 20, 27-29.

Vembimbiliya mu sangiwa ovolandu alua a lekisa ndomo va Yudea va enda oku pongiya etimba liocivimbi osimbu ka va ci kendele. Apata kumue lakamba va enda oku sukula ocivimbi, loku ci tukusa ulela welemba liwa noke va ci muñila polonanga. (Yoano 19:39, 40; Ovilinga 9:36-41) Vana va kasi ocipepi lonjo yaco kuenda omanu vakuavo, va enda oku iya oku lekisa esumuo liavo loku lembeleka epata.—Marko 5:38, 39.

Yesu poku kendiwa va kuama hẽ onjila yimuamue ndeyi ya va Yudea?

Valua va Yudea va enda oku kenda vagandiavo veleva loku sitikako ewe, ndeci kolonepa vialua vio ko Isareli va enda oku linga. Poku ci linga va enda oku kuama ovituwa via tumbikiwa la vakukululu yavo. Avirahama, Sara, Isake, Yakoba kuenda omanu vakuavo, va kendiwa veleva lia kala ko Makapela ocipepi lo Efirone.—Efetikilo 23:19; 25:8, 9; 49:29-31; 50:13.

Yesu wa kendiwa veleva lia sokotuiwa vewe. (Marko 15:46) Puvelo weleva liaco va enda oku sitikapo lewe. Vokati keleva liaco mua kala olongaveta okuti, nda umue vepata wa fa, omo va kapa ocivimbi caco. Kotembo ya Yesu kua kala ocituwa cokuti, noke lioku vola kuetimba, vongolola akepa aco kuenje, a kapiwa vocikasia cimue ca pangiwa lovawe. Omo liaco, va enda oku panga eleva limue linene okuti, nda umue ukuepata wa fa, omo a kendiwa.

Suku wa ecele Ocihandeleko ku Mose ci lekisa okuti, va Yudea ka citava oku kenda omunu veteke Liesambata. Omo okuti eci Yesu a fa, kua kambele olowola vitatu oco Esambata li fetike, Yosefe u Arimateya kuenda omanu vakuavo vokenda, pole ka va tẽlisile eliangiliyo lioku u kenda. (Luka 23:50-56) Omo liaco, vamue pokati kakamba va Yesu va endele keyambo liaye noke Yesambata oco va malusule oku pongiya etimba liaye.—Marko 16:1; Luka 24:1

[Elitalatu kemẽla 8]

[Elitalatu kemẽla 8]