Kunyamo wo 1975 eci nda kuata anyamo avali, oco mãi a limbuka okuti ndi kuete ocitangi cimue. Osimbu mãi a kala oku ndi kuata vokuokuo, ekamba liange lia kupuila posi ocina cimue ca linga onjuela yalua. Mãi wa limbuka okuti sia yevele onjuela yaco. Eci nda tẽlisa anyamo atatu, sia telẽle oku vangula ciwa. Epata liange lia sumuile calua eci ndotolo a va sapuila okuti ndicisitatũi!

Olonjali viange via litepa eci nda kala omõla, kuenje ame la va huvange vatatu, kumue la Mãi, tua ilukila kocitumãlo cikuavo. Kotembo yaco omãla ovisitatũi kofeka yo Fransa ka va endele oku longisiwa ciwa kolosikola, ndeci ca siata koloneke vilo. Momo va enda oku talisa ohali ovisitatũi. Pole, eci nda kala omõla nda kuata esumũlũho limue okuti, ovisitatũi vikuavo ci sule. Cilo ndi lombolola ulandu wange.

Vokuenda kuotembo alongisi valua va limbuka okuti, omãla ovisitatũi va pondola oku vangula lekuatiso liomakina yi tanga oku lisengasenga kuomẽla. Kofeka yo Fransa nda kulila, ka va tavele okuti omanu va vangula elimi lioku ilaika kosikola. Omãla vamue ovisitatũi va enda oku va kutila ovoko konyima osimbu va lilongisa.

Vokuenda kuanyamo amue, nda enda oku kala olowola vialua vosemana londotolo yi kuatisa vana va kuete ocitangi coku vangula. Nda enda oku votola utue kuenda oku kisikiwa oku pitulula olonjanja vialua olondaka vimue okuti si vi yevite. Sia tẽlele oku sapela lomãla vakuavo. Vokuenda kuotembo yaco nda tala ohali yalua.

Eci nda tẽlisa anyamo epandu, nda tumĩwa kosikola ku tangela omãla ovisitatũi. Kosikola yaco nda lisanga lomãla vakuavo ovisitatũi. Pole, vahandelekele okuti, ka ci tava oku vangula elimi lioku ilaika. Nda umue wa seteka oku ci linga, o kangisiwa, ale o nãliwa vesinga liaye. Omo liaco, tua enda oku sapela vuyombeki poku kuama olondimbukiso vimue tua luvikiya. Ovina viaco, via ndi kuatisa oku sapela lomãla vakuavo, kuenje nda kuata esanju vokuenda kuanyamo akuãla.

Eci nda tẽlisa ekũi lianyamo, nda tumiwa kosikola ku tangela omãla va yevite. Nda sumuile calua, kuenda ca kala ndu okuti, omãla vosi ovisitatũi va fa, ame lika nda supapo voluali! Nda kuama olonumbi via ndotolo, vi lekisa eci ndi sukila oku linga oco ndi kuatisiwe lesaku nda tambula. Pole, epata liange ka lia lilongisile elimi lioku ilaika kuenda ka ca tavele vali okuti ndi linga ukamba lomãla ovisitatũi. Ndi ivaluka eteke limue eci nda ka nyulile ulongisi umue ukuoloño woku kũlĩhĩsa vatũi, okuti komesa yaye kua kala elivulu limue mua sonehĩwa olondimbukiso vielimi lioku ilaika. Eci nda mola elitalatu lia kala koñoño yelivulu liaco, nda ilika loku popia hati, “ndi yongola elivulu ndeli!” Ndotolo wa soleka lonjanga elivulu liaco. a

 NDA FETIKA OKU LILONGISA EMBIMBILIYA

Mãi wa seteka oku tu longisa olonumbi Viembimbiliya tunde vutila. Eye wa enda oku tu ambata kolohongele via enda oku lingiwila ko Mérignac, ocipepi lo Bordeaux. Omo okuti nda kala omõla, ka ca lelukile oku kuata elomboloko liovina via enda oku popiwa kolohongele. Pole, vamanji vamue va enda oku tumãla ponele yange loku ndi sonehẽla ovina vi popiwa. Nda vetiyiwa calua locisola cavo kuenda ndomo va ndi tata. Konjo Mãi wa enda oku ndi longisa Embimbiliya pole, ka ca lelukile oku kapako ovina a enda oku ndi longisa. Vepulivi liaco nda kala Nduprofeto Daniele okuti, noke yoku tambula ocitumasuku ca eciwa lungelo wa popia hati: ‘Nda ci yeva, pole ka ca ndombolokele.’ (Daniele 12:8) Kokuange ca kala ndoco: “Nda ci mõla, pole ka ca ndombolokele.”

Vokuenda kuotembo nda fetika oku kuata elomboloko liocili Cembimbiliya. Nda sanjukila calua elomboloko nda kala oku kuata loku kapako ovina nda kala oku lilongisa. Nda lilongisilavo kovituwa viwa viavakuetu. Embimbiliya li tu vetiya oku kala vakuepandi. (Tiago 5:7, 8) Pole, sia kũlĩhĩle eci ci lomboloka oku kala ukuepandi. Poku mõla ndomo vakuetu va lekisa ocituwa caco, nda fetika oku kũlĩha eci ci lomboloka oku kala ukuepandi. Ocili okuti, vamanji vekongelo va ndi kuatisa calua.

ESUMUO KUENDA ESANJU

Eteke limue eci nda kala lanyamo ekũi, nda sanga vonjila amalẽhe vamue ovisitatũi va kala oku sapela velimi lioku ilaika. Nda linga ukamba lavo vuyombeki kuenje nda fetika oku lilongisa elimi lioku ilaika liofeka yo Fransa (FSL). Nda amamako oku endaenda kolohongele kuenje nda linga ukamba lumalẽhe umue Ombangi ya Yehova o tukuiwa hati, Stéphane. Eye wa enda oku likolisilako calua oco a sapele lame kuenda ukamba wange laye wa livokiya. Pole, nda kala oku lavoka esumuo. Omo okuti manji Stéphane wa likala oku enda ku sualali, vo kapa vokayike. Kuenje, ca ndi sumũisa calua! Osimbu manji Stéphane a kala vokayike, ombili yange ya fetika oku tepuluka, kuenje nda liwekapo oku endaenda kolohongele.

Eci pa pita ekũi liolosãi losãi yimosi, manji Stéphane vo weca kuenje wa tiuka konjo. Nda kuata esanju lialua eci manji Stéphane a fetika oku sapela lame velimi lioku ilaika. Sia tavele kovina nda kala oku mõla! Kuenje nda lipula ndoco: Nye ca pita laye? Vokayike, manji Stéphane wa lilongisa elimi lioku ilaika liofeka yo Fransa. Nda kala oku vanja ndomo manji Stéphane a linga olondimbukiso poku nyanyomõla ovaka, kuenda ndomo ocipala caye ca kala, kuenje ovina viaco via vokiya elomboloko liange.

ELOMBOLOKO LIANGE LIEMBIMBILIYA LIALIVOKIYA OKUTI KOSIMBU CI SULE

Manji Stéphane wa fetika oku ndi longisa Embimbiliya. Noke kavali ketu, tua fetika oku kundila kumosi pocitumãlo cimue oco tu longise Embimbiliya komanu tu sanga. Nda solele calua oku tala alitalatu a posoka a sangiwa valivulu etu loku sokisa ovituwa vi lekisiwa valitalatu kuenda oku kũlĩhĩsa atosi akuavo oco a ndi kuatise. Nda kũlĩhĩle ulandu wa Avirahama, “ocitumbulukila caye,” kuenda “owiñi wakahandangala,” pole, ovina viaco, ovio lika nda kũlĩhĩle ciwa loku vi lombolola velimi lioku ilaika. (Efetikilo 22:15-18; Esituluilo 7:9) Omo liaco, nda sanga elimi liange okuti, li ndi kuatisa oku sanga elomboloko liovina.

Omo okuti nda fetika oku kuata elomboloko liovina vi vanguiwa kolohongele, ca vetiya utima wange, kuenje onjongole yange yoku amamako oku lilongisa ya livokiya. Lekuatiso lia manji Stéphane elomboloko liange Liembimbiliya lia livokiya, kuenje kunyamo wo 1992 nda litumbika ku Yehova Suku kuenda nda papatisiwa. Ndaño nda kala oku amamako oku pamisa ekolelo liange, pole ka ca lelukile oku sapela lomanu, momo tunde vutila sia kuatele ocituwa coku sapela lomãla vakuavo.

NDA LIKOLISILAKO OKU YULA OSÕI

Omo okuti ocimunga covisitatũi ca kala citito, nda sapela la vamanji va kasi vekongelo ko Pessac, vocikanjo ci kasi ko Bordeaux. Lekuatiso lia vamanji, nda amamako oku pamisa ekolelo liange. Ndaño nda kuata ocitangi coku vangula, pole akamba vange okuti havisitatũiko va enda oku linga ovina lonjila yimue okuti ndi kuata elomboloko liovina viosi. Manji Gilles kumue lukãi waye Elodie, va enda oku likolisilako oku sapela lame. Ovo va enda oku ndi laleka oco tulie ale oku yuvila o kafe noke yohongele, kuenje ca pamisa ukamba wetu. Hesanjukuolio ndi kuete omo lioku kala lomanu va pokola kolonumbi via Suku!

Vekongelo nda kala nda kũlĩha manji umue ufeko wa posoka calua o tukuiwa hati, Vanessa. Ovituwa viaye viwa kuenda esunguluko liaye via ndi vetiya oku u sola. Eye ka ecelele okuti ocitangi cange coku kala ocisitatũi cu tateka oku sapela lame, pole, co kuatisa oku lilongisa oku sapela lovisitatũi. Ndo sola calua, kuenje tua kuela kunyamo wo 2005. Ndaño okuti sia lianjele poku sapela lomanu, pole, Vanessa wa ndi kuatisa oku yula ocitangi cange cosõi. Nda sanjukila calua ekuatiso liaye, osimbu ndi tẽlisa ovikele viange.

OMBANJAILE YIKUAVO YA TUNDA KU YEHOVA

Noke yolohuela vietu, vamanji kofiliale Yolombangi Via Yehova yo ko Fransa kolupale luo Louviers, va ndi laleka oco ndi tambula epindiso vokuenda kuosãi, liatiamẽla kupange woku pongolola alivulu. Kanyamo a pita o filiale ya linga esokiyo liokuti ku pangiwa alivulu kelimi lioku ilaika lio Fransa vo DVD. Pole, omo liupange walua ocimunga coku pongolola ca sukilile oku vokiya etendelo lia vamanji.

Ame kumue lukãi wange Vanessa, tua kũlĩhĩle okuti oku talavaya ko Betele esumũlũho limue linene, kuenda ombanjaile ya tunda ku Yehova Suku, pole ca tu nenela esakalalo. Kuenje, tua lipula ndoco: Ocimunga cetu celimi lioku ilaika ci kala ndati? Onjo yetu hẽ yi kala ndati? Vanessa o ka sanga hẽ upange? Pole Yehova wa tu kuatisa oku tetulula ovitangi viaco. Kuenje, nda limbuka ocisola Yehova a tu kuetele kuenda omanu ovisitatũi.

OKU KUATISA KUPANGE WOKU KONGELA OMANU

Omo lioku litumbika kupange woku pongolola ndi pondola oku kuata elomboloko lia suapo liovina vi kasi oku lingiwa oco tu kuatise ovisitatũi oku kũlĩha Yehova. Nda kuata esanju lialua poku mola ndomo vamanji tu talavaya lavo va kala oku seteka oku vangula lame. Ovo va kuama olondimbukiso va lilongisa oco va vetiye utima wange. Nda lianjele oku kala pokati kavo. Ocisola vamanji va lekisa, ca kala ocindekaise celitokeko li kasi pokati kafendeli va Yehova.—Osamo 133:1.

Ndi pandula Yehova omo okuti olonjanja viosi wa vetiya vamanji vekongelo oco va ndi kuatise. Nda sanjukilavo ocikele ndi kuete coku kuatisa vakuetu ovisitatũi oku kũlĩha Ululiki wetu ukuacisola kuenda oku kuata ukamba laye. Ndi lavoka lesanju otembo eci vosi tu ka vangula ‘upopi wa pua esanda’ okuti, u lomboloka ocili catiamẽla ku Yehova Suku, una o yongola oku tokekisa epata liosi liomanu.—Sofoniya 3:9.