OSAPI YO KOÑOÑO: OKU KUATA ESANJU KOMUENYO CI TẼLIWA

Anga hẽ ci Tẽliwa Oku Kuata Esanju Komuenyo?

“Oloneke vietu kulo kilu lieve vi tẽla akũi epanduvali kanyamo, pamue, mekonda liongusu, akũi ecẽlãla kanyamo. Haimo lumue, oloneke viaco vie yuka ovitangi kuenda esumuo.”—Osamo 90:10, Nova Versão Internacional.

OLONDAKA evi, viocili! Omuenyo wetu voluali lulo, “we yuka ovitangi kuenda esumuo.” Pamue, ove o lipula ndoco: ‘Anga hẽ ci tẽliwa muẽle oku kuata esanju komuenyo?’

Sokolola ulandu wa pita lukãi umue o tukuiwa hati, Maria. Eye wa kuata ongusu yalua vutila, pole tunde eci a tẽlisa anyamo 84, ka tẽla vali oku tunda vonjo yaye. Ndaño okuti owoño waye ka wa kukile, pole etimba liaye ka li pondola oku linga cimue. Anga hẽ, eye o kuete esanju komuenyo?

Nye ci popiwa kokuove? Citava okuti olonjanja vimue, o lipula nda o pondola oku kuata esanju komuenyo. Pamue upange wa siata oku linga, wa ku kuma, kuenda u kavisa. Citava okuti omanu vamue ka va kapeleko upange wove. Ndaño okuti cilo o kuete esanju komuenyo, pamue wa sakalala lovina vi ka pita kovaso yoloneke. Olonjanja vimue, o sima okuti o kasi ulika, ale o yeva esumuo. Handi vali, wa siata oku lihoyisa calua la vakuepata liove, ale wa fisa umue ngandiove. Ulume umue o tukuiwa hati, André, wa kuatele calua ukamba la isia kuenje, vocipikipiki isiaye wa fa. André wa simĩle okuti lalimue eteke esumuo liaco li ka pita vali.

Omo liovitangi viaco, citava okuti tu pua elavoko kuenje, tu lipula ndoco: Anga hẽ ci tẽliwa oku kuata esanju komuenyo? Tu pondola oku sanga atambululo kapulilo a tiamẽla komuenyo, poku konomuisa ongangu yulume umue okuti tunde eci a kala palo posi pa pita ale, ci soka 2.000 kanyamo. Ulume waco, Yesu Kristu. Ndaño lovitangi vialua a liyaka lavio, Yesu wa kuata esanju liocili komuenyo. Omo liaco, tu pondola oku setukula ongangu yaye.

[Elitalatu kemẽla 3]