Yesu—Eye Ono Yesanju Komuenyo

ANGA hẽ Yesu wa kuetele esanju komuenyo? Eye wa kulila pokati kolohukũi, kuenda ka kuatele ovina viwa via mulo voluali, osimbu a kala palo posi. Kuenda ka kuatele “apa a kunamisila utue waye.” (Luka 9:57, 58) Handi vali, wa suvukiwile lomanu, wa lundiliwa kuenda wa pondiwa lovanyãli vaye.

Ove pamue o sima ndoco: ‘Owu hamuenyo wesanjuko!’ Pole, kuli ovina vialua viatiamẽla komuenyo wa Yesu tu sukila oku konomuisa. Tu kũlĩhĩsi ovina vikuãla viatiamẽla komuenyo waye.

1. YESU WA KUATA OCIMÃHO KOMUENYO—OKUTI OKU LINGA OCIPANGO CA SUKU.

“Okulia kuange oku linga ocipango cu wa numa kuenda oku suisapo upange waye.”—Yoano 4:34.

Ci kale kolondaka lo kovilinga, Yesu wa sandiliya oku tẽlisa ocipango ca Yehova, Isiaye wokilu. a Yesu wa sanjukilile oku tẽlisa ocipango ca Suku. Eye wa sokisa oku linga ocipango ca Suku loku lia, ndomo ca lekisiwa vocisonehua ca tukuiwa ndeti. Konomuisa epuluvi a popia olondaka viaco.

Yesu wa popia olondaka viaco eci ekumbi lia kala vongunji. (Yoano 4:6) Eye wa linga ungende woku pita volomunda vio ko Samaria omẽle yosi, kuenje wa yeva onjala. Ocili okuti, olondonge viaye vio peya viti: “A Rambei, lia.” (Yoano 4:31) Etambululo lia Yesu lia lekisa okuti, wa enda oku litekula kuenda oku pamisiwa londaka ya Suku. Eci hẽ ka ci lekisa okuti, wa kuata ocimãho komuenyo waye?

2. YESU WA KUATELA OCISOLA CALUA ISIAYE.

‘Ame ndi sole Isia.’—Yoano 14:31.

Yesu wa kuata ukamba la Isiaye wokilu. Ocisola Yesu a kuetele Isiaye, co vetiya oku situlula onduko ya Suku locipango caye, kuenda ovituwa viaye. Yesu wa situlula ciwa Isiaye kolondaka, kovilinga, kuenda kovituwa viaye kuenje, poku tanga Vembimbiliya ovina viatiamẽla ku Yesu, ci kasi ndu okuti, tu lete Isiaye. Eli olio esunga lieci Filipu poku pinga ku Yesu hati, “tu lekise Isia,” eye wo kumbulula hati: “U wa mola ame haeye wa mola Isia”—Yoano 14:8, 9.

Yesu wa solele calua Isiaye, kuenda wa pokola kokuaye toke kolofa. (Va Filipoi 2:7, 8; 1 ­Yoano 5:3) Ocisola calua a kuetele Suku, co kuatisa oku kuata esanju komuenyo.

3. YESU WA SOLELE OMANU.

“Ocisola ca velapo eci ka kuli, cokuti omunu o pesila akamba vaye omuenyo waye.”—Yoano 15:13.

Omo ka tua lipuile, ka tua ponduile oku kuata elavoko liomuenyo ko pui longusu yetu muẽle. Embimbiliya li popia hati: “Ndeci ekandu lia iñila voluali lomunu umuamue, [okuti Adama] kuenda oku fa kueya lekandu, haico oku fa kua sambukila omanu vosi, momo vosi va linga ekandu.” (Va Roma 5:12) Ka tu pondola oku puluka kolofa okuti, ovio onima yi tunda kekandu.—Va Roma 6:23.

Tu eca olopandu ku Yehova omo lioku linga eliangiliyo lioku tetulula ocitangi comanu. Eye wa eca Omõlaye we lipua, una weya oku kũlĩhĩwa londuko ya Yesu, okuti wa talisiwa ohali, kuenda wa pondiwa oco a kale ocisembi coku tu yovola omanu kupika wekandu kuenda kolofa. Yesu omo liocisola a kuetele Isiaye kuenda omanu, wa eca omuenyo waye we lipua oco a tu yovole. (Va Roma 5:6-8) Ocituwa caco coku lieca olumue co nenela oku kuata esanju komuenyo. b

4. YESU WA KŨLĨHĨLE OKUTI WA SOLIWILE LOKU TAVIWA LA ISIAYE.

“U, Eye Omõlange wa soliwa, ndo sanjukila.”—Mateo 3:17.

Yehova wa popia olondaka evi, eci Yesu a papatisiwa. Olondaka viaco, vi lekisa okuti Yehova o sole calua Omõlaye. Eli olio esunga lieci Yesu a popela hati: “Oco Isia a solele!” (Yoano 10:17) Omo Yesu wa kũlĩhĩle okuti o soliwe loku taviwa la Isiaye, wa pandikisa lutõi kelambalalo kuenda kalundi. Eci a panda kolofa ka kuatele usumba lesakalalo. (Yoano. 10:18) Yesu omo wa limbuka okuti o soliwe kuenda o taviwa la Isiaye, wa kuata esanju liocili komuenyo.

Ocili okuti, Yesu wa kuata esanju komuenyo. Nda tua lilongisa ovina vialua viatiamẽla kokuaye, tu kuatavo esanju komuenyo. Vocipama ci kuãimo, tu ka konomuisa ovina vikuavo Yesu a sapuila olondonge viaye viatiamẽla komuenyo.

[Etosi pombuelo]

[Elitalatu kemẽla 4, 5]