KUATA UKAMBA LA SUKU

Anga hẽ Yehova o Kuete Ocikembe Love?

“Ovisimĩlo viokuti si kuete esilvilo, vi pondola oku tateka omunu oku kuata ukamba la Suku.” Evi, olondaka viukãi umue, simile hati, Yehova ka pondola oku kuata ocikembe laye. Ove hẽ oku kuetevo ovisimĩlo ndevi viaye? Nda ovio osisimĩlo o kuete, citava okuti o lipula ndoco: ‘Anga hẽ Yehova o kuetele ocikembe afendeli vaye omunu lomunu?’ Etambululo kepulilo eli, oco! Tu limbuka ndomo Yehova a tata omunu lomunu pokati ketu volondaka via Yesu.—Tanga Yoano 6:44.

Helie vali wa kũlĩha ciwa unu wa Yehova lovina a popia okuti Yesu ci sule? (Luka 10:22) Yesu wa popia hati: “Lomue o tẽla oku iya kokuange, te Isia wa numa u koka.” Omo liaco, nda ka tu kokiwa la Yehova ka tu pondola oku kala olondonge via Kristu, loku fendela Isietu wokilu. (2 Va Tesalonike 2:13) Nda tu kuata elomboloko lieci Yesu a popia, tu ka limbuka uvangi wokuti Suku wa siata oku tu tata.

Nye ci lomboloka ondaka yokuti Yehova o tu koka? Ondaka yopiwa kelimi lio Helasi okuti kumbundu yi tukuiwa hati oku “koka,” yi tiamisiwilavo koku nãla ukolo woku pipa olõsi. (Yoano 21:6, 11) Anga hẽ eci ci lomboloka okuti Yehova o tu koka ndaño ka tu yongola, loku tu kisika oku uvumba? Sio. Omo Yehova wa tu ĩha elianjo lioku nõla, ka kisika utima wetu oku tava. (Esinumuĩlo 30:19, 20) Onoño yimue ya lombolola ndoco: “Ka kuli osapi yi pondola oku yika utima womunu laumue. Utima u sukila oku yuluiwa vokati.” Yehova o pendosola ovitima viomanu valua voluali kuenda o limbuka ovisimĩlo viutima womunu lomunu. (1 Asapulo 28:9) Eci a sanga omunu umue wa sunguluka, eye o vetiya utima waye. O ci linga ndati?

Yehova u koka locisola, ale o nãla utima womunu una o lekisa ‘onjongole.’ (Ovilinga 13:48) Yehova poku sandiliya omanu, o ci linga lolonjila vivali okuti, oku kunda esapulo liwa Liembimbiliya, kuenda lespiritu sandu liaye. Eci Yehova a mola utima womunu umue o tambuluiya ciwa ocili Cembimbiliya, eye u kuatisa lespiritu sandu liaye oku kula kekolelo loku kapako ovina a lilongisa. (1 Va Korindo 2:11, 12) Nda ka tua kuatisiwile la Suku, nda ka tua lingile olondonge via Yesu okuti, tu litumbika koku fendela Yehova.

Olondaka via Yesu via sonehiwa kelivulu lia Yoano 6:44, vi tu longisa nye catiamẽla ku Yehova Suku? Yehova o koka omanu omo lioku limbuka ocina cimue ciwa ci kasi vovitima viavo kuenda o tata omunu lomunu pokati kavo. Oku kuata elomboloko liondaka yaco, ca elembeleka ukãi tua tukula kefetikilo liocipama cilo. Eye wa popia hati: “Oku kala ufendeli wa Yehova, esumũlũho lia velapo omunu a pondola oku tambula. Omo okuti Yehova wa ndi nõla oco ndi linge ufendeli waye, ndi sukila oku kala ndocikuata cimue ci kuete esilivilo kokuaye.” Nye ci popiwa kokuove? Oku kũlĩha okuti Yehova o tata afendeli vaye omunu lomunu pokati ketu, ci ka ku vetiya hẽ oku u situluila utima wove?

[Etosi lia velapo 14]

“Ka kuli osapi yi pondola oku yika utima womunu laumue. Utima u sukila oku yuluiwa vokati”