OMUENYO WANGE KOSIMBU: Nda citiwila volupale lumue lutito lu tukuiwa hati, Texcoco. Kotembo yaco, volokololo mue yukile oneketela yalua omo ka mua kapiwile akatalãu. Koloneke viaco, ovimbulu ovio via enda oku ambata ovikuata vioku landisa. Epata lietu lia kala lusuke walua kuenda pokati komãla ecea, ame ndimõla wepanduvali. Tate wa enda oku panga olohaku oco a tekule epata lietu. Pole, eye wa fa eci nda kuata anyamo epanduvali. Kuenje, mãi yange wa lingainga upange walua oco a tekule epata.

Sekulu yange wa enda oku sika ovisikilo kuenda wa kala usongui wocimunga cimue ca pindisiwa oku sika ovisungo vietavo. Valua pokati ka vangandiange, va tẽla oku sika ocisikilo cimue. Mãi wa kala onjimbi vocimunga cetavo, kuenda pahãyi yange onjimbi haeye wa sika sika opianu. Vosi yetu tua tiamẽlele ketavo, kuenda ame nda kala oñuatisi ya patele momo nda yonguile oku kala omisionaliu yo Katolika. Pole, kotembo yaco, nda solele calua oku tala olomapalo vio karate vo televisãu. Onjanja lonjanja eci ndi tala olomapalo viaco, ungangala wange wa livokiya.

Noke nda iñila kosikola yimue yetavo ya kala ndosiminaliu volupale luo Puebla. Nda yonguile oku linga o patele. Pole, kunyamo wa sulako kosikola yaco, nda sumuile calua omo liombambe yasongui vetavo. Ufeko umue o mandele, wa ndi yonja oco a lipekele lame. Ndaño sia tavele keyonjo liaco, pole ca ndi vetiya oku kuata onjongole yoku kuela. Handi vali, ndaenda oku mola olopatele vialua ndomo via kuata ombambe. Omo liaco, nda siapo ocimãho cange coku linga ocitunda.

Noke nda iñila kosikola yoku sika ovisikilo yi tukuiwa hati, Conservatório Nacional de Música da Cidade do México. Eci nda mãla elilongiso liaco, nda kuela noke tua cita omãla vakuãla. Nda tekula epata liange lovisungo nda enda oku sika ko Misa yetavo lio Katolika.

Olohuela vietu via kuata ovitangi vialua tunde kefetikilo. Omo liesepa ame lukãi wange tua kuata, tua enda oku lihoyisa calua. Kefetikilo tua enda oku lisawula, kuenje tu litipula. Eci pa pita ekũi latatu kanyamo, tua litepa kuenje noke tua linyãla.

NDOMO EMBIMBILIYA LIA PONGOLA OMUENYO WANGE:

Osimbu handi sia litepele lukãi wange nda lisanga Lolombangi Via Yehova. Ovio via totola kepito lionjo yange, kuenda via ndi vetiya oku sapela ovina viatiamẽla Vembimbiliya. Nda simĩle siti ndi kuete ukũlĩhĩso walua wa tiamẽla ketavo, kuenje nda yonguile oku lekisa okuti lacimue va tẽla. Nda va linga apulilo atatama ana nda simĩle okuti lalimue eteke va ka a tambulula. Pole, nda komõha calua ndomo onjanja lonjanja va nyĩha atambululo Lembimbiliya. Nda limbuka okuti sia kuatele ukũlĩhĩso laumue. Ukãi wange wa suvukile Olombangi Via Yehova, kuenda ame sia kuatele otembo yoku lilongisa, kuenje va liwekapo oku ndi pasuisa.

Noke yanyamo atãlo, nda kuela ukãi ukuavo o tukuiwa hati, Elvira kuenje, nda lisanga vali Lolombangi Via Yehova. Omo ukãi wange Elvira, ka likalele Olombangi Via Yehova, ca lelukile oku lilongisa Embimbiliya olonjanja viosi. Pole, nda pita otembo yalua oco ndi siepo ovituwa viange viosimbu.

Noke nda limbuka okuti oco ndi fendele Yehova lutima wosi, ndi sukila oku linga apongoloko alua. Catete, nda sukilile oku siapo upange wange woku imba ovisungo ko Misa yetavo lio Katolika, kuenda oku sandiliya upange ukuavo. (Esituluilo 18: 4) Nda sukililevo oku sonehisa olohuela viange la Elvira kombiali.

Ocina cimue ca ndi tĩlile calua oku siapo, ocituwa cange coku tema. Pole, ovinimbu vivali Viembimbiliya via ndi kuatisa. Catete: Osamo 11:5, yi lekisa okuti Yehova wa suvuka ungangala, kuenda elivulu 1 Petulu 3:7, kuna kua ndi longisa okuti oco Yehova a yeve olohutililo viange, ndi sukila oku tata ukãi wange lesumbilo. Osimbu nda sokolola ovinimbu viaco loku likutilila ku Yehova oco a ndi kuatise, nda fetika oku likandangiya konyeño.

NDOMO NDA KUATISIWA:

Cilo ndi kuete epata limue lia sanjuka. Nda siata oku likolisilako oku kuata ukamba lomãla vange vukãi wosimbu, kuenda nda siata oku kuatisa epata liange oku pamisa ekolelo.

Eci nda kala omõla nda yonguile oku kala ocitunda oco ndi kuatise omanu. Kaliye ndi sima siti ndi kuete ocimãho komuenyo. Nda siata oku tekula epata liange poku longisa oku sika ovisikilo. Ngeca olopandu ku Yehova omo a pandikisa lame, poku nyĩha epuluvi lioku linga apongoloko okuti, ndi linga omunu umue uwa! ▪

[Elitalatu kemẽla 8]

[Elitalatu kemẽla 8]

[Etosi lia velapo 8]

Omo nda kala oñuatisi ya patele nda yonguile oku kala o misionaliu yo Katolika

[Etosi lia velapo 9]

Embimbiliya lia ndi longisa okuti, oco Yehova a yeve olohutililo viange, ndi sukila oku tata ukãi wange lesumbilo

[Elitalatu kemẽla 9]