Momo lie ombembua yomanu ya lingila yuhembi?

Embimbiliya litukula asunga avali. Liatete lieli okuti, ndaño omanu va yongola oku linga ovina vi komohĩsa pole, ka va lulikiwile lepondolo lioku suñamisa okuenda kuavo. Liavali, ovisoko viosi viomanu ka via siatele oku tẽlisa olohuminyo viavo, momo ‘oluali luosi lu kasi povaka ukuevĩho,’ Satana Eliapu. Alikolisilo avo oku nena ombembua voluali ka a siatele oku tẽlisiwa.—Tanga Yeremiya 10:23; 1 Yoano 5:19.

Ocipululu comanu ca siatavo oku tateka ombembua voluali. Kuli lika ombiali yimosi yi pondola oku nena ombembua voluali okuti, yi longisa oku lisola pokati kuenda oku lingila vakuetu ovina viwa.—Tanga Isaya 32:17; 48:18, 22.

Helie o ka nena ombembua voluali luosi?

Suku Ukuonenewosi wa likuminya oku nena ombiali yi ka viala omanu vosi. Osoma yaco yi ka malãko ovoviali osi omanu. (Daniele 2:44) Yesu omõla wa Suku, o ka kala Osoma Yombembua. Eye o ka malako evĩho liosi palo posi, kuenda o ka longisa omanu vosi oku kala vakuambembua.—Tanga Isaya 9:6, 7; 11:4, 9.

Lekuatiso lia Yesu, Olombangi Via Yehova vi kasi oku longisa Embimbiliya komanu voluali luosi, oco va kũlĩhe ndomo va pondola oku kala vakuambembua la vakuavo. Ndopo, voluali mu ka kala ombembua yocili.—Tanga Isaya 2:3, 4; 54:13.

Oco o kuate elomboloko lia suapo, tanga ocipama 3 celivulu eli, Embimbiliya li Longisa Nye? lia sandekiwa Lolombangi Via Yehova