ELIE ka la kuata esakalalo loku sandiliya ekuatiso liomunu umue wa velapo? Ocitangi omunu a kasi oku liyaka laco, oco cu vetiya oku sandiliya ekuatiso kekamba limue okuti, lia pitilevo locitangi caco. Omo liocikembe, ekamba liaco li vetiyiwa oku ku ku kuatisa.

Omanu vamue va siata oku sandiliya ekuatiso liaco poku likutilila. Ovo ka va sandiliya Suku una o pondola oku va kuatisa. Pole, va sandiliya ekuatiso liaco kolosandu. Ovo va siatavo oku likutilila kolosandu omo lioku sima okuti, vi kuete unene woku va kuatisa. Omanu vamue nda va nyelĩsa ocina cimue ci kuete esilivilo, va nõlapo oku likutilila “Kosandu” yi tukuiwa hati, António Pádua. Momo va sima okuti, osandu yaco yi pondola oku sanga ovina via nyelẽla ale vievi via nyaniwa. Nda ocinyama cimue ci vela, va likutilila “Kosandu” Francisco de Assis ale “Kosandu” Yuda Tadeu, oco va kũlĩhe eci ca koka uvei waco.

Tu limbuka ndati okuti ka ca sungulukile oku likutilila kolosandu viaco ndomo ca lomboluiwa Vovisonẽhua? Nda tu kasi oku suñamisa olohutililo vietu ku Suku, tu sukila oku li pula ndoco: Anga hẽ Suku o yevelela muẽle olohutililo vietu? Tu sukilavo oku lipula ndoco: Suku o tenda ndati vana va likutilila kolosandu?

Ocituwa coku likutilila kolosandu ca tunda kalongiso Esanda Vetavo lio Katolika. Ndomo ca lomboluiwa vo Nova Enciclopédia Católica, ocisimĩlo cavo “oku pinga ohenda ya Suku loku kevelela oku yi tambuila vonduko yolosandu. Omunu wosi o likutilila kolosandu, wa kolela okuti, o tambula ekuatiso omo liocikele vi kuete ku Suku.

Anga hẽ eci oco Embimbiliya li longisa? Omanu vamue va siata oku popia vati, upostolo Paulu eye wa fetika lohutililo yolosandu valivulu a soneha. Eye wa sonehela Akristão va kala ko Roma ndoco: “A vamanji, ndi pinga kokuene vonduko ya Ñala yetu Yesu Kristu okuti, lekuatiso liespiritu sandu, vu ndi kongela volohutililo viene ku Suku.” (Va Roma 15:30, NW) Anga hẽ Paulu wa kala oku vetiya Akristão, oku likutilila kokuaye vonduko ya Suku? Sio. Nda va kuata ovisimĩlo viaco, ci lekisa okuti, va kala oku pinga ku Paulu upostolo wa Kristu, oco a kale kapitiya kavo. Paulu wa popia hati, ca sunguluka oku pinga ku manji umue oco a tu likutilileko ku Suku. Pole, ca litepa oku likutilila komunu umue oco a pitiye apingilo etu ku Suku o kasi kilu. Momo lie?

Vevanjeliu liupostolo Yoano, Yesu wa popia hati: “Ame ndinjila, haime ndicili, haime ndimuenyo. Lomue iya ku Isia, te lame.” (Yoano 14:6) Yesu wa popiavo hati: ‘Isia oku ĩhi ovina viosi vu pinga vonduko yange.’ (Yoano 15:16) Yesu ka popele hati, olohutililo vietu tu vi suñamisa kokuaye oco a sapuile Suku apingilo etu. Pole, oco olohutililo vietu vi yeviwe tu sukila oku vi suñamisa lika ku Suku vonduko ya Yesu.

Eci olondonge via pula ku Yesu ndomo vi sukila oku likutilila, Eye wa vi tambulula hati: “Eci vu likutilila lingi hoti, ‘A Tate, onduko yove yi sumbiwe.’” (Luka 11:2) Olonjanja viosi eci tu likutilila, tu sukila oku suñamisa lika olohutililo vietu ku Suku okuti, ku Yesu ale komunu ukuavo hakoko. Alongiso a Yesu ka a lekisa hẽ okuti tu sukila lika oku suñamisa olohutililo vietu ku Suku vonduko ya Yesu okuti ku mitakati umue ukuavo ale “kosandu” hakoko?

Olohutililo vi kuete esilivilo momo vi panga onepa kefendelo lietu, kuenda oku fendela ovina vikuavo okuti Suku hayeko ka ci litava leci Embimbiliya li longisa. (Yoano 4:23, 24; Esituluilo 19:9, 10) Eli olio esunga lieci tu sukilila oku suñamisa lika olohutililo vietu ku Suku.

Yesu Vohundo a lingila Komunda wa tukula ocindekaise comõla o pinga okulia ku isiaye. Anga hẽ isia eca komõlaye ewe okuti ombolo hayoko? Ale u wiha onyõha okuti olũsi haluoko? (Mateo 7:9, 10) Ocili okuti, Isia umue ukuacisola ka ci lingi!

Sokolola ocindekaise conjali yikuavo. Sokolola okuti omõlove o ku pinga cimue. Ove o kuete ukamba laye, kuenda o yongola okuti ukamba waco wa amamako. Omo liusumba a ku kuetelele, o pinga komunu ukuavo oco a vangule love eci a yongola cimue. Nda wa pita locitangi caco o kala ndati? Nye o linga nda okuti olonjanja viosi eci omõla a yongola cimue, o vangula lika lomunu waco kuenda wa limbuka okuti o kasi oku amamako oku ci linga? Anga hẽ o sanjuka? Sio! Momo olonjali vi kuetele ocisola omãla vavo vi yongola okuti, nda omãla va sukila cimue va pinga kokuavo.

Poku tiamisila ocindekaise eci comõla wa pinga okulia, Yesu wa sapuila kowiñi hati: ‘Nda ene vulondingaĩvi wa siati oku eca ovina viwa komãla vene, Isiene o kasi kilu ka velelepo hẽ koku eca ovina viwa kuava vo pinga?’ (Mateo 7:11) Ocili okuti onjali yi kuete onjongole yoku eca ovina viwa komõlaye. Isietu wokilu o kuetevo onjongole yoku tu ĩha ovina tu pinga kokuaye.

Suku o yongola okuti tu kuata ukamba laye ndaño tuakuakandu. Eye ka ecele komunu ukuavo ocikele coku yevelela olohutililo vietu. Embimbiliya li tu vetiya ndoco: “Tuika ku Yehova ocitele cove kuenje, eye o ku kuatisa.” (Osamo 55:22) Omo liaco, poku likutilila ka tu sukila va kapitiya kolosandu, ale omanu vakuavo pole, tu sukila oku kuata ovisimĩlo ndevi via Yehova Suku.

Isietu wokilu wa siata oku tata omunu lomunu pokati ketu. Eye o yongola oku tu kuatisa oku tetulula ovitangi vietu kuenda o tu vetiya oku kuata ukamba laye. (Tiago 4:8) Tu kuete esanju lialua omo lioku kuata ukamba la Suku yetu haeye Isia, “ukuakuyeva ohutililo”!—Osamo 65:2.