Eteke limue wa tatiwile ale lãvi omo liolonepele viapata? Anga hẽ onjanja yimue va ku likalele ale oku linga upange umue omo liekova liove kuenda ovituwa viofeka wa citiwila? Nda wa pitile ale locitangi caco, limbuka okuti omanu valua va siatavo oku liyaka locitangi caco. Ivaluka okuti, kilu ka kuli ocame ndeci omanu va siata oku linga palo posi. Upostolo Petulu wa kolelele kolondaka viokuti, “Suku ka kuete ocame.”—Tanga Ovilinga. 10:34, 35.

Petulu wa tukula olondaka evi eci a kala konjo ya Korneliu, una wa kala ukualofeka. Petulu wa kala Uyudea, kotembo yina va Yudea va tendiwile okuti vakualofeka, kuenda ka va taviwile oku kala olondonge viavo. Momo lie Petulu a endelele konjo ya Korneliu? Momo Yehova eye wa lingile esokiyo liaco. Vocinjonde Petulu a kuata, vo sapuila hati: ‘Ku ka tende ovina Suku a yelisa okuti viaño.’ Petulu ka kũlĩhĩle okuti vocinjonde Korneliu a kuata, ungelo wo sapuila oco a ende konjo ya Petulu. (Ovilinga 10:1-15) Eci Petulu a limbuka okuti Yehova eye wa linga eliangiliyo liaco, ka kuatele usumba woku vangula.

Noke Petulu wa popia hati: “Nda limbuka okuti, Suku ka kuete ocame.” (Ovilinga. 10:34, NW) Kelimi lio Helasi ondaka “ocame” yi lomboloka “omunu umue o vanja kocipala.” Onoño yimue velivulu a soneha li tukuiwa hati: (Tradução Interlinear Do Reino Das Escrituras Gregas), wa popia hati: “Ondaka ocame yi lomboloka onganji yimue okuti poku sombisa omunu, o vanja kocipala kuenda ka kũlĩhĩsa vali ocitangi caco.” Suku poku tetulula ocitangi cimue ka vanji kekova, kofeka omunu a citiwila, ale ovina a kuete.

Yehova ovanja eci ci kasi vutima wetu. (1 Samuele 16:7; Olosapo 21:2) Petulu wa popia hati: “Kolofeka viosi, omunu wosi o lekisa esumbilo kokuaye loku linga esunga, o taviwa laye.” (Ovilinga 10:35, NW) Nda tu lekisa esumbilo ku Suku loku kolela kokuaye, tu yuvula oku linga ovina viusumuisa. Oku kala vakuesunga, ci lomboloka oku linga ovina vi sanjuisa Suku. Yehova o sanjukila omanu va kuete utima woku linga ovina via sunguluka.—Esinumuĩlo 10:12, 13.

Nda o kuete olonepele, o pondola oku kuatisiwa lolondaka Petulu a soneha viatiamẽla ku Suku. Yehova wa siata oku kuatisa omanu vosi oco veye kefendelo liocili. (Yoano 6:44; Ovilinga 17:26, 27) Yehova o yeva olohutililo viafendeli vaye vosi, kuenda o vi tambulula. (1 Olosoma 8:41-43) Ndaño Yehova o kasi kilu, pole, o tenda omanu okuti, vatiamẽla lika kepata limuamue. Ove hẽ o yongola oku lilongisa ovina viatiamẽla ku Suku ka kuete ocame?