Tu pondola oku lilongisa ovina viatiamẽla kondingaĩvi, ndomo o ci lete vociluvialuvia cilo okuti, Yesu o kasi oku sapela laye. Ondingaĩvi yaco yi kasi oku pinga ongecelo. Wa pinga ku Yesu hati: “Eci wiñila vusoma wove njivaluke.” Ndomo o lete vociluvialuvia eci, Yesu o kasi oku vangula londingaĩvi. Wa kũlĩha hẽ ovina Yesu a kasi oku sapela laye?— a Yesu wa likuminya kokuaye hati: “Etaili hu sapuila okuti, o ka kala kumue lame Voluali Luokaliye.”

Nye o sima catiamẽla Koluali luokaliye?—Oco tu kuate elomboloko liwa tu kũlĩhĩse eci catiamẽla Kocumbo Celau muna Suku a kapele omanu vatete okuti, Adama la Heva. Ocumbo caco ca kala pi? Kilu ale, palo posi?

Nda wa tambulula okuti palo posi ciwa. Eci tu sokolola okuti ondingaĩvi yi ka kala “Voluali Luokaliye” tu limbuka okuti eye o ka kala palo posi eci ongongo yi ka linga yokaliye. Oluali Luokaliye lu Lomboloka Nye?—Tu kũlĩhĩse.

Eci Yehova Suku a lulika omanu vatete okuti, Adama la Heva, Embimbiliya li popia hati, wa va kapa vocumbo celau palo posi. Ocitumãlo caco ca tukuiwile hati, “ocumbo Cedene.” O tẽla hẽ oku sokolola ndomo “ocumbo Cedene” ca posokele?—Ocili okuti, ca posokele calua, kuenda koloneke vilo, ka kuli ocitumãlo cimue ci kasi ndocumbo caco!

Cipi ocisimĩlo cove? Anga hẽ Yesu o ka kala palo posi londigaĩvi yina ya pinga ongecelo yakandu aye?—Sio. Momo Yesu o ka kala Osoma yoluali Luokaliye palo posi. Yesu o ka kala londigaĩvi yaco eci a ka yi pindula okuti o yi mola loku yi tata Voluali luokaliye palo posi. Momo lie Yesu a ka ecelela ondingaĩvi oku kala Voluali luokaliye?—Tu kũlĩhĩse ulandu waco.

Ocili okuti ondingaĩvi eyi ya linga ovina ka via sungulukile. Pole, kuli omanu valua va ka kala palo posi. Valua pokati kavo osimbu ka va file handi, va lingaile ovina vĩvi, momo lomue wa va longisa ocili catiamẽla ku Yehova kuenda kocipango caye.

Omanu vaco oku kongelamo ondigaĩvi ya kala oku sapela la Yesu, va ka pinduiwa oco va kale Voluali luokaliye palo posi. Ovo, va ka longisiwa oku linga ocipango ca Suku, oco va lekise okuti va sole Yehova.

Wa kulĩha ndomo va ka ci linga?— Poku linga ovina Suku a yongola. Tu ka kuata esanju lialua eci tu ka kala Voluali Luokaliye kumue lomanu va sole Yehova, haivo va lisole pokati!