OKU SAPELA LOMUNU O KASI POSONGO YETU

Anga hẽ Suku wa Kapako Ovitangi Vietu?

Ombangulo yi kuãimo yi lekisa ndomo Ombangi ya Yehova yi sapela lomunu umue posongo yavo. Tu sokololi ndu okuti Ombangi yimue ya Yehova yi tukuiwa hati, Michelle ya enda konjo yukãi umue o tukuiwa hati, Sophia oco a sapele laye.

WA CI LINGA NDATI?

Michelle: Etaili ndi kasi oku eca o tratado eyi komanu va kasi posongo yetu. Oyo yi kuete osapi ya linga hati: Ove hẽ o Yongola Oku Kũlĩha Ocili? Ndu ku ĩhako yimue.

Sophia: Otratadu yaco yi lombolola hẽ ovina viatiamẽla ketavo?

Michelle: Yi lombolola. Oyo, yi kuete apulilo epandu kemẽla liatete. Epulilo lipi o yongola oku kũlĩha etambululo liaco?

Sophia: Tu liwekepo ombangulo yaco. O pesela ño otembo yove oku sapela lame.

Michelle: Momo lie o popela ondaka eyi?

Sophia: Momo si tava ku Suku.

Michelle: Nda sanjuka omo lioku ndi sapuila ocisimĩlo cove. Ndu ku pula ndoco: Ove hẽ wa kuatele ale ocisimĩlo caco?

Sophia: Sia kuatele. Momo nda kulila vetavo. Pole, nda liwekapo oku endaenda konembele.

Michelle: Ndi yongola oku ku sapuila onduko yange. Ame Michelle.

Sophia: Nda pandula. Ame Sophia.

Michelle: Ciwa oku ku kũlĩha, a Sophia.

Sophia: Nda pandulavo.

Michelle: A Sophia, sieyilile oku ku kisika oku tava ketavo liange. Ndi yongola oku kũlĩha cimue. Kuli hẽ cimue ca ku vetiya oku kuata atatahãyi okuti kuli Suku?

Sophia: Ndi kuete. Momo tunde eci ina yange a tusuiwa lekãlu pa pita ale 17 kanyamo.

Michelle: Ngecele. Wa lemẽhiwa?

Sophia: Wa teka.

Michelle: Avoyo we! O kasi oku liyaka locintangi cinene.

Sophia: Ovina viaco via ndi sumuisa calua. Nda kuli Suku momo lie a ecelela okuti omõlange o pita locitangi caco? Momo lie Suku a ecelela okuti tu tala ohali?

ANGA HẼ CA SUNGULUKA OKU KŨLĨHA ESUNGA LIACO?

Michelle: Ovisimĩlo kuenda apulilo ove a ndi lomboloka. Eci tu kuata ovitangi ca sunguluka oku kũlĩha esunga liaco. Momo kosimbu, kua kalavo alume lakãi vakuekolelo va tukuiwa Vembimbiliya okuti, va kuatavo ovitangi kuenda va yonguilevo oku kũlĩha esunga liaco.

Sophia: Eci o popia ndeti ocili muẽle?

Michelle: Ocili. O yongola hẽ okuti ndu ku lekisa ulandu umue u sangiwa Vembimbiliya?

Sophia: Ndi yongola.

Michelle: Kũlĩhĩsa eci uprofeto Havakuki a pula ku Suku, ndomo ci sangiwa kelivulu lia Havakuki kocipama 1 kocinimbu 2 leci 3. Ovinimbu viaco vi popia hati: “A Yehova, toke pi ndi likutilila ekuatiso liove kuenje ku yevi? Toke pi mbilikiya siti, Popela, kuenje ku popela? O ndekisila nye evĩho?” Anga hẽ wa siatavo oku linga apulilo aco?

Sophia: Nda siata oku a linga.

Michelle: Suku ka pisile Havakuki omo a linga apulilo aco, kuenda ko sapuilile hati wa sukilile oku pamisa ekolelo liaye.

Sophia: Olondaka evi viwa.

YEHOVA O NYÃLE OHALI

Michelle: Embimbiliya li longisa okuti, Suku wa kũlĩha ohali yetu kuenda wa tu kapako.

Sophia: Olondaka evi vi lomboloka nye?

Michelle: Linga ndu ku lekise vali ulandu ukuavo u sangiwa kelivulu Lietundilo 3:7. Citava hẽ okuti o tanga ocinimbu caco?

Sophia: Citava. Oco ci popia ndoco: ‘Yehova wa popia hati: ‘Nda mõla ohali yomanu vange va kasi Kegito. Nda yeva ndomo va lilila asongui vavo vupange, kuenda nda kũlĩha ohali yavo.’

Michelle: Nda pandula. Ndomo ca lomboluiwa vocinimbu eci, o tava hẽ okuti Suku wa kapako ovitangi afendeli vaye va siata oku liyaka lavio?

Sophia: Ndi tava okuti wa kapako ovitangi viavo.

Michelle: Suku wa kũlĩha ovitangi vietu. Tu pitulule onepa yasulako yocinimbu eci. Suku wa popia hati: ‘Nda kulĩha ohali yavo.’ Olondaka evi vi lekisa hẽ okuti Suku ka kapeleko ovitangi vietu?

Sophia: Sio, hacoko.

Michelle: Suku o lete ovitangi vietu, kuenda o sumua calua eci tu tala ohali.

Sophia: Olondaka evi viocili.

Michelle: Tu kũlĩhĩse vali ocinimbu cikuavo ci lekisa ndomo Suku a kapako ohali yomanu. Ocinimbu caco ci sangiwa kelivulu lia Isaya 63:9. Onepa yatete yocinimbu eci yi popia hati: ‘Eye wa talavo olohali kumue lavo.” Anga hẽ o pondola oku popia okuti Suku wa siata oku sumua eci omanu va tala ohali?

Sophia: Ndi tava okuti o sumua.

Michelle: Ocili muẽle a Sophia, Suku wa tu kapako kuenda eci tu tala ohali o sumua. Eci tu sumua, eye o sumuavo.

MOMO LIE SUKU KA MALELAKO OHALI?

Michelle: Osimbu sia tiukilile, ndi yongola oku ku sapuila ondaka yikuavo.

Sophia: Citava.

Michelle: Kũlĩhĩsa eci Embimbiliya li tu longisa catiamẽla kunene wa Suku, kelivulu lia Yeremiya 10:12. Citava hẽ okuti o tangako?

Sophia: Citava. Oco ci popia hati: ‘Yehova wa sovola osi lunene waye, kuenda wa seveta oluali lolondunge viaye, kuenje wa yala ilu luloño waye.’

Michelle: Nda pandula. Tu sokolole ocinimbu tua tanga ndeti. Anga hẽ Suku wa sukilile unene walua poku lulika ilu longongo kuenda ovina viosi vi kasimo?

Sophia: Wa sukilile.

Michelle: Nda Suku o kuete unene walua, kuenda wa lulika ovina viosi, ka tu kolela hẽ okuti o kuete unene woku lava ovina a lulika?

Sophia: Tu kolela.

Michelle: Sokola vali ina yove. Momo lie o sumuĩla omo liocitangi caco?

Sophia: Momo ina yange, kuenda ndu sole calua.

Michelle: Nda wa kuatele unene woku u kayisa, nda wa ci linga?

Sophia: Nda nda ci linga.

Michelle: Sokolola elomboloko liolondaka evi. Embimbiliya li longisa okuti, eci tu tala ohali Suku o sumua kuenda o kuete unene woku malako ohali yaco. O pondola hẽ oku sokolola esunga lieci Suku ka malẽlako lonjanga ohali tu kasi oku tala?

Sophia: Lalimue eteke nda kuatele ovisimĩlo viaco

Michelle: Anga hẽ eli olio esunga lieci Suku ka malelako ovitangi vietu? a

Sophia: Haka! Ndi sima okuti eli olio esunga liaco.

Michelle: Ndi yevite okuti o telefone yove yi kasi oku vilikiya. Ndi sokiya epuluvi likuavo oco tu sapele ovina viatiamẽla kondaka eyi.

Sophia: Nda pandula. Citava oku tiuka. b

Ove hẽ wa tangele ale Vembimbiliya ovina via ku komohĩsa? O yongola hẽ oku kũlĩha ovina Olombangi Via Yehova via siata oku lilongisa? Nda oco, ku ka kuate ohele yoku pula Ombangi yimue ya Yehova. Eye o pondola oku ku kuatisa oku sanga atambululo aco.

[Atosi pombuelo]