EMBIMBILIYA LI PONGOLOLA OMUENYO WOMANU

“Si kuete unene woku pongolola ovitangi violuali”

ULANDU WA LOMBOLUIWA LA MANJI JUKKA SYLGREN

UNYAMO A CITIWA: 1966

KOFEKA A CITIWILA: KO FINLÂNDIA

ULANDU WOMUENYO: O SOLE OKU TATA OVINYAMA

OMUENYO WANGE KOSIMBU: Tunde vutila ndi solele calua ovina via lulikiwa vi sangiwa voluali. Epata liange lia endaile kovitumãlo via posoka vi sangiwa volupale luo Jyväskylä Vofeka yo Finlândia. Eci nda kala omõla nda solelevo calua oku papala lovinyama ndeci, olongato kuenda olombua! Osimbu nda kala oku kula, nda enda oku sumua omo liomanu va kala oku tata lãvi ovinyama. Noke nda likongela lomanu vana va litumbikile kocisoko coku teyuila ovinyama okuti va kuata ovisimĩlo ndevi viange.

Tua lingaile upange woku teyuila ovinyama, loku sandeka asapulo oco tu nyule ovitumãlo vioku landisa ovipa viovinyama loku sapuila omanu okuti, ka ca sungulukile oku ci linga. Omo liaco tua sokiya ocimunga cimue ci teyuila ovinyama. Omo okuti tua enda oku teyuila ovinyama, ca temisa olombiali, kuenje nda ambatiwile olonjanja vialua kombonge.

Sia sumuĩle lika omo liovinyama via enda oku tatiwa lãvi pole, nda sumuĩlevo omo liovitangi vikuavo vio voluali. Ndeya oku likongela kovimunga vimue vioku teyuila ovinyamo, oku kongelamo ocimunga ci tukuiwa hati, Greenpeace. Nda likolisilako oku linga upange waco, kuenje nda linga onganji yoku kuatisa olohũkui.

Noke, nda limbuka okuti, si tẽla oku malako ovitangi vi sangiwa voluali. Ndaño okuti ovisoko viaco via likolisilako oku teyuila ovinyama, pole, ovitangi via kala oku livokiya. Ovitangi viaco, via kala ndu okuti voluali ka muli esunga. Noke nda limbuka okuti si kuete unene woku pongolola ovitangi violuali.

NDOMO EMBIMBILIYA LIA PONGOLOLA OMUENYO WANGE: Omo liesumuo nda kuata, nda fetika oku sokolola ovina viatiamẽla ku Suku kuenda Kembimbiliya. Noke, nda fetika oku lilongisa Embimbiliya Lolombangi Via Yehova. Kuenje nda limbuka okuti, ovio via sunguluka, momo via lekisa onjongole kokuange. Lalimue eteke nda simĩle okuti, ndi ka linga apongoloko komuenyo wange. Omo liaco, vokuenda kuotembo nda pongolola ovisimĩlo vĩvi nda kuatele.

Nda fetika oku tanga Embimbiliya liange. Noke nda limbuka okuti ovina nda tanga via ndi lembeleka calua. Nda tanga ovinimbu vialua Viembimbiliya via ndi longisa ndomo tu lekisa ohenda poku tata ovinyama. Elivulu Liolosapo 12:10, li popia hati: ‘Omanu va sunguluka va tata ciwa ovinyama viavo.’ Nda limbuka okuti Suku hayeko wa siata oku koka ovitangi voluali. Pole, ovio via siata oku livokiya omo okuti omanu ka va pokola kolonumbi via Suku. Nda komõha calua eci nda limbuka okuti, Yehova ukuacisola, kuenda ukuepandi.—Osamo 103:8-14.

Kotembo yaco, nda sanga otratadu yimue mua sonehĩwa ndomo ndi pondola oku kuata elivulu losapi hati: Embimbiliya li Longisa Nye? Kuenje, nda pinga elivulu liaco. Ka pa pitile otembo yalua, manji umue lukãi waye, veya konjo yange oco va ndi longise Embimbiliya, kuenje nda tava. Noke nda fetika oku endaenda kolohongele. Omo liaco, ndeya oku sola ovina nda kala oku lilongisa Vembimbiliya.

Ngeca olopandu omo lioku lilongisa Embimbiliya momo lia ndi kuatisa oku linga apongoloko komuenyo wange. Kuenje, nda liwekapo oku sipa, oku nyua calua, ndi kuete ekalo liwa, nda liwekapo oku popia ovina ka via sungulukile, kuenda nda sumbila olombiali. (Va Roma 13:1) Omo liaco, nda siapo ovituwa viosi vĩvi nda kuatele.

Nda kuata ocitangi coku pongolola ovisimĩlo viange viatiamẽla komanu kuenda kovinyama. Ka ca lelukile oku linga apongoloko aco, momo nda simĩle okuti, oku ci linga ci lekisa okuti nda va lingila usuanji. Noke, nda limbuka okuti Usoma wa Suku owo lika u ka nena elavoko liocili voluali. Nda litumbikavo koku longisa omanu ovina viatiamẽla Kusoma wa Suku.—Mateo 6:33

NDOMO NDA KUATISIWA: Omo okuti nda kala ukuakutata ovinyama, nda kuata ocituwa coku tepa omanu vawa lava vãvi. Nda suvukile omanu vãvi. Pole, ngeca olopandu omo liovina nda lilongisa Vembimbiliya, kaliye si kuetele vali omanu ovisimĩlo ka via sungulukile. Omo liaco nda likolisilako oku lekisa ocisola komanu vosi. (Mateo 5:44) Nda siata oku lekisa ocisola caco poku kundila omanu olondaka viwa Viusoma wa Suku. Ngeca olopandu omo lioku limbuka asumũlũho nda siata oku tambula kupange waco, momo u nena ombembua lesanju kuenda elavoko liocili komanu.

Cilo, ndi kuete ombembua omo lioku kuata ukamba la Yehova. Omo okuti Yehova eye Ululiki wovina viosi, ka ka ecelela okuti ovinyama lomanu va talisiwa ohali otembo ka yi pui, kuenda ka yongola okuti, oluali lu nyõliwa. Yehova lekuatiso Liusoma waye ndopo o ka malako ovitangi viosi. (Isaya 11:1-9) Esanju ndi kuete cilo, ka li tundi lika koku kũlĩha ocili ci sangiwa Vembimbiliya pole, li tunda koku kuatisa omanu oco va pamise ekolelo liavo. Si kuete unene woku pongolola ovitangi violuali.

[Elitalatu kemẽla 12]

[Elitalatu kemẽla 12]

[Ono yelitalatu]

Animalia

 [Elitalatu kemẽla 13]