Nda kulila ko Warialda, olupale lumue lutito ko Nova Gales do Sul. Omanu vimbo lio Warialda upange wavo oku lima, oku fuka olomeme kuenda olongombe. Olupale luaco luayela kuenda ka mua kalele ungangala walua.

Omo okuti nda kala omõla uveli, eci nda tẽlisa 13 kanyamo, nda fetika oku talavaya oco ndi kuatise epata. Omo okuti sia tangele calua, nda talavaya kovapia. Eci nda tẽlisa 15 kanyamo, upange wange wa kala woku songuila omanu kepia kuenda oku lisa olokavalu.

Oku talavaya kovapia kua ndi nenela asumũlũho. Nda sanjukilile upange wange omo liekalo liopocitumãlo caco. Eci nda kala kepia, kuteke nda solaile oku yota ondalu osimbu ndi tala osãi, olombungululu, kuenda oku sika kuofela. Kuenje, nda limbuka okuti kuli Umue wa lulika ovina viaco vi komõhisa. Pole, ndeya oku vetiyiwa lovituwa ka via sungulukile. Momo ndaenda oku yeva omanu va tukãla, kuenda nda lilongisa oku sipa. Oku sipa kuenda oku tukãla kua fetika oku panga onepa komuenyo wange.

Eci nda tẽlisa 18 kanyamo, nda ilukila kolupale luo Sydney. Kuenje, nda sanda oku iñila vusualali pole, omo sia tangele calua sia taviwile. Nda sanga upange kuenda nda kala unyamo umosi ko Sydney. Vokuenda kuotembo yaco, nda lisanga onjanja yatete Lolombangi Via Yehova. Noke, nda tava elaleko lioku enda kohongele yavo kuenje nda limbuka okuti ovina va longisa viocili.

Ndaño nda kuatele onjongole yoku tiukila kepia, pole, ndaenda kimbo lio Goondiwindi volupale luo Queensland. Noke, yoku fetika oku talavaya, nda kuela, kuenda nda fetika oku nyua.

Ame lukãi wange tua cita omãla vavali. Noke yomãla vetu oku citiwa, nda fetika oku kũlĩhĩsa lutate ekalo liomuenyo wange. Nda ivaluka ovina nda lilongisile kohongele Yolombangi Via Yehova ko Sydney, kuenda nda sokolola okuti ndi sukila oku fetika vali oku lilongisa Embimbiliya.

Nda sanga Utala Wondavululi wosimbu ulekisa onumbi yo Betele Yolombangi Via Yehova ko Australia. Kuenje, nda tumisa ukanda loku pinga ekuatiso. Noke yoloneke vimue, Ombangi yimue ya Yehova ukuahenda haiye ukuacisola weya oku tu nyula. Kuenje wa fetika oku ndi longisa Embimbiliya.

Poku lilongisa Embimbiliya nda limbuka okuti ndi sukila oku linga apongoloko alua komuenyo wange. Ocinimbu cimue Cembimbiliya ca mbetiya calua ukanda wa 2 Va Korindo 7:1. Ocinimbu caco ci tu vetiya oku ‘liyelisa kovina viosi vi vĩhisa etimba.’

Omo liaco, nda liwekapo oku sipa kuenda oku nyua calua. Ka ca lelukile oku linga apongoloko aco, momo tunde eci nda fetika oku kuama ovituwa viaco papita ale anyamo alua. Pole, nda nõlelepo oku linga ovina vi sanjuisa Suku. Eci ca ndi kuatisa oku linga apongoloko aco, onumbi yi sangiwa kelivulu lia Va Roma 12:2 yi popia hati: “Ko ka lisetahaisi loluali lulo, puãi kuati ovitima viokaliye okuti ovimuenyo vi pongoluiwa.” Noke, nda limbuka okuti oco ndi linge apongoloko, nda sukilile oku pongolola ovisimĩlo viange kuenda oku tenda ovituwa viange ndomo Suku a vi tenda okuti ka via sungulukile. Lekuatiso liaye nda liwekapo oku sipa kuenda oku nyua calua.

Ocitangi cinene nda liyaka laco oku siapo oku vangula upopi ka wa sungulukile. Nda kũlĩhĩle elungulo lia sonehiwa kelivulu lia Va Efeso 4:29 li popia ndoco: “Vovimela viene ka mu ka tunde ombangulo yĩvi.” Pole, oco ndi pongolole upopi wange, papita otembo yalua. Nda sangavo ekuatiso poku sokolola olondaka vi sangiwa kelivulu lia Isaya 40:26. Catiamẽla kolombungululu viokilu, ocinimbu caco ci popia ndoco: “Petuili ovaso kilu, vanji; helie wa vi lulika? U o vi tundisa lumosi lumosi vohoka yavio poku vi tukula olonduko, eye wa vi lulika. Kuenje omo unene waye wa piãla longusu yaye ya lua cimue oco lalumue lu kambapo.” Kuenje, nda sokolola okuti, Suku nda o kuete unene woku lulika ovina ndi sanjukila oku tala, o pondola oku nyiha ongusu yoku linga apongoloko kuenda ovina viu sanjuisa. Olohutililo lalikolisilo nda linga, ca ndi kuatisa oku pongolola upopi wange.

Omo okuti nda kala kepia, sia kuatele epuluvi lioku sapela lomanu valua. Pole, epindiso lia enda oku eciwa kolohongele Violombangi Via Yehova, lia ñuatisa oku vangula ciwa. Epindiso liaco lia ñuatisa oku kundila omanu olondaka viwa Viusoma wa Suku.—Mateo 6:9, 10; 24:14.

Ndi kuete esanju lioku kala ukulu wekongelo vokuenda kuanyamo alua. Esumũlũho linene ndi kuete, oku kuatisa vamanji. Esumũlũho lia velapo ñuete, lieli okuti ame lukãi wange kuenda omãla vetu va posoka tu kasi oku vumbila kumosi Yehova.

Ngeca olopandula ku Yehova omo okuti ndaño sia tangela calua kosikola, pole, o ndongisa. (Isaya 54:13) Nda limbuka esilivilo liolondaka vielivulu Liolosapo 10:22 tu tanga ndoco: “Esumũluho lia Yehova li muisa ukuasi.” Ame kumue lepata liange tu kasi oku amamako oku lilongisa ovina viatiamẽla ku Yehova, kuenda oku u vumba otembo ka yi pui.