Ove hẽ o tava ku Suku? Nda oco, o pondola hẽ oku tukula ovina vi situlula okuti kuli Suku? Ovovangi a lekisa okuti, tua ñualiwa lovina vi lekisa okuti kuli Ululiki ukualondunge, ukuonene, kuenda ukuacisola. Vipi ovina viaco, kuenda vi tu vetiya ndati? Oco o sange etambululo kũlĩhĩsa olondaka upostolo Paulu a soneha vukanda a tumisa Kakristão ko Roma.

Paulu wa popia hati: ‘Tunde kokululikiwa kuoluali, unu wa Suku ko muiwa muiwa lovaso, okuti unene waye ko pui, kuenda okukola kuaye, u molehela ciwa kovina a lulika. Oco ka va tẽla vali oku tatãla.’ (Va Roma 1:20) Ndomo Paulu a ci popia, unene Ululiki u limbukiwila kovina a panga. Tu kũlĩhĩsi olondaka via Paulu.

Paulu wa limbuka okuti ovituwa via Suku vi letiwe “tunde kokululikiwa kuoluali.” Vulandu owu ondaka yo Helasi yokuti “oluali,” ka yi tiamisiwila kongongo. Ondaka yaco yi tiamisiwila komanu. * Paulu wa popia okuti tunde eci omanu va lulikiwa va limbuka ovituwa Viululiki kovina a panga.

Uvangi waco tu u limbukila kovina via tu ñuala okuti, vi “muiwa lovaso.” Ci kale ovina vitito, ale ovina vinene via lulikiwa, ka vi situlula lika okuti kuli Ululiki pole, vi lekisa okuti eye o kuete ovituwa vi komohisa. Ovina viosi via lulikiwa ka vi situlula hẽ olondunge via Suku? Olombungululu kuenda okalunga ka vi situlula hẽ unene waye? Okulia kualua tulia kuenda oku tunda loku iñila kuekumbi ka ci situlula hẽ ocisola Suku a kuetele omanu?—Osamo 104:24; Isaya 40:26.

Uvangi upi tu kuete? Ocili okuti vana ka va limbuka ovituwa via Suku kuenda ka va tava ko kuaye ‘va tatãla.’ Onoño yimue ya sokisa ulandu waco ndoco: Sokola ndeci okuti, ukuakuendisa ekãlu ka kapiko onumbi yi popia hati: “Ñualela kepĩli.” Noke, ukuenje welombe utalamisa loku ukisika oku feta olombongo. Ukuakuendisa o seteka oku likala loku popia hati, ondimbukiso ka yi muile. Pole, ukuenje welombe ka tava kolondaka viaye, momo ondimbukiso yaco yi mõleha ciwa, kuenda ka kuete ocitangi vovaso. Ukuakuendisa o kuete ocikele coku kũlĩhĩsa olondimbukiso loku kuata elomboloko liaco. Cimuamue haico ci pita lovina Suku a lulika. Ondimbukiso yaco yi letiwe. Poku sokolola ovina viosi via lulikiwa, ci tu kuatisa oku mola ondimbukiso yaco. Omo liaco, ka kuli esunga lioku tatãla ondimbukiso yaco.

Elivulu li situlula ovina via lulikiwa, li eca uvangi watiamẽla Kululiki wetu. Pole, Embimbiliya elivulu likuavo li lombolola ovina vialua viatiamẽla ko kuaye. Poku tanga Embimbiliya tu pondola oku lilongisa etambululo liepulilo eli: Cipi ocipango ca Suku ca tiamẽla kongongo kuenda komanu va tungamo? Oku lilongisa etambululo liaco ci ku kuatisa oku linga ukamba la Suku una okuti ‘ovituwa viaye ka vi muiwa lovaso, vi limbukiwila’ kovina via tu ñuala.