Nda kulila ko Santiago ombala yofeka yo Chile, vo lupale luaco valua va enda oku fenya epangue, mua kalavo ovingumba vialua kuenda ungangala waluile. Eci nda kuata anyamo atãlo, isiange wa pondiwa. Noke ina yange wa kueliwa lulume umue okuti ongangala. Oloneke viosi wa enda oku tu tipula. Tunde kotembo yaco toke cilo nda linga ukuacinyeño usa.

Osimbu nda kala oku kula, nda fetika oku piãla kungangala. Nda fetika oku yevelela ovisikilo vi vetiya ungangala, oku nyua calua kuenda oku fenya epangue. Olonjanja viosi eci ku molẽha omanu va liyaka vokololo, ndi li tenga vema liaco la vana va fenya epangue okuti eteke limue, nda va ndi ponda. Eteke likuavo ocisoko cimue covingumba ca tuma umue oco a ndi ponde, pole poku tila va ndi lemeha. Vepuluvi likuavo, ocisoko cimue covingumba ca ndi saluisamo luta kuenda va yonguile oku ndi ponda.

Kunyamo wo 1996 nda fetika oku sola calua ukãi umue londuko Carolina, kuenje kunyamo wo 1998 tua kuela. Noke yoku cita omõletu watete, omo liocituwa cange cungangala, nda yonguile oku kala nda isiange yokatumba kuenda oku tata lãvi epata liange. Nda sanda ekuatiso kocitumãlo coku kuatisa vana va kuete ovituwa ka via sungulukile ndeci ungangala. Nda tambula ovihemba pole, ka via ñuatisile. Nda amamako oku tema ndaño muẽle kovina vitito, lomue wa tẽlele oku ndi lemẽla. Omo okuti nda yonguile oku liwekapo oku tata lãvi epata liange, nda sanda onjila yoku liponda. Pole, sia ci lingile.

Vokuenda kuanyamo alua sia tavela okuti kuli Suku, pole nda yonguile oku kolela ku Suku. Kuenje nda likongela ketavo lio postande. Otembo yaco ukãi wange wa fetika oku lilongisa Embimbiliya Lolombangi Via Yehova. Nda suvukile calua Olombangi Via Yehova kuenda olonjanja vialua nda enda oku va tuka tuka. Pole, ovo va enda oku nambulula lumbombe, ndaño okuti sia lavokaile ocituwa va lekisa.

Eteke limue, ukãi wange Carolina, wa pinga oco ndi tange Osamo 83:18 Vembimbiliya liange. Ocinimbu caco ca lekisa okuti onduko ya Suku Yehova. Nda komoha momo vetavo liange nda lilongisa eci catiamẽla ku suku, pole sia lilongisile catiamẽla ku Yehova. Kefetikilo liunyamo 2.000, nda fetika oku lilongisa Embimbiliya Lolombangi Via Yehova.

Osimbu nda kala oku amamako, nda lembelekiwa calua poku lilongisa okuti Yehova, Suku umue ukuahenda kuenda ukuakuecela. Kelivulu Lietundilo 34:6, 7, Embimbiliya li tukula Yehova okuti, “Suku yohenda, ukuacali, ukuakulivala konyeño, ukuacisola calua haeye ukuacili, ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu.”

Ka ca lelukile kokuange oku kapako ovina nda kala oku lilongisa. Nda simĩle okuti lalimue eteke ndi ka siapo ocituwa cange cungangala. Olonjanja viosi ndi lueya, ukãi wange Carolina wa enda oku ndi vetiya locisola. Eye wa enda oku njivaluisa okuti Yehova o lete alikolisilo ange. Ekuatiso liaye lia ndi vetiya oku amamako oku sanda oku sanjuisa Yehova, ndaño sia kuatele elavoko lioku siapo ocituwa cange.

Eteke limue manji Alejandro ulongisi wange Wembimbiliya, waminga oco ndi tange elivulu lia Va Galatia 5:22, 23. Ovinimbu viaco vi lekisa okuti epako liespiritu lia Suku, “ocisola, esanju, ombembua, epandi, unu, esunga, ekolelo, umbombe, esuluviko.” Manji Alejandro wa ndi lomboluila okuti si tẽla oku kuata ovituwa viaco lelikolisilo liange muẽle, pole te lekuatiso liespiritu sandu lia Suku. Olondaka viaco via pongolola ovisimĩlo viange!

Noke nda endele kohongele yofeka Yolombangi Via Yehova. Eci nda mõla ndomo ovina via sokiyiwa, ndomo ocitumãlo ca yelisiwa kuenda ukamba wa kala pokati kavo, ca ndi vetiya oku tava okuti nda sanga etavo liocili. (Yoano 13:34, 35) Nda papatisiwa kosãi ya Kayovo kunyamo wo 2001.

Yehova wa ñuatisa oku siapo ocituwa cange coku kala ongangala oco ndi kale umue ukuambembua. Nda limbuka okuti Yehova wa ndi yovola kocituwa cĩvi nda kuatele. Omanu valua va ndi suvukile pole, si va vetela evelo. Cilo nda sanjuka omo okuti, ame lukãi wange kuenda omãla vetu vavali tu vumba Yehova.

Omanu vamue kuenda akamba vange, ka va tava kepongoloko nda linga. Omo liaco, valua va fetika oku lekisa onjongole yoku lilongisa Embimbiliya. Cilo ndi kuete esumũlũho lioku kuatisa vakuetu oku kũlĩha Yehova. Nda sanjuka calua oku mõla ndomo ocili Cembimbiliya ci kasi oku pongolola ekalo liomuenyo wavo ndeci ca pita lame!