Ove hẽ, o yongola oku kuata uhayele kuenda oku kala otembo ka yi pui lepata liove? O yongola hẽ oku kala voluali lumue okuti ka muli evalo, ohali, kuenda olofa? Oluali luaco hanjoiko. Ndopo, kuiya oluali lumue luokaliye luesunga, momo, oco Yehova Suku a likuminya. Kũlĩhĩsa ndomo oku tẽlisiwa kuocipango caye kua lomboluiwa kelivulu Liesituluilo 21:3-5.—Tanga.

“[Suku o ka] puenya asuelela osi kovaso avo.” (Esituluilo 21:4) Asuẽlela api eye a ka puenya? Hasuelelako esanju kuenda hasuelelako ana oku teyuila ovaso etu. Ohuminyo ya Suku yitiamisiwila kasuelela ana a tunda kohali kuenda kesumuo. Suku ka ka puenya lika asuelela aco pole, eye o ka ci linga poku malako ovitangi vi koka asuelela ndeci, ohali kuenda upongo.

“Okufa ka ku kalako vali.” (Esituluilo 21:4) Olofa hẽ, havioko via siata oku koka oku lila? Yehova o ka yovola omanu kolofa vina via sokisiwa ndunyali wavo. Oco hẽ, o ka cilinga ndati? O ka cilinga poku malako ocina ca koka olofa okuti: Ekandu tua piñala ku Adama. (Va Roma 5:12) Lekuatiso liocilumba cocisembi ca Yesu, Yehova o ka kuatisa omanu vakuepokolo oco va lipue. a Noke, unyãli wa sulako okuti olofa o ka “imũha.” (1 Va Korindo 15:26) Omanu vakuekolelo va ka kala otembo ka yi pui ndomo Suku a ci yonguile kefetikilo.

“Ka ku ka kala vali . . . oku liyula.” (Esituluilo 21:4) Evalo lipi ka li ka kalako vali? Avalo osi, lasumuo a tunda kekandu kuenda kekambo lietu lioku lipua, ana a siata oku tu nenela ohali vokuenda kuanyamo alua, ka a ka kalako vali.

Ndopo omanu va ka kuata omuenyo umue okuti lomue vali o lila, momo oku fa kuenda evalo ka vi kalako vali. Ove pamue o pula ndoco: ‘Pi omanu va ka kuata omuenyo waco?’ Anga hẽ, Suku wa likuminya okuti omanu va ka kuata omuenyo waco kilu?’ Sio. Kũlĩhisa esunga liaco. Catete, ohuminyo yi fetika lolondaka viokuti “onjo ya Suku yi kasi pokati komanu,” kuenda omanu va tunga palo posi. (Esituluilo 21:3) Cavali, ohuminyo yaco yi lombolola oluali lumue okuti, “okufa ka ku kalako vali,” ci lomboloka okuti olofa vi ka kunduiwa. Ocili okuti, kilu lalimue eteke kua kaile olofa, momo vi kasi palo posi vokuenda kuanyamo alua. Omo liaco, ohuminyo ya Suku yoku nena omuenyo uwa yi ka tẽlisiwa palo posi.

Yehova o yongola okuti, tu tava kohuminyo yaye yoku nena oluali luokaliye mu ka kala esunga. Noke yoku tukula asumũlũho a keya palo posi, wa likuminya hati: “Tala! Ovina viosi ndi vi lingisa viokaliye.” Noke wamisako hati: “Olondaka evi via sunguluka, kuenda viocili.” (Esituluilo 21:5) Momo lie ku lilongisila ovina vikuavo vi lekisa ndomo ove kuenda omanu vana o sole u pondola oku kala pokati kafendeli va Yehova vakuesanju vana va ka mola oku tẽlisiwa kuolohuminyo via Suku?