Suku omunu umue ka muiwa lovaso. Eye wa lulika ilu, ongongo kuenda ovina viosi vi kasi lomuenyo. Lomue wa lulika Suku—momo eye ka kuete efetikilo. (Osamo 90:2) Suku o yongola okuti omanu vo sanda loku kũlĩha ocili catiamẽla kokuaye.—Tanga Ovilinga 17:24-27.

Suku omunu umue okuti tu pondola oku u kulĩha konduko. Tu pondola oku kũlĩha vimue pokati kovituwa viaye poku tala ovina a lulika. (Va Roma 1:20) Pole, oco tu kũlĩhe ciwa Suku, tu sukila oku li longisa Embimbiliya. Eci ci ka tu kuatisa oku sanjukila ekalo lia Suku.—Tanga Osamo 103:7-10.

Ululiki wetu Yehova, o nyale ũvi wosi. Eye wa lulika omanu lesetahãlo liaye. (Esinumuĩlo 25:16) Eci oco ci vetiya vamue pokati ketu oku suvuka ekambo liesunga. Ũvi wosi wa siata voluali ka u lingiwa la Suku. Suku wa lulika omunu lelianjo lioku nõla eci a yongola. Pole, omanu valua va kuama lãvi elianjo liaco kuenje va linga ovina vĩvi. Poku ci linga va sumuisa Yehova.—Tanga Efetikilo 6:5, 6; Esinumuĩlo 32:4, 5.

Yehova o sole esunga, kuenje ka ka ecelela okuti ũvi u kala otembo ka yi pui. (Osamo 37:28, 29) Vembimbiliya mu sangiwa ohuminyo yokuti Suku o ka malako ũvi wosi.—Tanga 2 Petulu 3:7-9, 13.