Eci nda citiwa, olonjali viange via kuatele epia vimbo limue li tukuiwa hati Galacia, konano yo Espanya. Ame nda kala omola wakũala pokati komãla ecẽlala. Tua kuata esanju vepata. Kotembo yaco ko Espanya, ca siatele okuti umue pokati komãla vepata o pondola oku enda kosiminariu ale oku kala konjo yolopatele. Vepata lietu, vatatu va kuata esumũlũho liaco.

Eci nda kuata 13 kanyamo, nda likongela ku manjange ukãi konjo yolomandele kolupale luo Madrid. Ekalo lio konjo yaco ka lia kaile liwa. Ka kua kaile oku likuatela ukamba—kua kala lika ovihandeleko, olohutililo, kuenda oku lisuluvika. Komẽle, tu enda vokapela oku ka sokolola, ndaño okuti olonjanja vimue nda endaile ño olivova. Noke, tu imba ovisungo vietavo kuenje ku lingiwa Omisa kelimi lio Latin. Omo okuti ovina viaco ka via ndi lombolokele, kokuange ca kala ndu okuti Suku o kasi ocipãla lame. Oloneke viange via kala lika vioku kala ulika. Ndaño eci tu li sanga la manjange, tu popia ño hati, “A maĩ a Maria, weyukisiwa longalasa.” Olomandele via tu ĩhile lika elianjo lioku sapela akũi atatu kakukutu noke yonanya. Ekalo liaco lia litepa calua leli nda sile konjo! Nda enda oku lila omo lioku liyeva okuti ndi kasi ulika.

Ndaño okuti sia kuatele ukamba la Suku, pole nda tẽlisa ohuminyo yange kuenje nda linga omandele eci nda tẽlisa 17 kanyamo. Nda tẽlisa eci ca kisikiwile kokuange, pole, noke nda fetika oku lipula nda Suku eye wa ndi nõla oku kala omandele. Olomandele via enda oku popia hati, wosi o kuete etatahãi liatiamẽla kondaka eyi o ka imbiwa vifelu! Pole, nda amamako loku kuata atatahãi. Ame nda kũlĩhĩle okuti Yesu Kristu ka sandele oku kala lika liaye pole, wa kuatele upange woku longisa omanu kuenda oku va kuatisa. (Mateo 4:23-25) Eci nda tẽlisa 20 kanyamo, sia kuatele vali onjongole yoku amamako oku kala omandele. Eteke limue okuti sia kapeleleko, mitavaso yolomandele wa ndi sapuila okuti, nda ñuete atatahãi oku amamako oku kala omandele, citava oku tiukila konjo. Ndi sima siti wa kuatele ohele yokuti nda nda amamako oku kala konjo ­yolomandele ndi yapuisa vakuetu. Omo liaco, nda tiukila konjo yetu.

Eci nda pitĩla konjo, olonjali viange via kuata elomboloko liaco. Omo okuti vimbo lietu ka mua kale upange woku talavaya,  nda enda ko Alemanya kuna ku kasi umue pokati ka va manjange. Eye wa kala mitavaso yocimunga comanu va tunda ko Espanya. Nda kuatele elianjo poku kala pokati komanu va teyuila ekalo liolonalavayi kuenda ekalo liakãi. Nda fetika oku tiamẽla kocisoko ci teyuila ekalo limuamue pokati komanu kuenje nda kuela umue wa tiamẽlele kocisoko caco. Nda sima okuti ndi kasi oku linga ocina ca sunguluka omo lioku tiamẽla kocisoko caco loku ava alivulu avo komanu kuenda oku ñuala ñuala volokololo oku pisa ekalo liuviali wofeka.

Vokuenda kuotembo, sia kuatele vali onjongole yoku tiamẽla kocisoko caco. Nda limbuka okuti vakuacisoko caco olonjanja vimue ka va tẽlisa ovina va sapula. Kunyamo wo 1971 atatahãi aco a livokiya eci amalẽhe vamue vakuacisoko caco va nyõla oseketa yofeka yo Espanya ko Frankfurt. Ovo va cilingila oku pisa evĩho liombiali ko Espanya. Pole, nda kũlĩhile okuti ocituwa caco coku lekisa onyeño ka ca sunguluka.

Eci omõlange watete a citiwa, nda sapuila ulume wange hati, ndi liwekapo oku enda enda kolohongele viaco. Nda sumuile momo lomue pokati kakamba vange weya oku tala oñaña yange. Nda yonguile oku kũlĩha catiamẽla kocimãho comuenyo. Anga hẽ, ca sunguluka oku likolisilako oku mioñolola ekalo liomanu?

Kunyamo wo 1976 Olombangi vivali Via Yehova ko Espanya via veta kepito lietu kuenje va tu ĩha alivulu amue Embimbiliya. Eci veya onjanja yavali, nda va pulisa ovina viala viatiamẽla kesunga lieci ku kasilili evĩho kuenda ungangala. Nda komoha calua poku mola ndomo va ndi tambulula loku kuama Embimbiliya! Noke nda tava oku lilongisa Embimbiliya.

Kefetikilo nda yonguile ño oku kũlĩha ovina vimue. Pole eci tua fetika oku enda enda lulume wange kolohongele Violombongi Via Yehova Vonjango Yusoma, ovisimĩlo viange via pongoloka. Kotembo yaco, tua kuata omãla vavali. Vokuenda kuolohongele Olombangi Via Yehova locisola via enda oku tu kuatisa oku tata omãla. Ocituwa cavo, ca ndi vetiya oku kuata ovisimĩlo viwa viatiamẽla Kolombangi Via Yehova.

Pole, nda amamako loku kuata atatahãi atiamẽla katavo. Noke nda nõlapo oku ka nyula epata liange ko Espanya. Manji ya isiange una wa kala opatele wa seteka oku ndi vetiya oku siapo oku lilongisa Embimbiliya. Pole, Olombangi Via Yehova via ñuatisa calua. Ovo va tambulula apulilo ange Lembimbiliya, ndeci ca linga Olombangi Via Yehova ko Alemanya. Eci nda tiukila ko Alemanya nda nõlapo oku fetika vali oku lilongisa Embimbiliya. Ndaño okuti ulume wange wa liwekelepo oku lilongisa Embimbiliya, nda amamako oku cilinga. Kunyamo wo 1978 nda papatisiwa kuenje nda linga Ombangi ya Yehova.

Oku kũlĩha ocili Cembimbiliya ca ndi kuatisa oku limbuka ocimãho comuenyo. Ndeci, elivulu lia 1 Petulu 3:1-4 li vetiya akãi oku ‘pokola’ ku vaveyavo “lesumbilo” kuenda oku lekisa ‘umbombe, momo ovio ovituwa vi panduiwa la Suku.’ Olonumbi evi via siata oku ndi kuatisa oku tẽlisa ocikele cange coku kala ukãi kuenda onjali.

Tunde eci nda linga Ombangi ya Yehova papita ale 35 kanyamo. Cilo nda sanjuka calua omo lioku tiamẽla kocisoko comanu va vumba Suku voluali, kuenda omo okuti pokati komãla vange vatãlo, vakuãla tu kasi oku vumbila kumuamue Yehova.