OSAPI YO KOÑOÑO | OMUNU HẼ O PONDOLA OKU KŨLĨHA ECI CI KEYA KOVASO YOLONEKE?
Vimue Via Tẽlisiwa, Vialua ka Via Tẽlisiwile
Ove hẽ, o yongola oku kũlĩha ndomo omuenyo wove u ka kala kovaso yoloneke? Eyi oyo onjongole yomanu valua. Omanu vamue va siata oku lombolola ovolandu a keya kovaso yoloneke, volonjila via litepa. Kulihisa ulandu u kuãimo:
-
OLONOÑO via siata oku talavaya lolomakina vinene loku pesela olombongo vialua oco va kũlĩhĩse ndomo oku vĩhisa ofela ku ka nyõla ongongo kovaso yoloneke kuenda ndomo otembo yi ka kala hẽla nda ombela yi loka ale sio.
-
OLOÑONOMUISI va lombolola eci catiamẽla kolomilu kuenda ko pulitika. Ulume umue o tukuiwa hati, Warren Buffett, okuti watiamẽla kocisoko ca vana va sovola upange woku soleka olombongo, omo liuloño waye woku lombolola ndomo olomĩlu vi ka kala kovaso yoloneke, omanu vo tukula hati, uprofeto. Ulume ukuavo kofeka yo Estados Unidos o tukuiwa hati, Nate Silver, wa siata oku kũlĩhĩsa ekalo liopulitika ndomo li kasi kuenje cu kuatisa oku lombolola ovina vialua via lekisiwa vo filme yo Hollywood.
-
ALIVULU OSIMBU a siata oku tukuiwa hati, ovitumasuku. Omanu valua va sima okuti ovina vi kasi oku tẽlisiwa cilo via sonehiwa velivulu lia Michel Nostredame (Nostradamus) wo kocita 16. Otembo yo kalendariu Mayan yina ya sulila keteke 21 ya Cembanima wo 2012, omanu valua va siata oku yi tukula hati, ondimbukiso yovilunga vi laika oku iya.
-
OVITUNDA VIATAVO olonjanja vimue va lombolola ovina vi kasi oku pita voluali oco va lungule omanu kuenda oku va kokela kokuavo. Ulume umue o tukuiwa hati, Harold Camping wa tendiwa hati, uprofeto yesulilo kuenda olondonge viaye via lomboluile hati, oluali luka nyõliwa kunyamo wo 2011. Pole oluali ka lua nyõliwile.
-
VAKUAKUTAHA va siata oku popia hati va kuete uloño woku tukula eci ci keya kovaso yoloneke. Alume vamue va tukuiwa hati, Cayce kuenda Jeane Dixon, va lombolola ovina vimue viocili viatiamẽla kocita 20. Pole, va lombolola ovina vialua ka via tẽlisiwile. Dixon wa lomboluile okuti kunyamo wo 1958 voluali mu ka pita Uyaki watatu. Cayce wa lomboluile okuti okupisa kunyamo wo 1970 olupale luo Nova Yorke luka takata vokalunga.
Anga hẽ kuli ovina vimue vi tu kuatisa oku kũlĩha eci ci ka pita kovaso yoloneke? Epulilo eli liwa. Momo nda wa kũlĩha ovina vi keya kovaso, ekalo liomuenyo wove li pongoloka.
