Vosi yetu tua siata oku sokolola eci ci keya kovaso yoloneke. Tu yongola oku kũlĩha ndomo omuenyo wetu lowu wepata lietu u ka kala kovaso yoloneke. Tua siata oku lipula ndoco: “Anga hẽ kovaso yoloneke omãla vange va ka kala ciwa?” “Ongongo yi ka nyõliwa locilunga cimue?” “Anga hẽ kuli cimue ndi sukila oku linga cilo oco omuenyo wange u kale ciwa kovaso yoloneke?” Apulilo ava atiamẽla kekalo lietu, momo tu yongola oku kuata ekolelo, kuenda oku kolapo. Nda wa kũlĩha ciwa ovina vi keya kovaso, o pondola oku lipongiya ciwa ketimba kuenda oku pongiya ovisimĩlo viove.

Nye ci ka pita love kovaso yoloneke? Omunu hẽ o pondola oku ci kũlĩha? Olonoño vina via siata oku tukula ovina vi keya kovaso yoloneke, olonjanja vimue ovina va popia vi tẽlisiwa pole, olonjanja vialua ka vi tẽlisiwa. Pole ci popiwa okuti, Suku o pondola oku tukula ovina vi keya kovaso okuti vi tẽlisiwa. Ondaka yaye yi popia hati: “Tunde kefetikilo ndukuakusapula ovina ka via lingiwile handi.” (Isaya 46:10) Anga hẽ ondaka yaye ya siata oku tẽlisiwa?

Momo lie o yonguila oku kũlĩha ndomo ovitumasuku via siata oku tẽlisiwa? Nda ove wa kũlĩha umue ukuakukũlĩhisa otembo okuti cosi a vangula ci tẽlisiwa, o komoha calua. Nda oku sapuila eci ci keya hẽla, o yevelela lutate. Cimuamue haico catiamẽla ku Suku okuti, nda wa limbuka okuti ovina viosi a popia via siata oku tẽlisiwa, o kapako ovina a ku sapuila viatiamẽla komuenyo wove ndomo u ka kala kovaso yoloneke.

OKU NYÕLIWA KUOLUPALE LUMUE LUNENE:

Oku popia hati, ofeka yimue yinene haiyo ya pama yi ka siala elunda vokuenda kuanyamo alua, ci komohĩsa. Suku vonduko yonumiwa yaye, wa lomboluile okuti ofeka yo Ninivei yi ka siala elunda. (Sofoniya 2:13-15) Nye vakuasapulo va siata oku popia? Kocita  cepanduvali O.Y., noke yoku pita 15 kanyamo tunde eci Suku a ci popia, olohoka vio Bavulono kuenda va Media, va katukila ofeka yo Ninivei kuenje va yi lundula. Suku wa popelevo hati ofeka yo Ninievi yi ka linga “elunda; osi yayo yi kukuta ndekango.” Anga hẽ, ondaka eyi ya tẽlisiwa? Ya tẽlisiwa. Ndaño okuti ofeka yaco lovambo aco a kuatele ocivanja ci soka 518 kolokilometulu, olohoka via nyõla ofeka yaco kuenda ka va yi tambuile okuti va tungamo ndomo ca lavokawaile. Ovo va yi nyõla. Anga hẽ omunu umue ukuapulitika nda wa tẽla oku tukula ovina viosi via laikele oku pita lofeka yaco okuti vi tẽlisiwa?

AKEPA OMANU A KA YOKIWA:

Helie omunu nda wa tẽla oku tukula onduko yulume umue o ka yokela akepa omunu kutala kuenda onduko ya kukululu yaye—lolupale mu ka kala utala waco, okuti, osimbu handi ka ca lingiwile pa kambele 300—kanyamo? Nda ondaka yomunu waco ya tẽlisiwa, o kemãla calua. Onumiwa ya Suku ya lombolola okuti: “Omõla o citilua vonjo ya Daviti . . . , onduko yaye Yosiya,” noke wamisako hati, o ka ‘timihĩla akepa omanu’ volupale luo Betele. (1 Olosoma 13:1, 2) Noke yoku pita ovita vitatu kanyamo, soma umue o tukuiwa hati, Yosiya wa tunda kocikoti cepata lia Daviti. Ndomo ca popiwile kosimbu, Yosiya ‘wa tuma oku upa akepa kayambo, wa a yokela kutala’ wa kala ko Betele. (2 Olosoma 23:14-16) Helie nda wa tẽla oku tukula ovina evi viosi pole, ka kuatisiwa lunene umue wo kilu?

ESULILU LIUVIALI UMUE:

Ci komohĩsa calua nda omunu umue o tukula onduko yulume umue osimbu handi ka citiwile—haeye o lundula uviali umue wa kemãla voluali, loku tukula uloño a ka kuama poku ci linga. Suku wa lomboluile okuti ulume umue o tukuiwa hati, Kuro o ka yula ofeka yimue.  Ulume waco o ka yovolavo va Yudea kumandekua kuenda o ka kuatisa kupange woku tumbulula onembele yi kola. Handi vali, Suku wa popelevo okuti vuloño wuyaki wa Kuro mu ka kongela oku takatisa ovava olondui kuenda apito olombundi a ka siala upulule okuti olohoka viasualali vi iñila. (Isaya 44:27–45:2) Anga hẽ olondaka via Suku via tẽlisiwa? Vakuasapulo va lombolola okuti ulandu wa Kuro woku yula ofeka wa tẽlisiwa muẽle ocili. Olohoka via Kuro via kuama uloño umue woku papuila ovava konẽle yikuavo kuenje olondui vimue vio ko—Bavulono via kukuta. Handi vali, olohoka via iñila volupale loku pita polombundi via sialele upulule. Noke Kuro wa yovola va Yudea kuenda wa eca esapulo liokuti va sukila oku tumbulula onembele yavo ko Yerusalãi. Esapulo liaco li komohĩsa momo Kuro ka kaile ufendeli wa Yehova. (Esera 1:1-3) Nda ka ca kaile Suku, helie nda wa tẽla oku tukula ovina viosi via kongela vulandu owu osimbu ka via lingiwile?

Tua tukula ovolandu atatu a lekisa ndomo olondaka via Suku vioku tukula eci ci keya kovaso yoloneke via siata oku tẽlisiwa. Ovina viaco ka vieyile ño ocipikipiki. Yehosua usongui wa va Isareli wa lombolola ocina cimue ca kũlĩhĩwile ciwa lomanu vaye. Eye wa popia hati: “Ene vosi wa kũlĩhi vovitima viene lovolonulo viene, okuti polondaka viosi viwa Yehova Suku yene o popeleli, layimue ya kambapo. Viosi muẽle vio suisiluipo. Layimue ya kambapo.” (Yehosua 23:1, 2, 14) Omanu va Yehosua ka va kuatele atatahãi vokuti olohuminyo via Suku kuenda ovitumasuku via siata oku tẽlisiwa. Suku wa siata oku cilinga ndati? Onjila Suku a kuama poku tẽlisa olohuminyo viaye, ya litepa leyi yomanu. Ove o sukila oku ci kũlĩha momo Suku wa siata oku eca esapulo limue liovina vi keya kovaso yoloneke okuti ove wa kongeliwamo.

Asapulo omanu oku tukula ovina vi keya kovaso yoloneke, a siata okupiwa va konomuiso olonoño, vovolandu a kasi oku pita, kuenda kovisimĩlo, ale komanu vana vakuavinjonde. Noke yoku sinyanyeha ovina vi pondola oku iya kovaso yoloneke, va fetika oku talamẽla ovina vi ka lingiwa.—Olosapo 27:1.

Ca litepa lomanu ceci okuti, Suku wa kũlĩha ovina viosi. Eye wa kũlĩha ciwa ekalo liomanu kuenda ovisimĩlo viavo. Omo liaco, eci a nõlapo oku linga cimue, omanu kuenda ofeka yaco yi ka kala. Pole, Suku o pondola oku linga vali ovina vikuavo. Eye o pondola oku songuila kuenda oku pongolola ovolandu okuti a tẽlisiwa ndeci eye a ci sokiya. Eye wa popia hati: “Ondaka yange yi tunda vomẽla wange . . . ka yi tiukila ño kokuange, puãi yi linga ndeci nda panga oku tẽlisa, . . . leci nda yi tumĩla.” (Isaya 55:11) Vimue pokati kovitumasuku, vi tu sapuila eci eye a ka linga kovaso yoloneke. Ovina a tukula vi tẽlisiwa ocili.

Anga hẽ kuli ovina vimue via lomboluiwa okuti vi keya kovaso yoloneke okuti ove lepata liove wa kongeliwimo? Nda va ku sapuila okuti ku kasi oku iya ocilunga cimue, o sandiliya ociteyuilo. Cimuamue haico o sukila oku linga lovitumasuku Viembimbiliya. Suku wa lombolola okuti, ndopo ku iya ocilunga cimue ci ka pongolola oluali. (Tala vokakasia losapi hati: “ Ceci Suku a Situlula Catiamẽla Koviyaneke.”) Ovina vi keya via litepa levi vakuoloño va siata oku tukula.

Catiamẽla kondaka eyi, ove pamue o sima ndoco: Omanu va tunga voluali, . . . va kuete ulandu umue. Lekuatiso liovitumasuku tu pondola oku kũlĩha esulilo liulandu waco osimbu ka wa pitile. Suku wa popia hati: “Tunde kefetikilo ndukuakusapula ovina ka via lingiwile handi. Ndukuakupopia siti, Ocipango cange ci lingiwa, kuenda ndi lemulũla cosi nda panga.” (Isaya 46:10) Ove kumue lepata liove, u pondola oku kuata oviyaneke vi komohĩsa. Pulisa Olombangi Via Yehova eci Embimbiliya li lombolola catiamẽla kovina vi keya kovaso yoloneke. Olombangi Via Yehova kavitãhi, ale oku yevelela kasapulo olondele, kuenda ka va kuete unene umue u likasi woku tukula eci ci keya kovaso yoloneke. Omo okuti va lilongisa Embimbiliya, va pondola oku ku sapuila ovina viwa Suku a sokiya oku ka linga kovaso yoloneke.