Embimbiliya li tu sapuila eci Yehova kuenda omõlaye Yesu Kristu va ka linga lohali ya kokiwa la Satana Eliapu. Olio li lombolola hati: “Omõla a Suku [Yesu] wa tukulukila oku nyõla ovilinga Vieliapu.” (1 Yoano 3:8) Oluali lulo okuti lu eyuka lika ocipululu, esuvu, kuenda evĩho, lu ka nyõliwa. Yesu wa likuminya okuti “ombiali yoluali lulo yi tundisua.” (Yoano 12:31) Omo okuti ovilinga viosi Vieliapu vi ka nyõliwa, ku keya oluali luokaliye luesunga muna mu ka kala lika ombembua.—2 Petulu 3:13.

Nye ci ka pita lomanu vana ka va yongola oku pongolola ekalo liomuenyo wavo haivo vamamako lovituwa viavo vĩvi? Sokolola kohuminyo eyi: “Vakuesunga va tunga vofeka, Vakuacili va tumalamo. Vakuakandu puãi va tundisua vofeka, kuenda vakuosuanji va veyuiwamo.” (Olosapo 2:21, 22) Ka ku ka kala vali ovilinga vĩvi viomanu. Noke omanu vakuepokolo va ka yovuiwa kupika wekambo lioku lipua va piñala.—Va Roma 6:17, 18; 8:21.

Voluali luokaliye, Suku o ka malako ndati evĩho? Ka ka ci linga poku imũla elianjo liomanu lioku linõlela eci va yongola oku linga okuti va kala ndomakina. Pole, o ka longisa omanu vakuepokolo olonjila viaye, loku va kuatisa oku pongolola ovisimĩlo viavo lovilinga viavo.

Nye Suku a ka linga lovilunga via siata oku iya ocipikipiki? Eye wa likuminya okuti ombiali Yusoma waye ndopo yi ka viala oluali. Soma Yusoma waco Yesu Kristu una wa nõliwa la Suku, o kuete unene woku sakula olombei. (Mateo 14:14) Eye o kuetevo unene woku tutuiya ovilunga. (Marko 4:35-41) Handi vali, ohali yina yi kokiwa la “cosi ciya ño ci veta ño” yi ka pua. (Ukundi 9:11) Vuviali wa Kristu, ovina vĩvi ka vi ka sakalaisa vali omanu.—Olosapo 1:33.

Nye ci popiwa kolohulukãi viomanu vana ka va kuete eko va siata oku fa? Yesu, osimbu ka pinduile ekamba liaye Lasaru wa popia hati: “Ame ndipinduko haime ndimuenyo.” (Yoano 11:25) Ocili okuti, Yesu o kuete unene woku pindula vana va fa!

Nda wa sanjukila ocisimĩlo cokuti ku keya oluali lumue ka mu ka kala vali ovina vĩvi vi talisa ohali omanu vawa, momo lie ku lingila esokiyo lioku tanga Embimbiliya oco o lilongise catiamẽla ku Suku yocili kuenda kocipango caye? Olombangi Via Yehova vi kasi posongo yove, vi ka sanjukila oku ku kuatisa oku sanga ukũlĩhĩso waco. Omo liaco, tu ku laleka oco o sandiliye Olombangi Via Yehova posongo yove ale o sonehela ava va sandeka o revista eyi.