Osapi Yo Koñoño | Anga hẽ Satana Omunu Muẽle?
Tu Sukila hẽ Oku Kuatela Usumba Satana?
Satana o kasi ndo monóxido de carbono—ka yi letiwe kuenda yi koka ohele
Ka ca lelukile oku ci limbuka. Omo okuti ka ci kuete ocivalo kuenda elemba, ci kuata omanu ocipikipiki. O monóxido de carbono ya siata oku ponda omanu valua voluali omo lioku vihĩsa ofela. Pole, ka ci sukila oku kuata usumba. Momo kuli olonjila vi ku kuatisa oku limbuka ofela yaco ya vĩha kuenda oku liteyuila. Omanu valua va siata oku kapa ovina vi va kuatisa oku lavulula loku limbuka ohele yaco.
Satana o kasi ndo monóxido de carbono, momo ka letiwe kuenda ca tĩla calua oku u limbuka haiye o koka ohele. Pole, Suku wa tu ĩha ekuatiso. Ove ku sukila oku kuatela usumba Satana nda wa kapako alungulo a kuãimo a eciwa la Suku:
Elianjo lioku nõla. Elivulu lia Tiago 4:7 li tu sapuila hati: “Tamalali Leliapu kuenje liu tili.” Ndaño okuti Satana o kuete unene, pole ka pondola oku ku kisika oku linga ovina ku yongola. Ove o kuete elianjo lioku nõla. Kelivulu lia 1 Petulu 5:9 tu tangako ndoco: “Pami lekolelo liene kuenje tamalali [Leliapu].” Ivaluka okuti Satana noke yoku seteka Yesu olonjanja vitatu, wo sia. (Mateo 4:11) Ove o pondolavo oku nõla oku tamalala layonjo a Satana.
Ukamba la Suku. Elivulu lia Tiago 4:8 li tu vetiya oku “Amẽla ku Suku.” Yehova oku laleka oco o kuate ukamba laye. O pondola oku ci linga ndati? Onjila yimue ya velapo yoku fetika oku ci linga, oku lilongisa ovina viatiamẽla kokuaye vi sangiwa Vembimbiliya. (Yoano 17:3) Ovina o lilongisa viatiamẽla ku Yehova vi ku vetiya oku u sola kuenje ocisola caco ci ka ku vetiya oku linga ocipango caye. (1 Yoano 5:3) Osimbu amamako oku pamisa ukamba wove la Isiove wokilu, eye o ka tambulula ndati? Tiago wa amisako hati, “[Suku] amela kokuene.”
Yehova eca ovina vi pamisa ekolelo oco o liteyuile
Ohuminyo yoku tu teyuila. Kelivulu Liolosapo 18:10 tu tangako ndoco: “Onduko ya Yehova ocikolo ca pama, ukuesunga o tililamo ha koki.” Eci ka ci lomboloka okuti onduko ya Suku yi kasi ndociteka cimue ceca osoloti. Pole, ci lomboloka okuti vana va sumbila onduko ya Suku, va pondola oku u vilikiya oco a va teyuile vapuluvi osi.
Oku lekisa ongangu yiwa. Elivulu Liovilinga 19:19, li tu sapuila ulandu womanu vamue ko Efeso veya oku linga Akristão. Ulandu waco u popia hati: “Ovimbanda vimue via nena alivulu avio, kuenje va a yokela kovaso avosi eci va tenda ondando yaco ya soka akui atãlo kolohuluwa violopalata.” * Akristão vaco va yoka ovikuata viosi viatiamẽlele kumbanda, ndaño via landiwile lolombongo vialua. Ongangu yaco yi pondola oku tu kuatisa calua koloneke vilo. Voluali lulo mu eyuka umbanda walua. Kuli ovikuata lovituwa vimue okuti ndaño ka via tiamẽlele kumbanda, pole vi pondola oku vetiya olondele lonjila yimue okuti ka tu ci limbuka. Omo liaco, yuvula ovina viaco komuenyo wove.—Esinumuĩlo 18:10-12.
Rogelio wa tukuiwa kocipama catete Cutala ulo Wondavululi, vokuenda kueci ci soka 50 kanyamo ka tavele okuti kuli Eliapu. Pole noke wa kũlĩhisa ciwa ovisimĩlo viaye. Momo lie? Rogelio wa popia hati, “noke nda landa Embimbiliya. “Oku kũlĩha Ovisonehua ca ndi kuatisa oku limbuka okuti, kuli Eliapu. Cilo, ukũlĩhiso waco u ndi teyuila oco si ka yapuisiwe latutu aye.”
“Oku kũlĩha Ovisonehua ca ndi kuatisa oku limbuka okuti, kuli Eliapu. Cilo, ukũlĩhiso waco u ndi teyuila oco si ka yapuisiwe latutu aye”
Ove hẽ o yongola oku mõla otembo Satana ka ka kalako vali? O pondola oku mõla otembo yaco. Ovisonehua vi tukula otembo eci Eliapu li kasi oku yapuisa omanu, li ka “imbiwa vociva condalu lofuofuo.” (Esituluilo 20:10) Ocili okuti, ondalu lofuofuo ka vi pondola oku nyõla ociluvo cimue cespiritu ka ci letiwe. Omo liaco, ociva condalu ci lomboloka enyõleho ka li pui. Satana ka ka kalako vali. Omanu vana va sole Suku, va ka kuata esanju lialua!
Omo liaco, amamako oku lilongisa ovina viosi viatiamẽla ku Yehova kuenda kocipango caye. * Sokolola otembo o ka kala komuenyo loku popia hati, “Satana keliko vali!”
^ Nda opalata yaco ya lombolokele olombongo vio ko Roma, vi sokisiwa lolombongo vioku feta ci soka 50.000 kolonalavayi veteke!
^ Oco o sange elomboluilo likuavo liatiamela ku Satana kuenda kumbanda, tanga ocipama 10 celivulu Embimbiliya li Longisa Nye? Pinga elivulu eli Kombangi ya Yehova ale li tangela vo www.pr418.com.
