Eric: Ndu ku sapuila okuti sia kapeleko calua etavo. Omo liaco, ndi sima okuti ka tu kuete calua coku sapela catiamẽla kondaka eyi.

Brian: Nda pandula omo wa ndi sapuilako. Onduko yange ame Brian. Ove helie?

Eric: Ame Eric.

Brian: Nda pandula omo tua likũlĩha, a Eric.

Eric: Lamevo.

Brian: Anga hẽ wa kulila vepata limue okuti vakuetavo?

Eric: Oco. Pole eci nda tunda konjo oku ka tangela kosikola ya velapo, nda liwekapo oku endaenda konembele.

Brian: Nda ci limbuka. Nye wa lilongisa kosikola yavelapo?

Eric: Nda lilongisa o sociais kuenda o historia. Tunde osimbu ndi sole calua oku lingisa o historia​—momo yi lombolola ulandu womuenyo womanu palo posi.

Brian: Ulandu waco u komohĩsa. Ndomo wa ci kũlĩha, Embimbiliya elivulu limue liovolandu. Ove hẽ, va konomũiso ove wa siata oku kongelamo Embimbiliya?

Eric: Sio. Ame nda kũlĩha okuti elivulu limue liwa, pole lalimue eteke nda simĩle okuti Embimbiliya elivulu limue liovolandu.

Brian: Ove, o moleha okuti wa loñoloha calua. Nda ongecelela, vakukutu amue atito hu lekisa amue pokati kovolandu ocili a sonehiwa Vembimbiliya.

Eric: Ciwa. Pole, si kuete Embimbiliya.

Brian: Ka kuli ocitangi. Ndu ku lekisa Vembimbiliya liange. Ulandu watete u sangiwa kelivulu 1 Asapulo ocipama 29, ovinimbu 26 kuenda 27. Ovinimbu viaco vi popia ndoco: “Daviti, omola a Jese, wa viala ko Isareli yosi. Oloneke viaye a viala ko Isareli via soka akũi akuãla kanyamo. Ko Hevirone, wa vialako anyamo epanduvali, ko Yerusalãi anyamo akui atatu la atatu.”

Eric: Nye ci lekisa okuti ulandu waco wocili?

Brian: Vamue va popia okuti Soma Daviti lalimue eteke a kaile komuenyo.

Eric: Ondaka eyi hẽ yocili muẽle? Momo lie va popela okuti ka kaile komuenyo?

Brian: Momo Embimbiliya olio lika li lombolola ulandu womuenyo wa Daviti. Pole, kunyamo wo 1993, ocimunga cimue ca vakuakulembulula ovina vio kosimbu, va sanga ewe limue liosimbu kua sonehiwa ondaka yimue yi lomboloka hati, “Onjo ya Daviti.”

Eric: Ci komohisa.

Brian: Omunu ukuavo wa tukuiwa Vembimbiliya okuti vamue va tatãla okuti wa kala komuenyo, Pondiu Pilato una wa vialele koloneke via Yesu. Eye wa tukuiwa kelivulu lia Luka kocipama 3, ocinimbu 1 pokati kolombiali vialua vikuavo vio kotembo yaco.

Eric: Oco, nda ci limbuka. Ulandu waco u lekisa okuti, “eci Pondiu Pilato a kala onguluvulu yo ko Yudea, haico Herode a viala ko Galilea.”

Brian: Ciwa. Vokuenda kuanyamo alua, olonoño vimue via kuatele  atatãhãi nda Pondiu Pilato wa kala muẽle komuenyo. Pole, ci pitahãla 50 kanyamo konyima kua sangiwa ewe limue kofeka yimue yoku Tundilo mua sonehiwa onduko yaye.

Eric: Haka! Ulandu owu lalimue eteke nda u yevele.

Brian: Nda sanjuka omo lioku vangula love catiamẽla kulandu waco.

Eric: Oku vangula muẽle ocili, nda sumbila Embimbiliya ndalivulu akuavo, pole lalimue eteke nda simĩle okuti li kuete esilivilo koloneke vilo. Nda kulĩha okuti mu sangiwa ulandu wocili, pole, ka u kuete esilivilo lialua.

Brian: Omanu valua va tava kondaka eyi. Pole, ame ñuete ovisimĩlo via li tepa. Esunga liange lieli: Tunde kosimbu ekalo lietu tumanu ka lia pongolokele. Otembo yosi tu sukila okulia, uwalo, kuenda olonjo. Olonjanja viosi tu sukila oku sapela la vakuetu kuenda oku kuata esanju vepata. Ove hẽ ku tava okuti, vosi yetu tua kapako ovina evi?

Eric: Ocili.

Brian: Embimbiliya li pondola oku tu kuatisa kolonepa evi viosi. Olio elivulu limue liosimbu, pole tu litenda okuti liokaliye.

Eric: Nye o yongola oku popia?

Brian: Linga ndi ci lombolole lonjila yimue ya leluka: Vembimbiliya mu sangiwa olonumbi via velapo vi kuete esilivilo koloneke vilo okuti, tunde eci via sonehiwa pa pita ale anyamo alua.

Eric: OCO hẽ, kolonepa vi pi?

Brian: Olonumbi Viembimbiliya vi pondola oku tu kuatisa kovina vimue ndeci: Oku kuata ovisimilo via sunguluka viatiamẽla kolombongo, oku kuata esanju vepata, ale oku kuata akamba vawa. Olio li kasi ndo mapa yi tu songuila ciwa. Ove hẽ ku tava okuti koloneke vilo ka ca lelukile oku kala ulume umue uwa usongui wepata?

Eric: Ocili, ndi tava kolondaka viove. Ame lukãi wange tunde eci tua kuela papita ale unyamo, pole ka ca lelukile oku litava tava kovisimĩlo.

Brian: Ocili muẽle. Pole Vembimbiliya mu sangiwa olonumbi via leluka vi pondola oku ku kuatisa. Kũlĩhĩsa handi elivulu lia va Efeso ocipama 5. Tu tangele kumosi kocinimbu 22, 23, kuenda 28. Nda o yongola o pondola oku tanga ovinimbu viaco.

Eric: Ciwa. Ovio vi popia ndoco: “Akãi, pokoli ku vaveyene ndeci ku Ñala. Omo ulume eye utue wukãi ndeci Kristu eye utue wekongelo, hailio etimba liaye, kuenje Kristu haeye upopeli walio.” Ocinimbu 28 ci popia hati: “Haico ca sesamela alume oku sola akãi vavo ndatimba avo muele. U o sole ukãi waye o lisole eye muele.”

Brian: Ciwa. Nda pandula. Haciliko hẽ okuti, nda ulume lukãi waye va kapako onumbi eyi va kuata esanju vepata?

Eric: Ndi sima siti, ocili. Ca leluka oku ci vangula pole, oku ci linga ca tĩla.

Brian: Ocili okuti, lomue wa lipua. Kocipama eci Cembimbiliya, tu sangako ocinimbu cimue ci tu vetiya oku lekisa esunguluko. a Volohuela, omunu lomunu o sukila oku lekisa esunguluko kuenda oku sumbila ohuminyo a linga. Ame lukãi wange tua limbuka okuti Embimbiliya li tu kuatisa oku lekisa esunguluko.

Eric: Ondaka eyi yocili.

Brian: Olombangi Via Yehova vi kuete Onumbi yo Internet mu sangiwa olonumbi viwa viatiamẽla kolohuela kuenda kepata. Nda wa panga, vakukutu amue atito ndu ku lekisa ovolandu a sangiwamo.

Eric: Ciwa, citava oku vi ndekisa.

Brian: Ciwa. Onumbi yo Internet yeyi, www.pr418.com. Eli emẽla lioku fetika.

Eric: Ndi sole alitalatu.

Brian: Oviluvialuvia evi vi lekisa upange woku kunda tu kasi oku linga koluali luosi. Kaliye, tua sangapo.  Onepa losapi hati, “Ekuatiso Kolohueli kuenda Olonjali.” Vombuelo yovipama evi mu sangiwa olosapi vialua vi teta onimbu vi lekisa ndomo ku potoluiwa ovitangi volonjila via litepa. Pokati kolonepa evi yi pi wa solapo?

Eric: Ciwa. “Oku Tetulula Ovitangi Volohuela Viove.” Ndi yongola oku kũlĩha ndomo ndi ci linga!

Brian: Ocipama eci ci lekisa atosi akuãla a kuatisa oku potolola ovitangi. Tala ocinimbu eci. A Eric, citava okuti o ci tanga?

Eric: Citava. “Oku sapela ciwa volohuela ku sokisiwa losonde vetimba, kuenje ocisola lesumbilo ci sokisiwa lutima kuenda apuvi.” Haka! Nda sola elomboluilo liaco.

Brian: Nda pandula omo wa tanga. Ocinimbu eci Cembimbiliya ca tukuiwa palo. O pondola oku ci yikula, poku toma kilu liaco.

Eric: Ciwa, ca ndomboloka. Efeso 5:33. Oco ci popia hati: “Omunu omunu a sole ukãi waye ndeci a lisole eye muele. Ukãi layevo a sumbile veyaye.”

Brian: Ove hẽ wa limbuka ondaka yavelapo yokuti omunu lomunu o sukila oku eca eci ukuavo a lavoka oku tambula?

Eric: Eci wa popia ka ca ndombolokele.

Brian: Haciliko hẽ okuti, ulume o yongola oku sumbiwa lukãi waye kuenda ukãi o yongolavo oku limbuka okuti o soliwe la veyaye?

Eric: Ocili. Ndi tava kondaka yaco.

Brian: Nda ulume o likosilako oku sanda apuluvi oku lekisa ocisola kukãi waye, ka ci leluka hẽ kukãi oku lekisa esumbilo kokuaye?

Eric: Ndi sima siti, nda ci kuatisa.

Brian: Ocinimbu eci Cembimbiliya ndaño okuti tunde eci ca sonehiwa papita ale 2.000 kanyamo, handi ci kuatisa kolonepa via litepa volohuela kuenda ceca olonumbi vi kuete esilivilo okuti, nda via kapiwako vi kuatisa. Kuenje “utima kuenda apuvi” ovolohuela a ka amamako luhayele ndomo ca lomboluiwa vocindekaise catete.

Eric: Cilo ndi tava okuti, ovisimĩlo nda kuatele viatiamẽla Kembimbiliya via pongoloka.

Brian: Eric, nda sanjuka poku yeva ocisimĩlo cove. Ndi yongola okuti keteke likuavo ndi tiuka oco tu sapele eci catiamẽla kosapi yi popia hati “Ananga Akuãla a Kuatisa Oku Potolola Ovitangi” a lekisiwa vocipama cimuamue vonumbi yetu yo Internet. b

Eric: Ciwa. Ame lukãi wange, tu ka kũlĩhisila kumuamue onepa yaco.