Nda kulila ko Ancram vimbo limue litito, vocakati co Nova Yorke, ko Estados Unidos. Imbo liaco lia li tumbikile calua koku kanda asenjele. Ocili okuti, vimbo liaco mua kala olongombe vialua okuti omanu ci sule.

Omo okuti vimbo liaco mua kala lika onembele yimosi, epata liange omo lia enda oku ka fendela. Vovialumingu lomẽle, sekulu yetu wa enda oku puenya olo sapato viange oco ngende komisa ya Calumingu Lembimbiliya limue litito liyela inakulu yange a nyihile. Ame la vamanjange tua longisiwa oku talavaya calua, oku lekisa esumbilo, oku kuatisa vana tu lisungue lavo kuenda oku eca olopandu omo liasumũluho tu kuete.

Eci nda kula nda tunda konjo kuenje nda linga ulongisi wo kosikola. Nda kuatele a apulilo alua a tiamẽla ku Suku kuenda komuenyo. Vamue pokati kolondonge viange va loñolohẽle calua. Vakuavo ndaño ka va loñolohẽle, pole va enda oku likolisilako. Vamue va kala ovilema, vakuavo sio. Ocitangi caco, nda ci tendele ndocina cimue ka ca sungulukile. Olonjanja vimue, olonjali violondonge viange ka va loñolohẽle, va enda oku popia ndoco: “Eli olio ekalo Suku a yonguila komolange.” Nda enda oku komoha esunga lieci Suku a ecelelela okuti oloñaña vimue vi citiwa lulema. Handi vali, oloñaña ka via lingile cimue cĩvi.

Nda li pulavo ndoco ‘Ocina cipi cikuete esilivilo ndi sukila oku linga komuenyo wange?’ Nda kala ndu okuti omuenyo wange wa kala oku pita lonjanga. Nda kulila vepata limue liwa, nda tangela kolosikola viwa kuenda nda kala oku linga upange ndi sole calua. Pole, omuenyo wange wosi wa molehẽle okuti ka u kuete esilivilo. Nda yonguile oku kuela, oku kuata onjo ya posoka, oku kuata omãla, loku amamako oku talavaya toke eci ndi iñila vanyamo epuyuko kupange, noke ndi ilukila konjo yoku tatela ava vakuka. Nda enda oku li pula nda kuli vali cimue ndi sukila oku linga komuenyo.

Kotembo yimue yowuya, ame kumue lakamba vamue vo kupange tua endele ko Europa. Tua endele ko Abadia ko Westminster, Notre-Dame ko Paris, ko Vaticano kuenda kolonembele vitito. Kolonepa viosi tua endele, nda yonguile oku kũlĩha a tambululo apulilo ange. Eci nda tiuka konjo ko Sloatsburg, Nova Yorke, nda nyula olonembele vialua. Pole, lomue wa tẽla oku eca atambululo a mbetiya.

 Eteke limue, ondonge yange kosikola yi kuete 12 kanyamo, yeya kokuange yu ya ndinga apulilo atatu. Tete, wa mulisa nda nda kũlĩhile okuti eye Ombangi ya Yehova. Ndo kumbulula siti, oco. Vali, wa mulisa nda njongola oku kũlĩha eci catiamẽla Kolombangi Via Yehova. Ndo sapuilavo siti oco. Tatu, wa mula oku ndi kasi. Eci ndo sapuila onumbi yonjo yange, tua limbuka okuti, tua lisunguile lepata liaye. Vokuenda kuotembo yimue nda limbuka okuti, apulilo atatu kafeko a ndinga, a pondola oku pongolola omuenyo wange.

Ka pa pitile otembo yalua, eye weya losikaleta toke konjo yange kuenje wa fetika oku ndongisa Embimbiliya. Ndo pulisa apulilo nda lingile ale kasongui valua vetavo. Eye wa ndekisa a tambululo asuapo hao a sunguluka Vembimbiliya liange​—ana okuti lalimue eteke nda a yevele.

Eci nda lilongisa Vembimbiliya ca ndi sanjuisa. Nda vetiyiwa calua eci nda tanga elivulu lia 1 Yoano 5:19 lia lekisa okuti, “oluali luosi lu kasi povaka eliapu.” Nda vetiyiwa poku lilongisa okuti, Suku hayeko wa siata oku tu kokela ovitangi pole Satana​—kuenda Suku o ka malako ovitangi viaco viosi. (Esituluilo 21:3, 4) Nda limbuka okuti, ca leluka oku kuata elomboloko Liembimbiliya eci li lomboluiwa lonjila yimue yasuapo. Ndaño okuti Ombangi ya Yehova ya kala oku ndongisa ya kuata lika 12 kanyamo, pole nda limbuka okuti, u o kasi oku ku longisa nda omõla ale sio, ocili, ocili muẽle.

Ndaño ndoco, nda yonguile oku limbuka nda Olombangi Via Yehova via kapako ovina va kunda. Kafeko wa lombolola okuti Akristão vocili va lekisa ovituwa ndeci epandi kuenda ohenda. (Va Galatia 5:22, 23) Kuenje nda nõlapo oku u seteka oco ndi tale nda o lekisa ovituwa viaco. Eteke limue nda cilua ocipango poku lilongisa Embimbiliya. Kuenje nda li pula ndoco: ‘Anga hẽ o ka nalamẽla? Nda oco, o ka sumua omo nda cilua?’ Eci nda kala oku iñila, nda mola okuti eye wa kala oku nalamela konjo yange. Weya lolupesi kekãlu liange loku popia hati: “Nda nda lupukila konjo oku ka sapuila inange okuti tu sukila oku telefonalela kolosipitali kuenda kakuenje velombe, oco tu kũlĩhise nda o kasi ciwa, momo lalimue eteke wa ciluile kelilongiso lietu. Ca ndi sakalaisa calua!”

Vepuluvi limue, nda linga epulilo, nda simĩle okuti ka ca lelukile komõla umue o kuete 12 kanyamo oku eca etambululo liaco. Nda yonguile oku limbuka nda eye o li sandela etambululo limue. Eci ndo linga epulilo liaco eye wa mbanja sũi kuenje wa popia hati: “Epulilo eli lia tĩla calua. Ndi lisoneha kuenda ha pulisa olonjali viange.” Konjanja yikuavo kelilongiso lietu, wa nena Utala Wondavululi mua kala etambululo liepulilo liange. Eci ca mbetiya oku amẽla Kolombangi Via Yehova​—momo alivulu avo a tambulula apulilo ange osi lekuatiso Liembimbiliya. Nda amamako oku lilongisa lumalẽhe waco, noke liunyamo umosi, nda linga Ombangi ya Yehova poku papatisiwa. a

Eci nda sanga atambululo a suapo atiamẽla kapulilo ange, nda yonguilevo oku sapuilako vakuetu. (Mateo 12:35) Kefetikilo epata liange ka lia tavele konjila yo kaliye nda nõlapo. Vokuenda kuotembo ovo va pongolola ovituwa viavo. Eci mãi a kala oku panda kolofa, wa fetika oku lilongisa Embimbiliya. Ndaño okuti ka kaile otembo yalua komuenyo oco a papatisiwe, nda kolela okuti eye wa nõlelepo oku vumba Yehova.

Kunyamo wo 1978, nda kueliwa Lombangi yimue ya Yehova londuko Elias Kazan. Kunyamo wo 1981, ame la Elias tua lalekiwa oku ka panga onepa kepata lio Betele ko Estados Unidos. b Ca ndi sumuisa, omo okuti tua vumbila lika kumosi anyamo akuãla, noke Elias wa fa. Ndaño lumbumba, nda amamako locikele cange ko Betele, kuenje eci ca nyĩha ongusu yoku tiamisila utima kupange wange, kuenda ca ndi pamisa.

Kunyamo wo 2006 nda kueliwa la manji Richard Eldred, o panga onepa kepata lio Betele. Richard lame tu kasi oku amamako oku talavaya lesanju ko Betele. Oku kũlĩha ocili catiamẽla ku Suku, ca ñuatisa oku limbuka okuti, sia sangele lika a tambululo nda yonguile, nda sangavo elomboloko lia suapo liomuenyo​—pole cosi ca fetika lapulilo atatu kafeko a ndinga.