Anga hẽ Suku o ka ecelela okuti, omanu va amamako oku kangisa vakuavo loku kapa kohele ekalo liomuenyo wavo otembo ka yi pui? Sio, ndomo tua ci mola, eye o ka malako uhukũi lohali yosi. Ululiki womanu kuenda wongongo o yongola okuti, ove o kũlĩha otembo eye a ka sombisa. Wa situlula ndati ukũlĩhĩso waco?

Kũlĩhisa ocindekaise eci: Eci o linga ungende lekãlu, o konomuisa ono yo Internet, o mapa kuenda olondimbukiso vi sangiwa vetapalo. Kuenje eci omola olondimbukiso viaco vi lekisa kocitumãlo wa loña, o kuata ekolelo liokuti o kasi ocipepi. Cimuamue aco, Suku wa tu ĩha Ondaka yaye, yi situlula ovina vi kasi oku pita voluali. Eci tu mola ndomo ovina viaco vi kasi oku tẽlisiwa, tu kuata ekolelo liokuti, esulilo li kasi ocipepi.

Embimbiliya li lombolola okuti, ovina viosi vi kasi oku pita voluali vi ka kuata esulilo liavio. Otembo yaco ku ka kongeliwa ovolandu oluali kuenda ku ka pita ovina okuti lalimue eteke via pitile voluali. Kũlĩhisa ovolandu amue a tukuiwa Vondaka ya Suku.

1. OVOLANDU A KOMOHĨSA VOLUALI Ocitumasuku cimue ca tukuiwa kelivulu lia Mateo ocipama 24, ca lombolola ovolandu oluali a lekisa ondimbukiso yoloneke via sulako. Ovina viaco vi lekisa ‘ondimbukiso yesulilo lioluali’ kuenje “esulilo liya.” (Ocinimbu 3, 14) Vovina viaco mua kongela alikolisilo a songui vatavo oku yapuisa omanu, ovoyaki, onjala, oku livokiya kuevĩho, oku pola kuocisola comanu kuenda ovilemawe kuiñi kuiñi. (Ocinimbu 6-26) Ocili okuti, tunde eci ovolandu aco a fetika pa pita ale ovita vialua vianyamo. Osimbu esulilo li kasi ocipepi, oloneke viohali vi ka amamako. Ovina viaco vi ka kuamiwavo lolondimbukiso vikuãimo.

2. OVITUWA VIOMANU Embimbiliya li popia okuti “koloneke via sulako”​—osimbu oloneke vi panda kesulilo—​ovituwa vĩvi viomanu vi ka panga onepa kondimbukiso. Tu tangako ndoco: “Omanu va linga vakuakulisola, vakuakusola olombongo, vakuakulipandiya, vakueyengu, vakuakatombangunja, haivo va siñaila olonjali viavo, vakualutukãi, ka va kuete efendelo, ka va kuete ocikembe la vangadiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa, haivo olomakuli, vakuacipango, vakuepela, vakuakusola ca lua esanju, Suku ci sule.” (2 Timoteo 3:1-4) Ocili okuti, ekambo liesumbilo liomanu hacituwako cokaliye, pole, ca laikele oku li vokiya kuenje otembo yaco yi tukuiwa hati, “otembo yohali.” Wa limbuka ale ocituwa caco pokati komanu?

3. OKU NYÕLIWA KUONGONGO Embimbiliya li lekisavo okuti Suku o ka ‘nyõla ava va nyõla ongongo.’ (Esituluilo 11:18) Omanu va kasi oku nyõla ndati ongongo? Oloneke vietu vi sokisiwa loloneke via Noha: “Oluali lua vĩha ku Suku, hailuo lue yuka letombo. Suku yu wa vanja voluali kuenje wa limbuka okuti mua vĩha.” Noke Suku wa sapuila omanu vakuavituwa vĩvi hati: ‘Ndi va nyola.’ (Efetikilo 6:11-13) Ove hẽ wa siata oku limbuka ovina vi lekisa okuti voluali mueyuka ungangala? Handi vali, omanu va pitĩla petosi limue lia kãla: Ovo va kuete unene woku nyõla oluali, poku nyõla omuenyo womanu vosi. Ovo va kuete ovimalẽho  viuyaki. Handi vali, ongongo yi kasi oku nyõliwa volonjila vikuavo. Ovina vi kuatisa omuenyo ndeci​—ofela tu fuima, ovinyama, ovikũla, o kalunga—​vi kasi oku nyõliwa omo lioku viala kũvi kuomunu.

‘Anga hẽ kocita ca pita, omanu va kuatele unene woku nyõla ongongo yosi?’ Pole, omanu va lekisa unene waco omo okuti ovimalẽho vioku nyõla ekalo lioluali vi kasi oku amamako. Oku livokiya kuloño, kua siata oku kuatisa omunu oku sanga elomboloko ale oku limbuka ovitangi vi yililako. Pole, elavoko liongongo ka li kasi peka liomunu. Osimbu handi omuenyo ka wa nyõliwile, Suku o ka nyõla vosi va kasi oku nyõla ongongo. Eyi oyo ohuminyo yaye!

4. UPANGE WOKU KUNDA VOLUALI Onepa yikuavo yondimbukiso yesulilo yatiamẽla kupange wa laikele oku lingiwa: “Ondaka eyi yiwa Yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:14) Upange waco woku kunda wa litepa calua lowu u kasi oku lingiwa latavo alua vokuenda kuanyamo. Vokuenda kuoloneke via sulako, esapulo lia siata oku kundiwa vali enene, “ondaka eyi yiwa yusoma.” Ndomo wa ci kũlĩha, etavo lipi lia velisapo esapulo liaco? Nda vamue va kasi oku kunda esapulo liaco, anga hẽ va panga onepa kocisoko cimue copocitumãlo, ale va siata oku kundila esapulo liaco, “kuoha koluali, ha yi lingi uvangi kolofeka viosi”?

Onumbi yo Internet www.pr418.com yi sandeka “ondaka eyi yiwa yusoma.” Vonumbi yaco mu sangiwa alivulu a lombolola esapulo liaco kueci ci pitahãla 700 kalimi. Ove hẽ wa kũlĩha eliangiliyo likuavo lia velisapo upange woku kunda olondaka Viusoma oco u li sanduile kolonepa viosi violuali? Osimbu handi Olombangi Via Yehova ka via fetikile oku talavaya lo Internet, ovio via kũlĩhiwile ale omo lialikolisilo avo oku sandeka olondaka viwa Viusoma wa Suku. Tunde kunyamo wo 1939 oñoño yo revista Utala Wondavululi yi lekisa olondaka, “Wusapula Usoma wa Yehova.” Elivulu limue livangula catiamẽla katavo lia lombolola hati, oku livokiya kupange woku kunda wa siata “oku lingiwa Lolombangi Via Yehova ka u sokisiwa.” Uvangi waco ukuatisa kesapulo liwa liokuti, “ndopo esulilo liya” lekuatiso Liusoma wa Suku.

Wa limbuka hẽ okuti olondimbukiso vikuãla Viembimbiliya via tukuiwa vocipama cilo via siata oku tẽlisiwa komuenyo wove? Vokuenda kueci ci pitahãla ocita canyamo orevista yilo ya siata oku sandeka kuvakuakutanga ovolandu  a tiamẽla kovina vi kasi oku pita voluali oco yi va kuatise oku limbuka okuti tu kasi koloneke via sulako. Pole, vamue va patãla poku sima okuti ovina viaco viuhembi. Ovo va siata oku popiavo hati, osimbu uloño woku sapela u livokiya, ovina vĩvi voluali via amamako oku livokiya. Pole, kuli uvangi u lekisa okuti, tu kasi kesulilo lioluali lulo.

Olonoño vimue via limbuka okuti tu lavoka apongoloko alua vongongo. Kunyamo wo 2014, okokanda kamue kolonoño vina vi konomuisa ovina viatiamẽla katenda kuenda Kocisoko coku kolapo, ka lungula olo Nações Unidas catiamẽla kovina vi kapa kohele ekalo liomanu. Olonoño viaco via popia hati: “Akonomuiso aco a eca uvangi wokuti, ovina vi kapa kohele omuenyo vi kasi oku li vokiya.” Omanu valua va limbuka okuti tu kasi kotembo yohali voluali. Vakuakusandeka orevista yilo kuenda vakuakutanga, va limbuka okuti tu kasi koloneke via sulako kuenda esulilo li kasi ocipepi. Ku sukila oku kuata usumba omo liovina vi keya kovaso yoloneke pole, o sukila oku sanjuka. Momo lie? Momo o pondola oku puluka kesulilo lioluali!