Nda kulila volupale luo Montreal, okuti omuenyo ka wa lelukile. Eci nda kuata olosãi epandu isia yange wa fa, kuenda ina yange eye wa kala oku tẽlisa ovikele viosi viovonjo. Pokati komãla ecelãla, ame kuasula.

Osimbu nda kala oku kula, oloneke viosi nda solele calua oku fenya olodroga, oku imba ocela cosande, ungangala loku li kongela lolongangala vikuavo. Eci nda tẽlisa ci soka ekuĩ kanyamo, nda enda oku feta olombongo vowotele oco ndi linge upuepue kuenda oku nyana. Nda kembaile olonjanja vialua kuenda nda kuatele olonjila vialua vioku ci linga oco ndi nyane ovina viomanu. Ca kala ndoku fenya olodroga.

Eci nda tẽlisa 14 kanyamo, nda sanda olonjila vikuavo vioku kemba omanu. Nda landaile olololosio vialua, ovinunga, kuenda olonẽla loku kemba okuti viulu, loku vi landisa volokololo kuenda povitumãlo violovenda vinene. Kokuange ca lelukile oku kuata olombongo. Eteke limue, veteke limosi nda kuata eci ci soka 10.000 kolodolare!

Eci nda kuata 15 kanyamo nda tundisiwa kosikola, kuenda sia kuatele ocitumãlo coku kala. Nda enda oku lala voluayela, volo parke kuenda kolonjo via kamba.

Omo okuti nda kala ondiandia, olonjanja vialua nda enda oku pulisiwa lakuenje velombe. Omo okuti sia kalele oku landisa ovina via nyaniwa, sia la kapiwa vokayike. Nda enda oku kisikiwa oku feta omo lielinga livĩ, lioku kala ondiandia, oku landisa ovina ka vi silivila komanu kuenda omo sia kuatele ocicapa ci ngecelela oku landisa. Poku kemba sia kuatele usumba lomunu laumue. Eci ca kapaile omuenyo wange kohele kuenje olonjanja vimue nda ambataile uta. Pole olonjanja vimue nda nyanaile vapuluvi ana okuti omanu ka va ci limbuka.

Nda fetika oku lilongisa Embimbiliya eci nda kuata 17 kanyamo. Kotembo yaco, ukãi nda kala laye okuti sia tokekisile laye olohuela, wa fetika oku lilongisa Embimbiliya Lolombangi Via Yehova. Omo okuti sia tavele kolonumbi Viembimbiliya, nda  litepa lukãi waco, kuenje, nda nõlapo oku kala lukãi ukuavo nda kala oku namulãla laye.

Ocina ca mbetiya vali ceci okuti ufeko wavali nda kala laye wa fetikavo oku lilongisa Embimbiliya Lolombangi Via Yehova! Eye wa linga apongoloko komuenyo waye, kuenda nda komoha eci eye a fetika oku lekisa umbombe lepandi. Nda tava kelaleko lioku enda Vonjango Yusoma Yolombangi Via Yehova. Nda yoleliwa lomanu va wala ciwa kuenda vasumbila vakuavo. Ca litepa calua loluali nda kũlĩha! Siala sumbiwa lepata liange, kuenda eci nda kala omõla sia kapiwileko. Ocisola Olombangi Via Yehova via lekisa kokuange, oco nda sukilile. Eci Olombangi Via Yehova via ndi laleka oku lilongisa Embimbiliya, nda tava lesanju.

Eci nda lilongisa Vembimbiliya ca popela omuenyo wange. Ame lakamba vange vavali tua lingile esokiyo lioku ka nyana, oco ndi fete ofuka yange, yeci ci soka 50.000 kolodolare. Pole, nda linga ciwa omo sia tavele! Akamba vange va endele ko ku nyana. Pole, umue pokati kavo wa kapiwa vokayike kuenda ukuavo wa pondiwa.

Osimbu nda kala oku amamako oku lilongisa Embimbiliya nda limbuka okuti nda sukilile oku linga apongoloko komuenyo wange. Nda lilongisa eci Embimbiliya li popia kelivulu lia 1 Va Korindo 6:10 ku popia okuti: “Lovimunu, la vakuacipululu, loloholua, la vakuakuimbula lolondiandia, ka va piñala Usoma wa Suku.” Eci nda tanga ocinimbu caco, nda fetika oku lila poku sokolola ovitangi viange. Noke nda limbuka okuti nda sukilile oku linga apongoloko komuenyo wange. (Va Roma 12:2) Ame nda kala ongangala kuenda omuenyo wange wosi wa kunamẽlele lika kuhembi.

Poku lilongisa Embimbiliya nda lilongisa okuti Yehova ukuahenda haiye ukuakuecela. (Isaya 1:18) Nda likutilila ku Yehova oco a ñuatise oku siapo omuenyo wange wosimbu. Lekuatiso liaye nda fetika oku linga apongoloko komuenyo wange. Ocina ci kuavo ca ndi sanjuisa ceci ame lukãi wange tua tokekisa olohuela vietu.

Eci nda kuata 24 kanyamo tua kuatele omãla vatatu. Cilo nda sanga upange umue wa sunguluka. Nda kuatele uloño utito momo sia lilongisile calua. Ñasi oku amamako oku likutilila ku Yehova. Noke nda sandiliya upange. Nda sapuila vacime cupange okuti njongola oku linga apongoloko komuenyo wange kuenda oku linga upange umue wa sunguluka. Nda lombolola okuti nda kala oku li longisa Embimbiliya, nda lekisa onjongole yange momo ndi yongola oku kala omunu uwa. Valua vacime cupange, ka va tavele oku nyiha upange. Noke lioku situlula omuenyo wange wosimbu, eci nda kala oku pulisiwa onjanja yikuavo, ulume wa kala oku mulisa wa popia hati: “Sia kũlĩhile esunga liaco, pole, utima wange u kasi oku mbetiya oku tava kepingilo liove.” Nda limbuka okuti, eci ca kala etambululo liolohutililo viange. Noke liotembo yimue, ame lukãi wange tua papatisiwa kuenje tua linga Olombangi Via Yehova.

Toke etali ñasi lomuenyo omo lioku kapako olonumbi Viembimbiliya kuenda oku ambata omuenyo u li tava locipango ca Suku. Ndi kuete epata limue liwa. Nda limbuka okuti Yehova wa ngecela, omo liaco ñuete utima wa yela.

Pa pita ale ci soka 14 kanyamo tunde eci nda fetika upange wotembo yosi, loku kuatisa omanu leci Embimbiliya lilongisa. Kuenda ukãi wange wa likongela kokuange kupange wotembo yosi. Toke cilo, pa pita ale ci soka 30 kanyamo kuenda nda kuatisa ale eci ci soka 22 kakamba vange tua talavayele kumosi kupange woku sanga eteku, oco va kale Olombangi Via Yehova. Toke cilo nda siata oku enda kolovenda vinene, pole, si endiko locimãho coku ka nyana​—ndeci kosimbu. Eci ngendako, sapuila vakuetu catiamẽla kekolelo liange. Kaliye nda siata oku eca cimue kokuavo: Elavoko lioku kala voluali luo kaliye palo posi, muna ka mu ka kala vali olondiandia.​—Osamo 37:10, 11.