OMO okuti ondaka “antikristu” ya siata oku tiamisiwila kovina vialua tunde kosimbu, ca sunguluka oku pula hati: Antikristu helie? Anga hẽ ondaka yaco yi tiamisiwilavo kovina tu linga koloneke vilo? Ocili okuti tu pondola oku fetika oku sandiliya ondaka antikristu Vembimbiliya, muna okuti oyo yi molẽha olonjanja vitãlo.

Pokati kasonehi vosi Vembimbiliya upostolo Yoano eye lika wa tukula ondaka “antikristu.” Nye a popia catiamẽla ku antikristu? Kũlĩhĩsa olondaka evi vukanda watete wambata onduko yaye: ‘Amãla, vilo ovio oloneke viesulilo. Ndeci wa yevi okuti antikristu iya, haico ci kasi, kuenje va antikristu va lua veya ale. Oco tua limbuka okuti vilo ovio oloneke viesulilo. Va tunda pokati ketu puãi ka va kaile vetu . . . Ohembi elie, te u wa likala hati, Yesu heyeko Kristu? U o likala Isia la Mõla eye muẽle antikristu.’​—1 Yoano 2:18, 19, 22.

Nye tu lilongisa kolondaka viaco? Yoano poku tukula “va antikristu va lua,” wa lekisa okuti ondaka antikristu, ka yi tiamisiwila lika komunu umosi, pole yi tiamisiwila komanu valua. Omanu ale ovisoko vi panga onepa ku antikristu, va sandeka uhembi, va likala Yesu okuti hayeko Kristu ale Mesiya kuenda va seteka oku pengisa ukamba u kasi pokati ka Suku kuenda Omõlaye, Yesu Kristu. Vana va panga onepa ku antikristu va likala oku songuiwa la Kristu ale lolonumiwa viaye, omo okuti “va tunda pokati ketu,” kuenda ka va siatele oku kapako alongiso ocili Cembimbiliya. Handi vali, eci Yoano a soneha ukanda waye, ‘kelivala lia sulako’ ocisoko caco ca kalako ale kuenda citava okuti via kala oloneke via sulako viovapostolo.

Nye Yoano a soneha vali catiamẽla ku antikristu? Catiamẽla kovaprofeto vesanda, wa lungula hati: “Espiritu liosi li tava okuti Yesu Kristu weya letimba olio Espiritu lia tunda ku Suku. Espiritu liosi ka li tava okuti Yesu Kristu weya letimba olio halia Sukuko, puãi lia antikristu. Wa ci yevi okuti liya, cilo puãi li kasi ale voluali.” (1 Yoano 4:2, 3) Vukanda waye wavali Yoano wa pitulula etosi liaco poku popia ndoco: “Olondimbiki via lua via sandukila voluali. Ka vi tava okuti Yesu Kristu weya letimba. Omunu o longisa ndomo eye ondimbiki, haeye antikristu.” (2 Yoano 7) Ocili okuti Yoano wa kuata elomboloko liokuti, ondaka antikristu yi tiamisiwila ku vosi okuti locipango cavo muẽle, va sandeka ovohembi atavo atiamẽla ku Yesu Kristu kuenda kalongiso aye.

Osimbu handi Yoano ka sonehele catiamẽla kolondimbiki viatavo, Yesu wa lungula olondonge viaye poku popia hati: “Lunguki lovaprofeto vesanda, vana veya kokuene luwalo wolomeme,  puãi vokati kavo va linga ovimbungu vi kukulula.” (Mateo 7:15) Upostolo Paulu wa lungula Akristão vo ko Tesalonike poku popia ndoco: “Lomue ka ko kembi, momo eteke liaco ka liya te tete olukonyo lueya, kuenje omunu wekandu o tukuluka, eye omõla enyõleho.”​—2 Va Tesalonike 2:3.

Ovaprofeto vesanda kuenda olonanguluke va kala ale kocita catete, locimãho coku seteka oku nyõla ekongelo Liakristão. Vosi vana va siata oku sandeka ovohembi atiamẽla ku Yesu Kristu kuenda olondimbiki viatavo, va kongeliwa vondaka Yoano a popia yokuti “antikristu.” Ndomo Yehova a va tenda, ca situluiwa eci Paulu a va tukula hati, “omõla enyõleho.”

Nye ci popiwa koloneke vilo? Omanu kuenda ovisoko vi panga onepa ku antikristu, va kasi oku amamako oku patãla Kristu kuenda alongiso aye. Ovo locipango cavo muẽle va sandeka ovohembi kuenda alundi akuavo locimãho coku vetiya omanu oco ka va ka tẽle oku tepisa Isia, Yehova Suku kuenda Omõlaye, Yesu Kristu. Tu kuete esunga lioku likala oku tava kovohembi aco atavo. Tu kũlĩhisi ovolandu avali.

Vokuenda kuovita vialua vianyamo, ovohembi atavo atiamẽla kelongiso lia Suku umosi muvatatu, a lekisa okuti Isia kuenda Omõla vamuamue. Olo antikristu ka va longisa ocili catiamẽla ku Yehova Suku kuenda ku Yesu Kristu. Ovohembi aco a tateka omanu va kuavitima via sunguluka oku setukula Yesu Kristu kuenda oku amẽla ku Suku, ndomo Embimbiliya li ci vetiya.​—1 Va Korindo 11:1; Tiago 4:8.

Atavo a vokiya atatahãi poku vetiya omanu oku tanga lika Ambimbiliya ana okuti onduko ya Suku, Yehova yopiwamo. Va ci linga ndaño okuti onduko ya Yehova yi sangiwa Vovisonehua viatete ci soka 7.000 kolonjanja. Nye ceyililako? Ka ca lelukile oku limbuka Suku yocili.

Handi vali, oku kũlĩha onduko ya Suku, Yehova, ca siata oku kuatisa omanu valua vakuotima wa sunguluka oku linga ukamba la Suku. Ulandu ukuãimo wa Richard, wa ivaluka eci a sapela Lolombangi vivali Via Yehova. Eye wa lombolola okuti: “Eci va ndekisa Vembimbiliya okuti onduko ya Suku, Yehova, nda komoha poku limbuka okuti Suku o kuete onduko, momo lalimue eteke nda yevele ondaka eyi.” Oku upisa keteke liaco, eye wa linga apongoloko komuenyo waye, oco ambate omuenyo u likuata lolonumbi Viembimbiliya, kuenda oku sivaya Yehova. Eye wa amisako hati: “Oku kũlĩha onduko ya Suku ca ñuatisa oku linga ukamba laye.”

Vokuenda kuanyamo, u antikristu wa siata oku kapa omanu valua vupeke konepa yespiritu. Pole, poku lilongisa Ondaka ya Suku, Embimbiliya, tu pondola oku kũlĩha eci ci lomboloka antikristu, oku yuvula oku kuama ovohembi atavo kuenda alundi avo.​—Yoano 17:17.