Yovi wa kũlĩhĩwile ndomunu umue “wa pua etondelo haeye ukuesunga.” (Yovi 1:1) Lote wa tukuiwa okuti ulume umue “ukuesunga.” (2 Petulu 2:8) Daviti wa tendiwile ndomunu wa linga “eci ca sunguluka” kovaso a Suku. (1 Olosoma 14:8) Omo liaco, tu kũlĩhĩsi Vembimbiliya ulandu womanu va tukuiwa ndeti. Poku ci linga tu limbuka okuti, (1) va lingavo ovina ka via sungulukile, (2) tu pondola oku lilongisa ovina vialua kongangu yavo kuenda (3) omanu vana ka va lipuile va pondolavo oku sanjuisa Suku.

Yovi wa liyakavo lovitangi vialua via molehẽle ndekambo liesunga. Eye wa kala locisimĩlo ka ca sungulukile cokuti, Suku ka yonguile oku u tata ndaño wa kala oku lekisa ekolelo Kokuaye ale sio. (Yovi 9:20-22) Yovi wa pitisile calua kovaso ekolelo liaye, momo komanu vakuavo ca molẽha ndu okuti esunga liaye olio lia velelepo, lia Suku li sule.—Yovi 32:1, 2; 35:1, 2.

Lote wa likala oku nõla onjila yimue ya leluka. Eye wa sumuĩle omo liovina ka via sungulukile  via enda oku lingiwa lomanu vana va kala vimbo lio Sitomo kuenda lio Gomora kuenje, “co vala kutima waye wesunga.” (2 Petulu 2:8) Suku wa popele okuti wa yonguile oku nyola ovaimbo aco avĩ kuenda wa eca ku Lote lepata liaye epuluvi lioku popeliwa. Citava okuti ove osima ndoco, Lote omo liesakalalo eye nda wa tunda tete. Vepuluvi liaco liesakalalo eye wa tulile utima. Ovangelo va tumiwile oco vo popele kumue lepata liaye va va kuata vovoko loku va tuala kosamua yo lupale oco va puluke.—Efetikilo 19:15, 16.

Daviti eteke limue ka tẽlele oku likandangiya kuenje wa linga ukahokolo lukãi ulume ukuavo. Daviti oco a limbike ekandu liaco, wa ponda ulume ukãi waco. (2 Samuele ocipama 11) Embimbiliya li lekisa okuti “eci ca linga Daviti ca sumuisa Yehova.”—2 Samuele 11:27.

Yovi, Lote kuenda Daviti, vosi yavo va linga ovina ka via sungulukile, vimue via piãla enene. Pole, tu ka kũlĩhĩsa nda va likekembela kuenda va nõla oku vumba Suku lutima wosi. Va lekisa okuti va likekembela kuenda va yonguile oku pongolola ekalo liavo. Omo liaco, Suku wa va ecela kuenda Embimbiliya li va tukula okuti alume vakuekolelo.

Omo okuti ka tua lipuile, tu pondola oku lueya. (Va Roma 3:23) Nda tua linga ekandu, tu sukila oku likekembela kuenda oku likolisilako oku linga eci ca sunguluka.

 Yovi, Lote kuenda Daviti, va seteka ndati oku linga eci ca sunguluka? Yovi wa kala ulume umue ukuekolelo. Suku noke yoku sapela laye, Yovi wa pongolola ovisimĩlo viaye ka via sungulukile kuenda wa likekembela omo lieci a popia. (Yovi 42:6) Ocisimĩlo ca Lote catiamẽla kekalo lĩvi liomanu lio Sitomo kuenda lio Gomora, ca likuatele lovihandeleko via Suku. Pole ocitangi ceci okuti, eye ka kuatele ocituwa conjanga. Eye wa tunda valupale a laikele oku nyoliwa kuenje wa puluka kesombiso lia Suku. Loku pokola ku Suku, ka vanjele kovina a kala oku sia konyima. Ndaño Daviti wa linga ekandu linene poku lueya ocihandeleko ca Suku, eye wa situlula eci ca kala vutima waye poku likekembela cocili kuenda oku pinga ongecelo ya Suku.—Osamo 51.

Onjila Suku a kuama poku tetulula ovitangi viomanu vaco haiyo a siata oku kuama poku tata omanu ka va lipuile. Suku ‘wa kũlĩha atimba etu kuenda ivaluka okuti tuneketela.’ (Osamo 103:14) Nda Suku wa kũlĩha okuti ka tu pondola oku yuvula oku linga eci ka ca sungulukile, nye a lavoka kokuetu?

Elungulo Daviti a eca komõlaye Salomone, li lekisa ndomo tu pondola oku sanjuisa Suku. “Amolange, a Salomone, kulĩha Suku ya soyove, u vumba loku pua evelo kuenda lutima wove wosi.” (1 Asapulo 28:9) Utima wosi u lomboloka nye? U lomboloka utima umue u sole Suku kuenda una wa nõlapo oku linga ocipango caye loku pokola kolonumbi viaye. Ka ci lomboloka utima umue wa lipua, pole utima umue u sanjukila oku vumba Suku locisola kuenda oku tava kelungulo nda wa lueya. Omo lioku lekisa ocisola ku Suku kuenda onjongole yoku pokola kokuaye, Yovi wa kũlĩhĩwile ndulume “wa pua etondelo,” Lote ndulume “ukuesunga” kuenda Daviti ndulume wa “linga lika eci ca sunguluka” kovaso a Suku. Ndaño va linga ovina ka via sungulukile, pole va tẽla oku sanjuisa Suku.

Nda tu kasi lovisimĩlo ka via sungulukile volondunge vietu, oku vangula ondaka yimue ka ya sungulukile ale tua limbuka okuti ovina viaco ka via sungulukile, tu ka lekisa utõi woku kuama ongangu yomanu tua kũlĩhĩsa. Suku wa kũlĩha okuti ka tua lipuile. Eye o lavoka okuti tu lekisa ocisola kuenda tu pokola kokuaye. Omo liaco, nda tu lekisa utima waco, tu pondolavo oku sanjuisa Suku.