ETAMBULULO LIEMBIMBILIYA: O wola “yiya eci vosi va kasi vayambo va yeva ondaka [ya Yesu], yu va tundamo.”—Yoano 5:28, 29.

Yesu wa popia hati, eci a ka Viala kovaso yoloneke, oku fa ka ku ka kalako vali. Fernando wa tukuiwa vocipama ca pita, wa ivaluka ndoco: “Nda komõha calua onjanja yatete eci nda tanga elivulu lia Yoano 5:28, 29. Eci ca nyiha elavoko liwa kuenda nda fetika oku sokolola esanju omanu va ka kuata kovaso yoloneke.”

Yovi ulume umue ukuekolelo wa kuata elavoko liokuti noke yoku fa, Yehova o pondola oku u pindula. Kuenje wa pula ndoco: “Omunu nda o fa o kala vali lomuenyo?” Lekolelo wa tambulula ndoco: ‘Ndi ka talamẽla ño oloneke viosi viomuenyo wange [Vonjembo] toke mbilikiyiwa, kuenje o ka mbilikiya, lame ndi ka ku kumbulula.’—Yovi 14:14, 15.

Epinduko ka lia kaile ocina cimue cokaliye ku Marta manji a Lasaru. Noke liolofa via Lasaru, Yesu wa sapuila Marta hati: “Mume wove o pinduka.” Marta wa kumbulula hati: “Ndi ci okuti o pinduka epinduko lieteke lia sulako.” Noke Yesu wo sapuila hati: “Ame ndipinduko haime ndimuenyo. U o ñolela, ndaño o fa, haimo o kala vali lomuenyo.” (Yoano 11:23-25) Kuenje Yesu wa pindula Lasaru! Ulandu waco wepinduko u tu ĩha epuluvi lioku sokolola ndomo ovina vi ka kala kovaso yoloneke. Sokolola esanju tu ka kuata eci epinduko li ka lingiwa voluali luosi!

ETAMBULULO LIEMBIMBILIYA: Ondaka ya Suku yi lekisa okuti, epinduko lia Yesu lia li tepa lapinduko ecelãla a tukuiwa Vembimbiliya. Omanu vaco ecelãla va pinduiwa oco va kale vali palo posi. Pole, catiamẽla kepinduko lia Yesu tu tanga ndoco: “Yesu Kristu wa enda kilu, yu o kasi kondio ya Suku.” (1 Petulu 3:21, 22) Anga hẽ Yesu eye lika wa pinduiwa oco a ende kilu? Yesu wa popele kovapostolo vaye hati: “Ngenda oku vu angiliyila ocitumãlo, [kuenje] njiya vali, ndu vu wupilili okuti oku ñasi, haiko vu kalavo.”—Yoano 14:3.

 Yesu wa enda kilu kuenda wa angiliya ocitumãlo ca vamue pokati kolondonge viaye. Etendelo lia vana va ka pinduiwa oco va ende kilu li soka 144.000 komanu. (Esituluilo 14:1, 3) Nye olondonge via Yesu via koleliwa vi ka linga kilu?

Ovo va ka kuata upange walua! Ovisonehua vi tu sapuila ndoco: “U o pinduiwa vepinduko liatete wa sumũlũha haeye o kola. Ovo okufa kuavali ka ku tẽla oku va kuata, puãi va linga ovitunda via Suku la Kristu, kuenje va ka viala kumue laye vokuenda kueci ci soka 1.000 yanyamo.” (Esituluilo 20:6) Omanu vana va ka pinduiwa oco va ende kilu, va ka viala ongongo ndolosoma kuenda ndovitunda la Kristu.

ETAMBULULO LIEMBIMBILIYA: Catiamẽla kondaka yaco upostolo Paulu wa vetiyiwa oku soneha ndoco: “Ñuete elavoko ku Suku hailio ovo va kuetevo, okuti kuli epinduko lia vakuesunga lava havakuesungako.”—Ovilinga 24:15.

Velie va ka kongeliwa vocimunga Paulu a tukula okuti “vakuesunga”? Kũlĩhisa ocindekaise cimue. Daniele ulume umue ukuekolelo kesulilo liomuenyo waye vo sapuila ndoco: “O ka puyuka, kuenje o ka talama vocipiñalo cove kesulilo lioloneke.” (Daniele 12:13) Kocitumãlo ci pi Daniele a ka pasukila kotulo tuolofa? “Olondingesunga vi piñala ofeka, vi tungamo oloneke ka vi pui.” (Osamo 37:29) Yesu wa popele hati: “Ava vomboka vutima va sumũlũha, momo va piñala ofeka.” (Mateo 5:5) Daniele kumue lomanu vakuavo vakuekolelo alume lakãi va ka pinduiwa oco va kale otembo ka yi pui palo posi.

Velie va ka kongeliwa vocimunga comanu vana Paulu a tukula okuti “havakuesungako”? Olohuluwa viomanu va fa okuti ka va kuatele epuluvi lioku kuata elomboloko kuenda oku kapako ocili Cembimbiliya. Noke lioku pinduiwa ovo va ka kuata epuluvi lioku kũlĩha kuenda oku sola Yehova a la Yesu. (Yoano 17:3) Vosi va nõlapo oku vumba Yehova va ka kuata epuluvi lioku kala otembo ka yi pui ndeci eye.

ETAMBULULO LIEMBIMBILIYA: Suku “o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali.” (Esituluilo 21:4) Omanu “Va [ka] tunga olonjo kuenje va kalamo; va kũla oviumbo viayuva kuenje va lia epako liavio.”—Isaya 65:21.

Sokolola esanju o ka kuata poku kala kumosi la vakuepata liove va ka pinduiwa! Pole epulilo liamamako: Tu pondola oku kuata ndati ekolelo liokuti ku ka kala muẽle epinduko?