“MOMO LIE CI PITILA LAME? Momo lie Suku a ecelela okuti ci pita lame?” Apulilo a-a, a enda oku sakalaisa calua Sidnei o kuete 24 kanyamo ko Brasil. Noke lioku pita locilunga vetala limue kamuli ovava alua, wa linga ocilema okuti, toke cilo endela komangu yalola.

Omo liohali yi tunda kocilunga cimue, kuveyi, kolofa viomunu tu sole, kovilunga vikuavo ale kuyaki, ci vetiya omanu oku temẽla Suku. Ocituwa caco hacokaliyeko. Kukululu Yovi wokosimbu, wa pitavo lovilunga vialua. Eye wa vetela evelo Suku poku popia hati: “Ndi ku vilikiya kuenje ku ñumbulula. Nãi kuenje ku ndete. Wa pongoloka, wa ndingila ongangala. O nalisa ohali lolohõlo vieka liove.”—Yovi 30:20, 21.

Yovi ka kũlĩhile ono yovitangi a kala oku liyaka lavio ndaño esunga lieci vieyilila kokuaye. Pole Embimbiliya li tu sapuila esunga lieci ovitangi viaco vieyilila kuenda li tu lekisa ndomo tu li yaka lovitangi viaco.

Catiamẽla ku Suku, Embimbiliya li tu sapuila hati: “Lupange waye wa lipua. Momo olonjila viaye viosi viesunguluko. Haeye Suku yocili, ka kuete etime. Ukuesunga, wa suñama cimue.” (Esinumuĩlo 32:4) Ca sunguluka hẽ ale ci taviwa oku sima okuti o Suku yimue ‘ukuesunga kuenda ya suñama’ yi nena ohali oco yi kangise omanu?

Pole Embimbiliya li tu sapuila ndoco: “Umue, nda wa yonjiwa, ka ka popie hati, ‘Nda yonjiwa la Suku,’ momo Suku ka yonjiwa leci cĩvi, kuenda vali, ka yonji umue.” (Tiago 1:13) Vembimbiliya tua lilongisa okuti Suku wa lulika omanu lefetikilo limue lia lipua. Eye wa eca ku Adama la Heva ocitumãlo cimue ca posoka, ovina viosi va sukilile komuenyo kuenda upange umue u sanjuisa. Suku wa va sapuila hati: “Liciti, siati, yukisi oluali, lu yuli.” Adama la Heva ka va kuatele esunga lalimue lioku funguila Suku.—Efetikilo 1:28.

Koloneke vilo, tu kasi vekalo limue li kasi ocipãla loku lipua. Ulandu u lekisa okuti omanu va kasi vekalo limue lĩvi calua. Olondaka evi viocili. “Tua kũlĩha okuti, toke cilo, ovina viosi via lulikiwa vi yevalela kumuamue olongembia vioku cita.” (Va Roma 8:22) Nye ceyililako?

Oco tu sange elomboloko lieci ku kasilili ohali, tu sokololi konyima eci ovina via fetika. Poku vetiyiwa lungelo umue uvĩ, okuti noke weya oku tukuiwa okuti Satana Eliapu, Adama la Heva va likala olonumbi via Suku vioku tepisa eci ciwa kuenda eci cĩvi ndomo ca lekisiwa vocihandeleko ca eciwile kokuavo oco ka va kalie ‘kuti woku kũlĩha eci ciwa leci cĩvi.’ Eliapu lia sapuila Heva okuti ovo nda va sinila suku ka va fi, loku lundila Suku okuti ohembi. Satana wa lundililevo Suku hati ka ecele komanu elianjo lioku li nõlela eci ciwa leci cĩvi. (Efetikilo 2:17; 3:1-6) Satana wa popia okuti omanu va pondola oku kala ciwa nda ka va vialiwa la Suku. Ovisimĩlo viaco via votola epulilo limue li kuete esilivilo liokuti: Suku wa kuatele omoko yoku viala?

Eliapu lia katula ocitangi cikuavo. Omanu va vumba Suku omo liocipululu. Catiamela ku Yovi ukuekolelo, Eliapu lia sapuila Suku hati: “Haveko hẽ wa vindikiya kolonele viosi oku vindikiya onjo yaye la cosi a kuete? . . . Puãi imba eka liove okuti o lamba cosi a kuete kuenje eye oku likala kovaso ove.” (Yovi 1:10, 11) Ndaño okuti olondaka viaco via tiamisiwila ku Yovi, pole ocisimĩlo caco ci lekisa okuti omanu vosi va fendela lika Suku omo liocipululu.

Yipi onjila ya velapo yoku potolola ocitangi caco? Suku ukualondunge, wa kuatele onjila yimue yiwa, okuti lalimue eteke yi ka tu sumuisa. (Va Roma 11:33) Eye wa ecelela okuti omanu va li viala ovo muẽle vokuenda kuotembo yimue kuenda oku tala nda onjila yoku viala oyo ya velapo.

 Ekalo lĩvi li kasi pokati komanu koloneke vilo, li lekisa ciwa okuti omanu ka va tẽla oku li viala ovo muẽle. Uviali womanu ka wa lembuele lika oku nena ombembua, oku kolapo kuenda esanju pole, wa siatavo oku nyola ongongo. Ocili cokuti omunu ka tẽla oku viala, ci likuata ciwa leci Embimbiliya li popia hati: “Omunu enda ka tẽla eye muẽle oku suñamisa okuenda kuaye.” (Yeremiya 10:23) Onjila ya Suku yoku viala, oyo lika yi pondola oku nena ombembua yi kala otembo ka yipui, esanju Kuenda ekalo liwa komanu momo eci oco ocipango ca Suku.—Isaya 45:18.

Suku o ka tẽlisa ndati ocipango caye lomanu? Ivaluka olondaka Yesu a longisa olondonge viaye poku likutilila hati: “Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:10) Votembo ya sokiyiwa, Suku vonduko Yusoma waye, o ka malako ohali yosi. (Daniele 2:44) Uhukũi, uvei kuenda olofa vi ka kala ovina via pita. Catiamẽla kohukũi, Embimbiliya li popia okuti Suku “o popela osuke eci yi vilikiya.” (Osamo 72:12-14) Catiamẽla kuvei, ohuminyo Yembimbiliya yeyi: “Layimue onungi yi popia yiti, ‘Ndi vela.’” (Isaya 33:24) Catiamẽla ku vana va fa okuti va kasi vovisimĩlo via Suku, Yesu wa popia hati: “momo ola yiya eci vosi va kasi vayambo va yeva ondaka yaye, yu va tundamo. Ava va linga ciwa, va tundila epinduko liomuenyo, ava va linga cĩvi, va tundila epinduko liekanga.” (Yoano 5:28, 29) Olohuminyo vimue vi sanjuisa!

Sidnei wa tukuiwa kefetikilo liocipama, noke 17 kanyamo tunde eci a pita locilunga, wa popia hati: “Lalimue eteke nda vetelele evelo Yehova Suku omo liocilunga caco pole, oku vangula muẽle ocili kefetikilo nda sumuile laye. Olonjanja vimue ndi sumua calua, kuenda nda siata oku lila omo lioku sokolola ulema wange. Pole, Embimbiliya lia ñuatisa oku sanga elomboloko liokuti ovilunga hekangisoko li tunda ku Suku. Embimbiliya li popia okuti: ‘Cosi ciya ño ci veta ño.’ Oku likutilila ku Yehova kuenda oku tanga ovolandu a likuata locitangi cange ci pamisa ekolelo liange, kuenda ci ndi kuatisa oku kuata ovisimĩlo via sunguluka —Ukundi 9:11; Osamo 145:18; 2 Va Korindo 4:8, 9, 16.

Oku kũlĩha esunga lieci Suku a siatela oku ecelela ohali kuenda ndomo eye a ka tetulula ocitangi caco ci tu kuatisa oku yuvula oku kuata ovisimĩlo ka via sungulukile eci tu li yaka lovitangi. Tua kolela okuti Suku “eca onima kuava vo sanda.” Eye lalimue eteke a ka yanduluka ava va kolela kokuaye kuenda komõlaye.—Va Heveru 11:6; Va Roma 10:11.