Epata liange lia tiamẽlele ku va Ixil, ocitumbulukila cepata lia va Maya. Nda enda oku vangula elimi lio Espanyole, kuenda alimi etu opocitumãlo nda kulila. Nda citiwa ko tembo yimue okuti ko Guatemala kua kala ovitangi vialua omo liuyaki wa pita vokuenda kueci ci soka 36 kanyamo. Vokuenda kuotembo yaco valua va Ixil va fa.

Eci nda kuata anyamo a kuãla, manjange ulume wa kuata epandu vali ka nyamo, wa kala loku papala lombomba yimue okuti vocipikipiki ya tuika. Omo liocilunga caco nda linga omeke kuenda manjange wa fa. Noke nda tualiwa kocisoko cimue co ku tatela omãla vana okuti olomeke kuna nda lilongisa o Braille. O cisoko caco ca enda oku ndi tateka oku vangula lomãla vakuavo, kuenje ovo va enda oku ndi nyehula. Sia kuatele elomboloko liesunga liaco. Olonjanja viosi nda li yevaile ulika loku lavoka lesanju olosãi vivali vunyamo vioku kala konjo la ina yange ukuacisola haiye ukuahenda. Eci nda tẽlisa ekũi kanyamo ina yange wa fa. Poku sima okuti eye lika omunu wa ndi solele voluali ca ndi sumuisa calua.

Eci nda tẽlisa 11 kanyamo nda tiukila kimbo nda tundile loku kala la manjange volonjali. Ovo va ndi kuatisa konepa yetimba pole, lomue wa ponduile oku ñuatisa kovisimĩlo viange. Olonjanja vimue nda enda oku pula Suku: Momo lie ina yange a fila? Momo lie ndi kasilili omeke?” Omanu va enda oku ndi sapuila okuti Suku eye wa koka ovitangi viaco. Nda simãile okuti Suku ka kuete ocikembe. Nda yonguile oku li ponda pole sia kũlĩhĩle ndomo ndi ci linga.

Oku kala omeke ca ndi kokela ovitangi vialua. Eci nda kala umalẽhe va ndi putula olonjanja vialua. Lalimue eteke nda sapuilile ovitangi viaco komunu umue, momo nda simĩle okuti lomue o pondola oku ñuatisa. Omanu ka va endaile oku sapela lame kuenda sia ci lingailevo. Nda enda oku yeva ulika, esumuo kuenda sia kolele omunu laumue.

Umue pokati kalongisi vange kosikola, wa kũlĩhile ocitangi cange wa sapela lavo oco va ndi sandiliye. Ovo va ndi sapuila eci catiamẽla kolohuminyo Viembimbiliya viokuti omanu va fa va ka pinduiwa  kuenda eteke limue olomeke vi ka patuluka. (Isaya 35:5; Yoano 5:28, 29) Nda sola calua ovina va ndi longisa pole, ka ca lelukile kokuange oku sapela lavo. Ndaño okuti sia solaile oku sapela calua, ovo lumbombe walua kuenda epandi va amamako oku ndi nyula loku ndi longisa Embimbiliya. Ohueli yaco ya sukilile oku enda ci pitahãla 10 kolokilometulu loku pita komunda yimue oco va pitĩle o ku nda kala.

Manjange wa ndi sapuila okuti ovo omanu vamue vawa ndaño okuti ka va kale olohuasi. Ovo ka va kuatele ovina vialua pole olonjanja vimue va enda oku ndi nenela olombanjaile vimue. Nda limbuka okuti Akristão vocili ovo lika va likolisilako oku lekisa ocisola caco.

Nda lilongisa Embimbiliya lekuatiso lialivulu o Braile. Ndaño okuti nda loñolõhele koku kuata elomboloko liovina nda kala oku lilongisa, pole ovina vimue kokuange ka via lelukile oku vi tava. Ka ca lelukile kokuange oku tava okuti Suku wa ndi kapako kuenda omanu vakuavo va ka ndi longisa catiamẽla ku Suku. Ndaño nda liyaka lovitangi vialua, pole nda limbuka esunga lieci Yehova a ecelela ovina vĩvi vokuenda kuotembo yimue kuenda nda limbukavo okuti eye Onjali yimue ukuacisola. a

Ovina nda lilongisa Vovisonehua via ñuatisa oku pongolola ovisimĩlo viange. Nda lilongisa okuti Suku o lekisa ocikembe komanu vana va tala ohali. Catiamẽla kafendeli vaye va kala oku kangisiwa, Suku wa popia hati: “Nda mõla ohali yomanu . . . nda kulĩha olohali viavo.” (Etundilo 3:7) Eci nda fetika oku limbuka okuti Yehova wa siata oku lekisa ovituwa viaco kokuange, ca ndi vetiya oku tumbika omuenyo wange kokuaye. Kunyamo wo 1998 nda linga Ombangi ya Yehova poku papatisiwa.

Eci pa pita unyamo umosi noke lioku papatisiwa, nda lalekiwa oku enda kosikola yolomeke ocipepi lolupale luo Escuintla. Ukulu umue wekongelo wopocitumãlo caco, wa sanda oku kũlĩha ovitangi nda kala oku li yaka lavio poku enda kolohongele osimbu nda kala kolupale nda kulila. Oco ngende kolohongele vekongelo lia kala ocipepi lonjo yetu, ca sukilile oku lamana omunda yimuamue ohueli Yolombangi Via Yehova via enda oku pita, oco va ndongise Embimbiliya kuenda ka ca lelukile kokuange. Oco a ndi kuatise, ukulu waco wekongelo wa sandiliya epata limue Liolombangi Via Yehova kolupale luo Escuintla okuti va ngambata konjo yavo kuenda va ndi kuatisa oku endaenda kolohongele. Kuenje va ndi tata ndu okuti ndu kuepata liavo.

Nda yonguile oku lombolola ovolandu alua atiamẽla kocisola vamanji vekongelo va lekisa kokuange. Ovolandu haco a ndi kuatisa oku limbuka okuti omo lioku kala Ombangi ya Yehova, ñasi pokati Kakristão vocili.—Yoano 13:34, 35.

Omuenyo wange cilo ukuete ocimãho. Omo lioku talavaya ndukundi wotembo yosi kupange Wolombangi Via Yehova woku longisa Embimbiliya komanu, si tiamisila vali utima kocitangi cange pole, ndu u tiamisila koku longisa vakuetu ocili Cembimbiliya. Ñuete esanju lioku kala ukulu wekongelo kuenda oku linga olohundo vakongelo. Nda kuatavo esumũlũho lioku linga olohundo kolohongele viofeka kua siata oku kala omanu valua.

Kunyamo wo 2010, nda pindisiwa kosikola Yoku Angiliya Olondingupange (okuti cilo yi tukuiwa hati, Osikola Yoku Pindisa Akundi Vusoma) ko El Salvador. Osikola eyi ya ndi pongiya oco nẽlise ciwa ovikele viange vekongelo. Oku pindisiwa kosikola yaco ca ñuatisa oku limbuka okuti ñuete esilivilo kuenda oku sola Yehova Suku, una o kuatisa omanu oku tẽlisa upange waye.

Yesu wa popia hati: “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Cilo mopia siti nda sanjuka kuenda ndaño kosimbu nda simĩle okuti si kuete epondolo liaco, cilo ndi pondola oku kuatisa vakuetu.