Nda citiwila volupale lumue lutito ko Polonia, ocipepi longave yo Alemanya. Nda kuatele omuenyo umue wesanju momo tua ñualiwile lovapia kuenda ovisenge. Olonjali viange via kala vakuacisola kuenda via ndi vetiya oku kala omunu uwa, oku litunda ciwa kosikola kuenda oku sandiliya upange umue wa kemãla.

Ovitangi viange via fetika eci nda enda kosikola ya velapo yoku lilongisa ovihandeleko volupale luo Breslávia. Omo okuti nda kala ocipãla lolonjali viange nda nõla akamba vãvi. Nda solele calua omapalo yoku imba ombunje, pole, omo liakamba vokaliye nda ñola, ocisola caco ca livokiya. Ocimunga nda solele calua co ko Varsóvia, kuenje kasulilo osemana ndaenda oku va kuama kuosi va enda oku ka tasula ombunje. Vovongende aco mua kongelele oku nyua ovina vi koluisa, olodroga, kuenda oku litipula lomanu va tiamẽlele kocimunga cikuavo. Nda tendele ovina viaco ndekuatiso lioku tepulula asakalalo eteke leteke, ndaño nda kũlĩhĩle okuti poku ci linga ñapiwa vokayike kuenda ndi nyõla ekalo liomuenyo wange.

Ame lakamba vange tua solele oku enda kolonjo violomapalo ka via sungulukile kuenda violomiluko. Eci tu enda kovitumãlo viaco, tu likongela kolomapalo vioku litipula. Nda kapiwa vokayike olonjanja vialua, pole, oco si ka kuate ovitangi lakuenje velombe, nda enda oku eca ovitukiko. Nda simĩle okuti nda kala oku ambata omuenyo umue uwa. Pole, utima wa enda oku mbetela evelo momo nda kũlĩhĩle okuti eci ndi kasi oku linga ka ca sungulukile. Nda kuata ocituwa coku enda konembele Vovialumingu viosi locimãho coku kavuluisa utima wange.

Kunyamo wo 2004 Olombangi vivali Via Yehova vieyile konjo yange, kuenje nda tava oku lilongisa lavo Embimbiliya. Osimbu nda kala oku lilongisa eci ci lomboloka oku kala Ukristão wocili, utima wange wa fetika oku ndi sakalaisa. Nda kũlĩha okuti nda sukilile oku liwekapo oku nyua calua, oku yuvula olodroga, kuenda oku siapo oku linga ukamba lomanu vana ka va kapeleko olonumbi Viembimbiliya. Nda limbuka okuti nda sukilile oku pongolola ekalo liange lioku kala ongangala. Ndaño nda kũlĩhĩle okuti nda sukilile oku linga apongoloko, pole, ndamamako oku linga ovina vĩvi.

Eteke limue luteke, nda fetika oku litĩla lalume ecelãla. Ndi ivaluka okuti nda kupukila posi, kuenje va fetika oku ndi liatala loku ndi tasula kutue. Nda simĩle okuti ndi fa, kuenje nda likutilila ndoco: “A Yehova,  ngecele omo sia kapeleko Ondaka yove. Nda nda puluka ndi likuminya oku lilongisa Embimbiliya Lolombangi Via Yehova kuenda oku pongolola omuenyo wange.” Kuenje nda puluka muẽle. Noke nda tẽlisa ohuminyo yange yoku lilongisa vali Embimbiliya.

Kunyamo wo 2006 nda ilukila kofeka yo Inglaterra. Ocimãho cange ca kala oku kuata olombongo vialua oco ndi tiukile ko Polonia kuenda oku iñila kosikola ya velapo yoku lilongisa ovihandeleko. Osimbu nda kala oku lilongisa Embimbiliya nda sanga ocisonehua cimue ca ndi komõhisa. Upostolo Paulu wa soneha hati: “Kokuange oku kũlĩha Kristu Yesu, Ñala yange, okuo kua velapo, haikuo ka ku pitahãliwa, oco cosi cikuavo ndi ci tenda ño ndepese. Ndo pesila ovina viosi. Ovina viosi ndi vi tenda ño ndovipelekese hã si nganyala Kristu.” (Va Filipoi 3:8) Upostolo Paulu wa pindisiwavo kosikola yoku lilongisa ovihandeleko, pole, wa kalavo ongangala ndeci ame. (Ovilinga 8:3) Pole, noke eye wa limbuka okuti kuli onjila ya velapo yoku ambata omuenyo okuti: oku vumba Suku kuenda oku likolisilako oku setukula Yesu. Eci nda sokolola kulandu wa Paulu, nda limbuka okuti esanju liocili ka li tundi koku kuata upange wa kemãla ale koku kala ongangala. Kuenje nda limbuka okuti nda Paulu wa tẽla oku pongolola omuenyo waye, ndi pondolavo oku pongoloka. Omo liaco, nda nõlapo oku kala ko Inglaterra kuenda oku siapo ocisimĩlo coku enda kosikola ya velapo yoku lilongisa ovihandeleko.

Osimbu nda kala oku vokiya ukũlĩhĩso wange watiamẽla ku Yehova, nda pamisa ukamba wange laye. Nda komõha poku lilongisa okuti Yehova wa likuminya oku ecela vana va yongola oku linga apongoloko komuenyo wavo. (Ovilinga 2:38) Eci nda sokolola ukanda 1 Yoano 4:16, u popia okuti “Suku eye ocisola,” nda fetika oku limbuka esunga lieci Suku a nyalele ungangala.

Nda komõhavo ovituwa viwa Violombangi Via Yehova. Nda limbuka okuti ovo va likolisilako oku ambata omuenyo u litava lolonumbi Viembimbiliya. Nda yonguilevo oku tiamẽla kongongela yavo kuenda oku kuata esanju ovo va kuete. Noke ya likolisilo amue kuenda oku pongolola omuenyo wange, kunyamo wo 2008 nda papatisiwa Ndombangi ya Yehova.

Embimbiliya lia ñuatisa oku siapo ovituwa vimue ndeci, ocipululu, ungangala, oku nyua olodroga, ovina vi koluisa, oku sola calua omapalo yoku tasula ombunje, kuenje nda linga ufendeli wa Suku okuti o sole oku longisa omanu ovina viatiamẽla Kembimbiliya. Toke cilo nda siata oku tala omapalo yoku tasula ombunje, pole nda nõlapo oku kapa omapalo yaco pocitumãlo yi sesamela.

Kaliye nda sanjuka momo nda kuela la Esther, ukãi umue wa posoka haeye ufendeli wa Yehova. Tu kuete esanju lioku longisa Embimbiliya komanu va vangula elimi lio Polonia konano yo Inglaterra. Eyi oyo onjanja yatete nda yeva esanju liocili komuenyo wange. Ñuete utima wa yela, kuenda omuenyo wange kaliye u kuete esilivilo.