Nda kulila ko Puerto Limón okuti olupale lumue lu kasi ocipepi lofeka yo Costa Rica. Olonjali viange, via kuata eci ci soka ecelãla komãla kuenda ame nda kala omõla wepanduvali. Isiange wa fa eci nda kuata anyamo ecelãla. Omo liaco, ina yange wa tu tata lika liaye.

Oku imba beisebol ocina cimue ca pangele onepa komuenyo wange. Tunde vutila wange nda solaile calua oku imba beisebol. Eci nda kala umãlehe, nda iñila vocimunga cimue coku imba. Osimbu nda kala oku imba vocimunga caco, ulume umue wa pinga oco ndi pange onepa kocimunga cimue ca velapo kofeka yo Nicaragua. Pole, omo okuti kotembo yaco ina yange wa kala oku vela, nda nõlapo oku u tata kuenje sia endele ko Nicaragua. Omo liaco, sia tavele. Noke ulume ukuavo wa ndi laleka oco ndi pange onepa kocimunga cimue coku imba om Baseball bunje vo Costa Rica okuti va nõliwa vocimunga cimue citito. Nda tava kelaleko liaco. Nda imba vocimunga caco oku upisa kunyamo wo 1949 toke kunyamo wo 1952, kuenda nda kuata epuluvi lioku imba o beisebol, ko Kuba, ko Mesiku kuenda ko Nicaragua. Nda kala ukuakuyakela kuenda nda enda oku yakela ciwa, omo liaco nda kuata epuluvi lioku imba o beisebol, 17 kolonjanja. Nda solaile calua oku yeva ndomo omanu va kaluka loku tukula onduko yange!

Cisumuisa calua omo okuti nda ambatelevo omuenyo umue ukahonga. Ndaño okuti nda kuatele ukãi konjo pole, nda kuatele vali akãi vakuavo. Nda enda oku nyua calua. Eteke limue nda ka nyuile okuti eci nda pasuka lomẽle, sia ivailukile ndomo nda tiuka konjo! Nda solaile calua olomapalo vioku imba osande oco ndi nganyale olombongo.

Vokuenda kuotembo yaco, ina yange wa linga Ombangi ya Yehova. Eye wa yonguile okuti ndi lilongisavo Embimbiliya pole kefetikilo sia tavele momo nda solaile calua oku imba o beisebol. Nda ñasi oku lipindisa velivala liokulia si yevi onjala! Nda tiamisilile lika utima kolomapalo viaco. Nda solaile calua oku imba ombunje okuti ovina vikuavo ci sule!

Eci nda kuata 29 kanyamo osimbu tua kala oku imba, eci nda seteka oku yakela ombunje, nda kupuka kuenje nda tunguka. Noke lioku kaya,  nda siapo oku imba. Pole nda litumbika lika kupange woku pindisa vana va imba o beisebol kovimunga vimue ocipepi lonjo yange.

Kunyamo wo 1957 nda tava kelaleko lioku enda kohongele yofeka Yolombangi via Yehova ya lingiwila vocila nda enda oku tasuila o beisebol. Osimbu nda kala pokati komanu vosi, ca ñuatisa oku limbuka etepiso lia kala pokati kolombangi via Yehova lomanu va enda oku tala o beisebol. Ovina nda mola, via mbetiya oku fetika oku lilongisa Embimbiliya Lolombangi Via Yehova loku enda enda kolohongele.

Ovina nda lilongisa Vembimbiliya via ñomohisa. Yesu wa popia okuti koloneke via sulako, olondonge viaye via laikele oku kunda Olondaka viwa Viusoma voluali luosi. (Mateo 24:14) Nda limbuka okuti Akristão vocili, ka va lingi upange wavo locimãho coku nganyala olombongo. Yesu wa popia hati: “Omo wa tambuli ocali, ecivo ocali.”—Mateo 10:8.

Osimbu nda kala oku lilongisa Embimbiliya, nda enda oku sokisa nda ovina Olombangi Via Yehova vi longisa vi li kuata lovituwa viavo. Nda komõha calua omo lialikolisilo avo oku kunda olondaka viwa Viusoma wa Suku voluali luosi. Nda limbuka okuti ovo va kuete ocituwa coku lieca olumue ndeci Yesu a handelekele Kakristão. Omo liaco, eci nda tanga elivulu lia Marko 10:21 kuenda nda mola elaleko lia Yesu liokuti, “Enju, linga ondonge yange,” nda nõlapo oku linga Ombangi ya Yehova.

Pa pita otembo yalua oco ndi linge a pongoloko. Vokuenda kuanyamo alua olosemana viosi nda enda oku linga olomapalo vioku imba “osande” oco ndi nganyale olombongo. Pole nda lilongisa Vembimbiliya okuti, Suku o nyale omanu va fendela ‘o suku yo Sande’ kuenda omanu va kuacipululu. (Isaya 65:11; Va Kolosai 3:5) Nda liwekapo oku imba omapalo yoku nganyala olombongo. Vo calumingu catete noke yoku liwekapo oku imba omapalo yaco “yosande”, ocimunga cetu ca nganyala! Omanu va ndi popia lãvi omo lioku liwekapo oku imba osemana yaco kuenda va ndi vetiya oco ndi fetike vali oku imba, pole sia tavele. Lalimue eteke nda simile oku imba vali omapalo yaco.

Nda liyakavo loseteko yikuavo yoku kala “omunu wokaliye” noke lioku papatisiwa kohongele yofeka Yolombangi Via Yehova. (Va Efeso 4:24) Koñolosi eci nda tiukila ko wotele nda sikĩlile, nda sanga ufeko nda namulalele laye okuti wa kala oku ndi kevelela puvelo wohondo yange. Wa mbilikiya hati: “A Sammy enju. Lilo epuluvi liwa!” Pole ndo tambulula lonjanga hati, “Sio!” Ame ndo sapuila okuti cilo, ndi kuãi olonumbi Viembimbiliya. (1 Va Korindo 6:18) Eye wa kaluka hati: “Ndati?” Eye ka kapeleko olonumbi Viembimbiliya vi pisa evĩho liukahonga kuenda wa yonguile okuti, tu amamako oku namulãla. Pole nda iñila vohondo kuenda nda yika epito. Cilo nda sanjuka omo tunde kunyamo wo 1958 nda siata oku likolisilako oku linga apongoloko kekalo liomuenyo wange.

Nda yonguile oku soneha elivulu limue liatiamẽla kasumũlũho ndi kuete omo lioku kapako olonumbi Viembimbiliya! Amue pokati kasumũlũho aco, a-a okuti cilo ñuete akamba valua vocili, ñuete ocimãho komuenyo kuenda esanju.

Toke cilo handi ndi sole oku imba o beisebol pole, nda linga apongoloko. Koku imba ombunje nda kuatele ekamãlo kuenda olombongo pole, ovina viaco ka via kaile otembo yalua. Ukamba wange la Suku kuenda la vamanji voluali luosi, u ka kala otembo ka yi pui. Embimbiliya li popia hati: “Oluali lu kasi oku pita loloñeyi vialuo, pole, una o linga ocipango ca Suku o kala otembo ka yi pui.” (1 Yoano 2:17) Cilo ndi sole Yehova Suku kuenda afendeli vaye okuti ovina vikuavo ci sule!