Olokavalu vi sangiwa kelivulu Liesituluilo citava okuti vi lingisa usumba kuenda vi komõhisa. Pole tu sukila oku yuvula ocisimĩlo caco. Momo lie? Momo Embimbiliya kuenda ovolandu a kasi oku pita koloneke vilo, a tu kuatisa oku kuata elomboloko liotuvalu tuaco. Ndaño okuti ocinjonde caco ci lekisa ovitangi vi kasi oku pita palo posi, oco ci nenavo esapulo liwa kokuove kuenda kepata liove. Ndamupi? Catete, tu kũlĩhĩsi elomboloko liotuvalu tuaco.

Ocinjonde caco ci fetika ndoco: “Nda mola okavalu ka yela kuenda u wa tumãlako o kuete ohonji; kuenje vo wĩha ekolowa limue, yu wa tundila oku yula loku tẽlisa oku yula kuaye.”​—Esituluilo 6:2.

U wa endela kokavalu ka yela o lomboloka helie? Elivulu Liesituluilo, li tu ĩha etambululo. Ku lekisa okuti una wa tumãlako o tukuiwa hati, ‘Ndaka ya Suku.’ (Esituluilo 19:11-13) Onduko yokuti, Ndaka, ya eciwa ku Yesu Kristu, omo okuti, eye o sandeka esapulo lia Suku. (Yoano 1:1, 14) Handi vali, eye o tukuiwa okuti, eye “Soma yolosoma kuenda Ñala yoloñala,” haiye “Ombangi yocili haiyo ya Koleliwa.” (Esituluilo 19:16) Ovina viaco, vi lekisa okuti Yesu o kuete unene woku kala Soma Yovita kuenda omo okuti eye wa koleliwa, ka talavaya lunene waye lonjila yimue ka ya sungulukile. Pole, ku lingiwa apulilo amue.

Helie wa eca ku Yesu unene woku yula? (Esituluilo 6:2) Vocinjonde cimue uprofeto Daniele a kuata, wa mola Mesiya wa setãhãla “omõla omunu,” wa ĩhĩwa “uviali lulamba ku Ukuasimbu,” okuti Yehova Suku. * (Daniele 7:13, 14) Omo liaco, Suku Ukuonene wosi, eye wa eca ku Yesu unene kuenda omoko yoku viala kuenda oku sombisa. Okavalu kayela kalomboloka uyaki umue wesunga, u lingiwa Lomõla wa Suku momo Embimbiliya olonjanja vialua li lekisa evala liyela, oco li lomboloke esunga.—Esituluilo 3:4; 7:9, 13, 14.

Otembo yipi olokavalu via fetika upange wavo? Kũlĩhĩsa okuti una o kasi kokavalu katete okuti, Yesu, wa fetika oku endela kokavalu kaco eci a tambula ekolowa. (Esituluilo 6:2) Otembo yipi Yesu a fetika oku viala kilu Ndosoma? Eye ka fetikile oku viala eci a tiukila kilu noke liolofa viaye. Embimbiliya li lekisa okuti eye wa talamẽla. (Va Heveru 10:12, 13) Yesu wa eca kolondonge viaye ondimbukiso ya ponduile oku va kuatisa oku limbuka otembo a sukilile oku talamela kuenda oku fetika oku viala kilu. Eye wa popia okuti kefetikilo liuviali waye, ovitangi voluali vi livokiya. Ku kala ovoyaki, ekambo lioku lia kuenda ovovei. (Mateo 24:3, 7; Luka 21:10, 11) Ovolandu a lekisa okuti ovitangi viaco via fetika kunyamo wo 1914, noke lioku fetika Kuyaki Watete wa Pita Voluali. Embimbiliya li tukula otembo yaco hati, ‘oloneke via sulako.’—2 Timoteo 3:1-5.

Pole, momo lie ovitangi vi kasilili oku livokiya tunde eci Yesu atambula ekolowa liaye kunyamo wo 1914? Momo kotembo yaco Yesu ka fetikile oku viala palo posi pole, wa fetika oku viala kilu. Embimbiliya li lekisa okuti kua fetika uyaki umue kilu kuenda Soma Yesu, o tukuiwavo hati, Mingeli, wa imba palo posi Satana kumue lolondele viaye. (Esituluilo 12:7-9, 12) Satana wa tema calua omo okuti, ka tẽla oku tiukila kilu kuenda wa kũlĩha okuti otembo yosupilako yitito. Pole, ndopo Suku o ka tẽlisa ocipango caye palo posi kuenda o ka kundula Satana. (Mateo 6:10) Kaliye tu kũlĩhisi ndomo otuvalu tukuavo tutatu, tu lekisa okuti tu kasi muẽle “koloneke via sulako.” Una wa endela kokavalu katete o lomboloka Yesu Kristu. Vana va endela kolokavalu vikuavo vitatu, ka va lomboloka omanu. Pole va lomboloka ovitangi vi kasi oku pita voluali.

“Kua tunda okavalu kakuavo ka kuete evala li kusuka kuenda u wa tumãlako vo wĩha omoko yoku imula ombembua kilu lieve, okuti ovo va liponda pokati kuenda vo wĩha osipata yinene.”—Esituluilo 6:4.

Okavalu kaco, ka lomboloka uyaki. Limbuka okuti ka ko pile lika ombembua yolofeka vimue, pole kopa ombembua yoluali luosi. Kunyamo wo 1914, oco uyaki watete wa pita voluali wa fetika. Noke liotembo yimue, kua pita uyaki ukuavo voluali okuti watete u sule. Omanu vamue va tava okuti tunde kunyamo wo 1914, etendelo liomanu va fa kovoyaki, li pitãhala 100 colohuluwa viomanu! Handi vali, vetendelo liaco ka mua kongelele olohuluwa viomanu va linga ovilema omo liovoyaki aco.

Anga hẽ ovoyaki a linga ondimbukiso yimue koloneke vilo? Ndeci ca pita kosimbu, omanu va mõleha ndu okuti va kuete unene woku kundula omuenyo womanu vosi. Ndaño muẽle ovisoko vi li tukula okuti vi kuete unene woku tumbika ombembua, ndeci Olonações Unidas, ka vi tẽla oku tateka okavalu ka kusuka oku tẽlisa ocikele caye.

“Nda mola okavalu katekãva kuenda u wa tumãlako o kuete ombalãsa peka. Nda yeva ondaka ya tunda pokati koviendalomuenyo vikuãla ya popia yiti: ‘Okilu yimosi yotiliku yi landiwa lodenariu yimosi kuenda olokilu vitatu viosevata vi landiwavo lodenariu yimosi; kuenje ulela lovinyu ku ka vi nyõle.’”—Esituluilo 6:5, 6.

Okavalu kaco ka lomboloka onjala. Ekalo lia laikele oku tatama calua, momo Embimbiliya li lekisa okuti okilu yimosi yotiliku ya laikele oku landiwa lodenariu yimosi, okuti koloneke via Yesu, ya kala ofeto onalavayi ya enda oku tambula veteke limosi! (Mateo 20:2) Londando yaco, ca tavele oku landa olokilu vitatu viosevata okuti, otiliku ya velapo. Onjongo yaco nda ya tekula ndati epata limue linene? Ondaka yaco ya popiavo okuti omanu va sukila oku tetelẽla ulela lovinyu okuti, ovina omanu va enda oku lia koloneke viaco kuenda kocitumãlo ocitumasuku eci ca sonehiwila.

Anga hẽ okavalu kaco ka fetika oku tẽlisa ocikele caye oku upisa kunyamo wo 1914? Ocili muẽle! Ci soka 70 kolohuluwa viomanu va fa lonjala kocita ca 20. Ulandu umue wa lekisa okuti “kanyamo o 2012 toke 2014, ci soka 805 violohuluwa viomanu va vela calua omo liekambo liokulia.” Ombialli yimue ya popia hati: “Anyamo osi, onjala yi ponda omanu valua okuti uveyi wo AIDS, o malária kuenda otumbe vi sule.” Kua siata oku lingiwa alikolisilo alua oco ku tekuiwe omanu va kasi lonjala. Pole alikolisilo aco ka a tateka okavalu katekãva oku tẽlisa ocimãho calio.

“Noke nda mola okavalu ka yeluluka kuenda u wa tumãlako o kuete onduko okuti Kufa. Kuenje Eyambo lio kuama. Va va ĩha omoko kombandu yakuãla yo kilu lieve, okuti va ponda losipata, lonjala, lefengi li ponda kuenda ovinyama via tema vio kilu lieve.”—Esituluilo 6:8.

Okavalu kakuãla ka lomboloka olofa omo liovoveyi kuenda ovitangi vikuavo. Noke yunyamo wo 1914, uvei umue u tukuiwa hati, grípe Espanyola wa ponda omanu valua. Citava okuti ci soka 500 kolohuluwa viomanu va kuata uveyi waco. Kotembo yaco pokati komanu 3, omunu 1 wa kuatiwa luveyi waco!

Uveyi wo grípe Espanyola wa kala lika efetikilo. Olonoño vi popia okuti kocita ca 20, omanu valua va fa omo liuveyi wocingongo. Toke koloneke vilo, ndaño okuti uloño watiamẽla koku sakula u kasi oku amamako, ovoveyi ndeci, o AIDS, o tumbe kuenda o malária, a kasi oku ponda omanu valua.

Omo liaco, omanu valua va siata oku fa, omo liovoyaki, onjala kuenda ovoveyi. Onjembo ka yi kuete ohenda momo, yi kasi oku amamako oku tambula omanu.

Oloneke viohali ndopo vi sulila. Ivailuka okuti: Yesu ‘wa tundila ale oku yula’ kunyamo wo 1914 kuenda wa imba Satana kilu lieve. Pole, handi ka tẽlisile oku yula kuaye. (Esituluilo 6:2; 12:9, 12) Ndopo, vuyaki wo Armagedo, Yesu o ka malako ovitangi Satana a siata oku tu kokela kuenda o ka kundula omanu vana va tiamẽla ku Satana. (Esituluilo 20:1-3) Yesu ka ka tateka lika olokavalu vikuavo oku tẽlisa ovikele vialio, pole o ka malako ovitangi viosi ovio via koka. O ka ci linga ndati? Kũlĩhĩsa olohuminyo vi sangiwa Vembimbiliya.

Ombembua yi ka viala. Momo Yehova “imola ovita toke kesukiyo liongongo. O teya ohonji. O teta pokati onjelia.” (Osamo 46:9) Omanu vana va sole ombembua, “va piñala ofeka, kuenje va sanjukila okusalala kualua.”—Osamo 37:11.

Ka ku ka kala vali onjala, pole ku ka kala okulia kualua. “Vofeka mu kale olomema via lua. Vi hunge hunge kilu liolomunda.”—Osamo 72:16.

Ka ku ka kala vali ovoveyi kuenda oku fa, pole omanu vosi va ka kuata uhayele uwa kuenda omuenyo ko pui. Suku, “o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.”—Esituluilo 21:4.

Eci Yesu a kala palo posi, wa lekisa ndomo omuenyo wetu u ka kala kovaso yoloneke eci eye a ka viala ongongo. Eye wa longisa omanu oku kala lombembua, wa linga ocikomo coku tekula omanu valua, wa sakula ava va vela kuenda wa pindula omanu va file.—Mateo 12:15; 14:19-21; 26:52; Yoano 11:43, 44.

Ndopo olokavalu vikuãla, vi ka tẽlisa ovikele vialio. Olombangi Via Yehova, vi sanjukila oku ku lekisa Vembimbililiya liove ndomo o pondola oku lipongiyila eteke liaco. O tava hẽ oku lilongisa ovina vikuavo viatiamẽla kulandu waco?