Etu tu pondola oku sumua eci ekamba limue li kasi oku tala ohali omo liuvei wovisimĩlo. Pole, tu pondola oku lekisa ndomo tuo kapako poku kuatisa ekamba lietu oco a tẽle oku liyaka lohali yi kokiwa luvei wovisimĩlo. Tu pondola oku ci linga ndati?

‘Kala ukuanjanga koku yevelela.’—TIAGO 1:19.

Yimue pokati kolonjila via velapo o pondola oku kuatisa ekamba liove, poku u yevelela eci a yongola oku vangula. Ove ku sukila oku tambulula ovina viosi eye a popia. Pole, eye o sukila oku limbuka okuti ove o kasi oku u yevelela kuenda wo kapako. Seteka oku kuata elomboloko ndomo eye a liyevite kuenda ku ko pise. Ivaluka okuti, eye o pondola oku popia ovina ka yonguile kuenje noke o livela. —Yovi 6:2, 3.

“Lembeleka.” —1 VA TESALONIKE 5:14.

Ekamba liove li pondola oku sakalala ale oku liyaka lovisimĩlo viokuti ka kuete esilivilo. Poku u lekisa okuti wo kapako, ove o pondola oku u lembeleka loku u vetiya ndaño ceci kua kũlĩhĩle eci o sukila oku vangula.

“Ekamba liocili li lekisa ocisola otembo yosi.”—OLOSAPO 17:17.

Eca ekuatiso li sukiliwa. Ku ka sime ño okuti wa kũlĩha ale ndomo u kuatisa, pole, pulisa eci ove o pondola oku linga. Nda ekamba liove ka li tẽla oku lombolola eci li sukila, seteka oku imba onumbi yocina cimue ci kuatisa vu pondola oku lingila kumosi  ndeci, oku tunda loku ka nyula ocitumãlo cimue. Ale o pondola oku lieca olumue oco u kuatise oku landa ovina a sukila vovenda, oku yelisa onjo yaye ale upange ukuavo. —Va Galatia 6:2.

“Pandikisa.”—1 Va TESALONIKE 5:14.

Ekamba liove ka li ka kuata onjongole yoku vangula olonjanja viosi. Ivaluisa ekamba liove okuti eci eye a kuata onjongole yoku vangula, ove u ko yevelela. Ekamba liove omo liuvei, li pondola oku vangula ale oku linga ocina cimue okuti ku ka ci sola. Eye o pondola oku nyõla asokiyo amue ale oku tema. Lekisa epandi kuenda kuata elomboloko liekalo liaye osimbu o lieca olumue oco u kuatise kovina a sukila. —Olosapo 18:24.

“Ndi linga cosi ci tava oco eye a kolele okuti ndi ekamba limue a pondola oku sapela lalio. Ndaño okuti si tẽla oku malako ovitangi viaye, pole, olonjanja viosi, ndi seteka oku yevelela ovina a yongola oku popia. Olonjanja vimue, ocina eye a sukila, omunu umue u yevelela kuenje eye o liyeva ciwa.” —Farrah, a ukãi umue okuti ekamba liaye li tala ohali omo liuvei woku sakalala kuenda woku sumua calua.

“Umue pokati kakamba vange, ukuacikembe kuenda ukuakuvetiya. Eye wa ndi laleka konjo yaye kuenje tua lia okulia kumue ku pepa. Eye wa lekisa ocisola calua kuenda wa lingisa okuti ci leluka kokuange oku situlula ovisimĩlo viange. Eci ca ndi vetiya calua!”—Ha-eun, o kasi oku tala ohali omo liuvei woku sumua calua.

“Epandi li kuete esilivilo lialua. Eci ukãi wange a linga ocina cimue ci ndi sumuisa, ndivaluka okuti uvei waye owo wo kokela oku ndi sumuisa, pole, eye muẽle hayeko. Eci ci ndi kuatisa oku yuvula oku tema loku kuata elomboloko liekalo liaye.” —Jacob, okuti ukãi waye o kasi oku liyaka luvei woku sumua calua.

“Ukãi wange wa siata oku ndi kuatisa calua loku ndi lembeleka. Eci ndi lemelẽlua lasakalalo, eye lalimue eteke a ndi kisikile oku linga ocina cimue si yongola oku linga. Olonjanja vimue, eci ci lomboloka okuti eye ka pondola oku linga ocina cimue eye a sole oku linga. Ocituwa caye coku lieca olumue kuenda coku kala ukuacali ka ci sokisiwa.”—Enrico, okuti o kasi oku liyaka luvei wesakalalo.