1, 2. Nye ci pamisa ekolelo lietu liokuti, ocipango ca Suku catiamẽla komanu ci ka tẽlisiwa, kuenda momo lie? (Tala elitalatu kefetikilo liocipama cilo.)

ETU Tulombangi Via Yehova, tua siata oku kundila omanu okuti, Usoma wa Suku, owo lika u ka malako ovitangi viosi tu liyaka lavio. Tu tava hẽ okuti Usoma waco wocili muẽle, kuenda ocipango ca Suku ci ka tẽlisiwa lekuatiso Liusoma waco? Momo lie tu sukilila oku kolela Kusoma waco?—Va Heveru 11:1.

² Lekuatiso Liusoma wa Mesiya, ocipango ca Yehova catiamẽla komanu, ci ka tẽlisiwa. Omoko ya Yehova yoku viala, oyo ociseveto ca pama Cusoma waco. Helie Ombiali Yusoma waco? Velie va ka vialavo Lombiali yaco? Velie va ka vialiwa lusoma waco? Yehova wa sokiya ale vana va ka panga onepa Vusoma waco lekuatiso liovisila a linga. Ovisila viaco viocili, momo via sokiyiwa la Yehova kumue lomõlaye Yesu Kristu. Nda tua konomuisa ovisila viaco, ci tu kuatisa oku kuata elomboloko li lekisa ndomo ocipango ca Yehova ci ka tẽlisiwa, kuenda esunga lieci tu sukilila oku kolela okuti, Usoma waco ka u ka nyõliwa.—Tanga Va Efeso 2:12.

3. Nye tu konomuisa vocipama cilo, kuenda cikuavo ci kuãimo?

 ³ Embimbiliya li tukula ovisila epandu vi kuete elitokeko Lusoma wa Mesiya una u ka vialiwa la Yesu Kristu. Ovisila viaco vievi: (1) Ocisila ca Avirahama. (2) Ocisila Cocihandeleko. (3) Ocisila ca Daviti. (4) Ocisila cocitunda ci sokisiwa la Melikicedeke. (5) Ocisila cokaliye. (6) Ocisila Cusoma. Omo liaco, tu konomuisi ndomo ocisila locisila ca tukuiwa ndeti, ci kuete elitokeko Lusoma, oco ocipango ca Yehova catiamẽla kongongo, kuenda komanu ci tẽlisiwe. Tala omapa losapi hati: “ Ndomo Suku a ka Tẽlisa Ocipango Caye.”

4. Ovihandeleko vipi Yehova a sokiya vi tiamisiwila komanu, ndomo via tukuiwa kelivulu Liefetikilo?

⁴ Yehova wa pongiya ciwa ongongo oco tu kalemo. Noke, wa sokiya ovihandeleko vi kuãimo ndeci: (1) Wa laikele oku lulika omanu lesetahãlo liaye. (2) Omanu va laikele oku pongolola ongongo oco yi linge yokaliye okuti, va yi yukisa lomãla vavo vakuesunga. (3) Omanu ka va kuatele omoko yoku lia kepako liuti woku kũlĩha eci ciwa leci cĩvi. (Efetikilo 1:26, 28; 2:16, 17) Ovihandeleko vitatu via tukuiwa ndeti, vi situlula ocipango ca Yehova catiamẽla kongongo, kuenda komanu. Momo lie Yehova a sokiyila ovisila viaco?

5, 6. (a) Satana wa seteka ndati oku tateka oku tẽlisiwa kuocipango ca Suku? (b) Yehova wa tetulula ndati ocitangi cesino ca lekisiwa Vocumbo Cedene?

⁵ Satana wa lekisa esino ku Yehova, kuenda kocipango caye. Omo wa yonguile okuti omanu ka va pokola ku Yehova, wa vetiya Heva oco a lie kepako liuti woku kũlĩha eci ciwa leci cĩvi. (Efetikilo 3:1-5; Esituluilo 12:9) Poku ci linga, wa kapa vatatahãi omoko ya  Yehova yoku viala ovina viosi a lulika. Noke, wa lundilavo omanu hati, va fendela lika Yehova omo liovina viwa va tambula kokuaye.—Yovi 1:9-11; 2:4, 5.

⁶ Nye Yehova a sukilile oku linga oco a tetulule ocitangi cesino liaco? Eye, nda wa ci linga poku va ponda omo liesino va lekisa. Pole, ocipango caye catiamẽla kongongo kuenda komãla va Adama, nda ka ca tẽlisiwile. Eli olio esunga lieci Yehova ka nõlelepo oku va ponda. Omo liaco, wa tukula ocitumasuku cimue, cohuminyo vocumbo Cedene. Kuenje, ca eca uvangi wokuti olondaka viosi via tukuiwa volohuminyo via Yehova viatiamẽla kongongo kuenda komanu vi ka tẽlisiwa.—Tanga Efetikilo 3:15.

7. Ohuminyo ya lingiwa Vocumbo Cedene yi situlula nye catiamẽla konyõha, kuenda kombuto yaye?

⁷ Vohuminyo ya lingiwa Vocumbo Cedene, Yehova wa popia hati, onyõha okuti Satana, kuenda ombuto yaye okuti yi lomboloka omanu vana ka va pokola kuviali waye, va ka pondiwa. Yehova wa eca kombuto yukãi omoko yoku ponda omanu vakuesino. Omo liaco, ohuminyo ya lingiwa Vocumbo Cedene ya situlula okuti, Satana kumue lovitangi vi tunda kesino liaye, ka vi ka kalako vali. Ohuminyo yaco, yi lekisavo ndomo ovina viaco vi ka lingiwa.

8. Nye tu pondola oku lilongisa catiamẽla kukãi, kuenda kombuto yaye?

⁸ Helie wa laikele oku kala ombuto yukãi? Ombuto yaco, omunu umue wespiritu. Momo lie? Momo, o ka ‘nyõla’ Satana, una ka muiwa lovaso. (Va Heveru 2:14) Ukãi wa laikele oku cita ombuto yaco, ka muiwavo lovaso. Eci Yehova a linga ohuminyo vocumbo Cedene, ombuto yonyõha ya fetika oku livokiya. Pole, vokuenda kueci ci soka 4.000 kanyamo, ka ca lelukile oku kuata elomboloko liatiamẽla kukãi, kuenda kombuto yaye. Vokuenda kuanyamo aco, Yehova wa sokiya ovisila vialua via laikele oku situlula ombuto, kuenda oku lekisa ndomo a ka tetulula ovitangi vi tunda kesino lia Satana.

9. Ocisila Yehova a linga la Avirahama ci lomboloka nye, kuenda otembo yipi ca fetika oku kuata esilivilo?

⁹ Noke lioku pita 2.000 kanyamo tunde eci ohuminyo ya lingiwa Vocumbo Cedene, Yehova wa sapuila Avirahama oco a tunde volupale luo Uri muna a kala okuti, enda kofeka yo Kanana. (Ovilinga 7:2, 3) Yehova wo sapuila hati: “Tunda vofeka yene lokovangandiove, lokoluse luove, kuende toke kofeka hu ... lekisa. Hu lingisa ofeka yinene; hu sumũlũisa; ñemalisa onduko yove okuti omanu va ku sumũlũhila. Ava va ku sumũlũĩsa ndi va sumũlũĩsa, lu o ku siñala ndu siñala; apata osi oluali a sumũlũhila kokuove.” (Efetikilo 12:1-3) Ohuminyo Yehova a lingile ku Avirahama yi tukuiwa okuti, ocisila ca Avirahama. Ka tua kũlĩhĩle otembo Yehova a linga  onjanja yatete ocisila caye la Avirahama. Pole, tua kũlĩha okuti, ocisila caco ca fetika oku kuata lika esilivilo oku upisa kunyamo wo 1943 osimbu Yesu keyile handi palo posi, eci Avirahama a kuatele 75 kanyamo. Momo kotembo yaco, oco a tunda kofeka yo Harane, kuenje wa yoka Olui Eufrate.

10. (a) Avirahama wa lekisa ndati okuti, wa kolelele kolohuminyo via Yehova Suku? (b) Ovina vipi vikuavo Yehova a situlula viatiamẽla kombuto yukãi vokuenda kuotembo?

¹⁰ Yehova wa pitulula ohuminyo yaye ku Avirahama olonjanja vialua okuti, poku ci linga, wa enda oku vokiyako olonumbi vikuavo. (Efetikilo 13:15-17; 17:1-8, 16) Ekolelo Avirahama a lekisile kolohuminyo via Yehova, lio vetiya oku eca omõlaye Isake ndocilumba. Kuenje, ovina viaco via vetiya Yehova oku lekisa ku Avirahama okuti, olohuminyo viosi a linga kokuaye wa laikele oku vi tẽlisa. (Tanga Efetikilo 22:15-18; Va Heveru 11:17, 18.) Vokuenda kuotembo eci ocisila ca Avirahama ca fetika oku kuata esilivilo, Yehova wa situlula olonumbi vikuavo viatiamẽla kombuto yukãi. Ombuto ya likuminyiwa, ya laikele oku tunda kepata lia Avirahama okuti, mua kongeliwavo omanu valua va laikele oku linga olosoma vi ka nyõla ovanyãli vosi va Yehova. Kuenje omanu valua va ka tambula asumũlũho ka a pui.

11, 12. Ovisonehua vi lekisa ndati okuti, ocisila ca Avirahama ci ka tẽlisiwa, kuenda ci lomboloka nye kokuetu?

¹¹ Olohuminyo Yehova a linga ku Avirahama, via fetika oku tẽlisiwa eci ovitumbulukila via Avirahama via piñala Ofeka Yohuminyo. Pole, Embimbiliya li lekisa okuti, ocisila caco ca laikele oku nena asumũlũho alua. (Va Galatia 4:22-25) Upostolo Paulu wa lombolola okuti, Yesu Kristu eye onepa yatete yombuto ya Avirahama. Etendelo lieci ci soka 144.000 Kakristão olombuavekua, olio onepa yavali yombuto ya Avirahama. (Va Galatia 3:16, 29; Esituluilo 5:9, 10; 14:1, 4) Ukãi wa tukuiwa vohuminyo ya lingiwa vocumbo Cedene, o lomboloka onepa yocisoko ca Yehova ci kasi kilu.  Ukãi waco o tukuiwa hati, o “Yerusalãi yokilu,” muna mua kongeliwa ovangelo vakuekolelo. (Va Galatia 4:26, 31) Ohuminyo ya lingiwa vocisila ca Avirahama yi lekisa okuti, ombuto yukãi ya laikele oku nena asumũlũho ka a pui komanu vosi.

¹² Ocisila ca Avirahama, ceca uvangi wa suapo watiamẽla Kusoma wokilu, kuenda wa yulula onjila oco soma kumue la vana va ka viala laye va piñale Usoma waco. (Va Heveru 6:13-18) Ocisila caco ca laikele oku kala otembo yiñami? Elivulu Liefetikilo 17:7, li lekisa okuti, ‘ocisila caco ka ci pui.’ Momo, ci ka amamako toke eci Usoma wa Suku u ka nyõla ovanyãli vosi, kuenje, apata omanu vosi o kilu lieve, a ka tambula asumũlũho ka a pui. (1 Va Korindo 15:23-26) Asumũlũho a tunda kocisila caco, ka a kuete esulilo. Omo liaco, ocisila Yehova Suku a linga la Avirahama ceca uvangi wokuti, ocipango caye catiamẽla koku yukisa ‘ilu lieve liosi’ lomanu vakuesunga ci ka tẽlisiwa.—Efetikilo 1:28.

13, 14. Ocisila ca Daviti ceca ohuminyo yipi yatiamẽla kusoma wa Mesiya?

¹³ Ohuminyo ya lingiwa vocumbo Cedene, kuenda ocisila ca Avirahama, vi tu longisa okuti, uviali wa Yehova wa siata oku tiamisiwila kolonumbi viaye viesunga. Omo liaco, Usoma wa Mesiya Yehova a tumbika, wa siatavo oku tiamisiwila kolonumbi viaco. (Osamo 89:14) Anga hẽ, Usoma wa Suku ka u ka kala wesunga? U ka sukila hẽ oku piñanyiwa Lusoma ukuavo? Ocisila cikuavo ca lingiwa ceca uvangi wokuti, ka u ka piñanyiwa.

¹⁴ Kosimbu, Yehova wa lingile ohuminyo yimue ku Soma Daviti wo ko Isareli. Ohuminyo yaco yi tukuiwa hati, ocisila ca Daviti. (Tanga 2 Samuele 7:12, 16.) Yehova wa likuminyile okuti, Mesiya wa laikele oku tunda pokati kocitumbulukila ca Daviti. (Luka 1:30-33) Omo liaco, Yehova wa ecele olonumbi viatiamẽla kepata Mesiya a laikele oku citiwila. Kuenje, Yehova wa lekisa okuti Mesiya, eye ‘o sesamẽla’ oku kala Soma Yuviali waco. (Esekiele 21:25-27) Usoma wa Daviti u ka kala otembo ka yi pui, momo, Yesu ukuacitumbulukila ca Daviti, ‘o kala otembo ka yi pui, kuenda ocalo caye ca amamako ndekumbi.’ (Osamo 89:34-37) Tua kolela okuti, Usoma wa Mesiya u ka viala lesunga, kuenda u ka eca komanu asumũlũho ka a pui!

15-17. Ndomo ca lekisiwa vocisila cocitunda ci sokisiwa la Melikicedeke, ocikele cipi cikuavo ombuto ya laikele oku tambula, kuenda momo lie?

¹⁵ Ocisila ca Avirahama, leci ca Daviti, vi lekisa okuti, ombuto yukãi ya laikele oku vialekiwa komangu yusoma. Pole, oco omanu vosi va tambule asumũlũho, ombuto yaco ya sukilile oku linga upange walua okuti, woku kala lika osoma u sule. Ombuto yaco ya sukililevo  oku kala ocitunda. Momo, ocitunda oco lika ci kuete omoko yoku eca ovilumba vi sukiliwa okuti, omanu va yovoka kekandu, oco va pange onepa kepata lia Yehova li kasi kilu, kuenda palo posi. Oco ku kale uvangi u lekisa okuti ombuto yaco ya laikele oku kala ocitunda, Yehova wa linga eliangiliyo likuavo liocisila cocitunda ci sokisiwa la Melikicedeke.

¹⁶ Lekuatiso lia Soma Daviti, Yehova wa situlula okuti, wa laikele oku linga ocisila la Yesu. Vocisila caco, mua kongela ovina vivali ndeci: Catete, Yesu wa laikele oku tumala ‘kondio ya Suku,’ kuenda oku kuata omoko yoku yula ovanyãli vaye vosi. Cavali, Yesu wa laikelevo oku kala “ocitunda oloneke ka vi pui, ndeci ca linga Melikicedeke.” (Tanga Osamo 110:1, 2, 4.) Momo lie Yesu a sukilile oku kala “ndeci ca linga Melikicedeke”? Osimbu handi ovitumbulukila via Avirahama ka via tambuile Ofeka Yohuminyo, Melikicedeke wa kala osoma yolupale luo Salemi, kuenda wa kalavo “ocitunda ca Suku Fũ.” (Va Heveru 7:1-3) Yesu wa nõliwa la Yehova oco a linge osoma kuenda ocitunda. Pole, Melikicedeke eye lika wa kuata ovikele viaco vivali osimbu Yesu ka nõliwile, oco a tambule ovikele viaco. Omo okuti ka kuli uvangi u lekisa okuti kua kala umue wa kuata ovikele ndevi via Melikicedeke, ci lekisa okuti, Yesu eye ‘ocitunda otembo ka yi pui.’

¹⁷ Lekuatiso liocisila caco, Yesu eye wa nõliwa la Yehova oco a linge ocitunda. Omo liaco, Yesu ‘o ka amamako oku kala ocitunda, ndeci ca linga Melikicedeke.’ (Va Heveru 5:4-6) Ocisila caco ci lekisa okuti, Yehova wa likuminya oku tẽlisa ocipango caye catiamẽla komanu, kuenda kongongo lekuatiso Liusoma wa Mesiya.

18, 19. (a) Ovisila vitatu tua konomuisa vi kuete elitokeko lipi Lusoma? (b) Nye tu ka konomuisa vocipama ci kuãimo?

¹⁸ Toke cilo, tua lilongisa ndomo ocisila locisila ci kuete elitokeko Lusoma wa Mesiya, kuenda ndomo Usoma u tiamisiwila kovisila viaco. Ohuminyo ya lingiwa vocumbo Cedene, yi lekisa okuti, lekuatiso liombuto yukãi, Yehova o ka tẽlisa ocipango caye catiamẽla komanu, kuenda kongongo. Ocisila ca Avirahama ci situlula omunu o lomboloka ombuto, kuenda ocikele ombuto ya laikele oku tambula.

¹⁹ Ocisila ca lingiwa la Daviti, ci lombolola ovina vikuavo viatiamẽla kepata Mesiya a citiwila. Ocisila caco cecavo ku Yesu omoko yoku viala ongongo otembo ka yi pui. Ocisila cocitunda ci sokisiwa la Melikicedeke, ceca ohuminyo yokuti, ombuto ya laikele oku kala ocitunda. Pole, Yesu hayeko lika o ka kuatisa omanu oco va lipue. Kulivo omanu vakuavo va nõliwa oco va linge olosoma, kuenda ovitunda. Pi va tunda? Epulilo eli, li ka tambuluiwa vocipama ci kuãimo.