1. Nye Yehova a pondola oku yeva vutima catiamẽla kupange, kuenda nye a linga?

YEHOVA wa sanjukila upange waye. (Osamo 135:6; Yoano 5:17) Eye, o yongola okuti, ovangelo kumue lomanu va sanjukilavo upange va tambula kokuaye, momo u nena esanju. Yehova wa kongelele Omõlaye wongunga vupange woku lulika ovina. (Tanga Va Kolosai 1:15, 16.) Embimbiliya li tu sapuila okuti, osimbu Yesu keyile handi palo posi, wa kala la Suku kilu “ndomesele.”—Olosapo 8:30.

2. Tua kũlĩha ndati okuti ovangelo va siata oku tambula upange u kuete esilivilo haiwo u va nenela esanju?

² Oku upisa kelivulu Liefetikilo toke Liesituluilo, Embimbiliya li lombolola okuti, Yehova wa siata oku eca upange kovangelo. Eci Adama la Heva va lueya, kuenje va tundisiwa vocumbo Cedene, Yehova wa ecele kovangelo ocikele cimue. Kelivulu Liefetikilo ku lekisa okuti, Suku “wa kapa va Keruvi, losipata yondalu yi pongolokela kuosi oku lava onjila yo kuti womuenyo.” (Efetikilo 3:24) Elivulu Liesituluilo, li tu longisa okuti, Yehova wa “tuma ungelo waye oku lekisa kakuenje vaye [ovina] vi laika oku iya ndopo,” ale oku situlula ovina vi keya kovaso yoloneke.—Esituluilo 22:6.

3. Eci Yesu a kala palo posi wa kuama ndati ongangu ya Isiaye?

³ Eci Yesu a kala palo posi, wa sanjukilile upange Yehova a ecele kokuaye. Kuenje, wa kuama ongangu ya Isiaye poku eca kolondonge viaye upange umue u kuete esilivilo lia velapo. Yesu wa ecelela okuti, olondonge viaye vi sanjukila upange a ecele kokuavo poku vi sapuila hati: “Mopia lene siti, Ocili [ndu ku sapuili okuti,] u o ñolela, ovilinga ndingainga ovilingavo, kuenda o lingavo ovilinga via velapo vali okuti evi vi sule, momo ame ngenda ku Isia.” (Yoano 14:12) Yesu wa kuatisa olondonge viaye oku limbuka okuti, via sukilile oku linga lonjanga upange via tambula poku vi sapuila hati: “Ca tu sesamẽla oku linga upange [wa una] wa numa osimbu kuli utanya; eci uteke wiya, lomue o tẽla oku linga upange.”—Yoano 9:4.

4-6. (a) Momo lie tu sukilila oku eca olopandu ku Noha, kuenda ku Mose omo lioku tẽlisa upange Yehova a ecele kokuavo? (b) Ovina vipi vivali vi tunda kupange Yehova a eca komanu?

⁴ Osimbu Yesu keyile palo posi, Yehova wa ecele komanu upange umue u va nenela esanju. Ndaño okuti Adama la Heva ka va tẽlisile upange va tambuile, pole, omanu valua va malusula upange Yehova a ecele kokuavo. (Efetikilo 1:28) Yehova wa ecele ku Noha olonumbi vi lekisa ndomo a sukilile oku tunga ocimbaluku, oco eye kumue lepata liaye va puluke Ketande lia laikele oku iya. Kuenje, Noha wa linga ndomo Yehova o sapuila. Koloneke vilo, tu kasi komuenyo omo okuti Noha wa kuama lutate olonumbi Yehova a ecele kokuaye.—Efetikilo 6:14-16, 22; 2 Petulu 2:5.

⁵ Yehova wa ecele ku Mose olonumbi a sukilile oku kuama oco a tunge otavernakulu, kuenda ndomo ovitunda via sukilile oku linga upange waco. Omo liaco, Mose wa linga upange waco ndomo Yehova o sapuila. (Etundilo 39:32; 40:12-16) Koloneke vilo, nye tu lilongisa kupange Mose a linga, kuenda epokolo a lekisa? Ndomo upostolo Paulu a ci lombolola, otavernakulu kuenda ovitunda, via lombolokele ovina viwa via laikele oku pita kovaso yoloneke.—Va Heveru 9:1-5, 9; 10:1.

⁶ Osimbu ocipango ca Yehova ci kasi oku amamako oku tẽlisiwa, afendeli vaye va siata oku tambula ovikele via litepa. Ndaño okuti pamue vamanji vamue va siata oku pongoluiwa kupange wavo, pole, va amamako oku eca esivayo ku Yehova, kuenda oku kuatisa omanu vakuavo. Cimuamue haico ca pita la Yesu kupange a linga osimbu keyile palo posi, kuenda eci a kala palo posi. (Yoano 4:34; 17:4) Koloneke vilo, eci tu tẽlisa ovikele Yehova a tu ĩha, upange wetu weca esivayo kokuaye. (Mateo 5:16; tanga 1 Va Korindo 15:58.) Momo lie tu popela ndoco?

7, 8. (a) Lombolola upange Akristão va siata oku linga koloneke vilo. (b) Tu pondola oku lekisa ndati epokolo kolonumbi via Yehova?

⁷ Tu sanjuka calua poku limbuka okuti Yehova wa siata oku laleka omanu ka valipuile oco va linge upange waye. (1 Va Korindo 3:9) Kuli vamanji vamue va kuete ocikele coku songuila upange woku tunga, ndeci Noha la Mose va linga. Vamanji vakuavo va siata oku kuatisa kupange woku tunga Olonjango Violohongele  vinene, Olonjango Viusoma, kuenda Olobetele. Cikale okuti o kasi oku kuatisa kupange woku semulula Onjango Yusoma, ale koku tunga Ombala Yolombangi Via Yehova ko Nova Yorke yi tukuiwa hati, Warwick, sanjukila ocikele caco! (Tala elitalatu kefetikilo liocipama cilo.) Upange waco u kola. Ndaño vamanji vamue va kasi kupange woku tunga wa tukuiwa ndeti, pole, Akristão vosi vocili va kasi oku linga upange woku kunda okuti u pamisa ekolelo. Momo weca esivayo ku Yehova, kuenda u kuatisa omanu. (Ovilinga 13:47-49) Ocisoko ca Yehova ca siata oku songuila upange woku kunda. Pamue, tu pondola oku tambula ocikele cokaliye.

⁸ Afendeli va Yehova vakuekolelo, va siata oku lekisa ombili poku kuama olonumbi viaye. (Tanga Va Heveru 13:7, 17.) Pamue ka tu kuata elomboloko lieci va tu pongoluila kupange ukuavo, ale olonumbi viokaliye. Pole, tu sukila oku pokola kapongoloko aco, momo olonumbi viaco vi tunda ku Yehova kuenda vi ka eca onima yiwa.

9. Ongangu yipi yiwa akulu vekongelo va siata oku lekisa?

⁹ Akulu vekongelo va siata oku lekisa onjongole yoku linga ocipango ca Yehova poku songuila ekongelo. (2 Va Korindo 1:24; 1 Va Tesalonike 5:12, 13) Ovo va siata oku likolisilako oku linga upange, loku kuama olonumbi, kuenda oku lilongisa lonjanga olonjila viokaliye vi kuatisa kupange woku kunda. Va siatavo oku limbuka onima yiwa eci va linga esokiyo lioku kundila omanu lotelefone, kuenda oku kundila volokololo. Pole, vamanji vamue va kuete atatahãi poku kuama olonumbi viaco viokaliye kupange woku kunda. Vamanji vakuãla okuti akundi votembo yosi vo kofeka yo Alemanya, va nõlapo oku ka kundila vocikanjo colomĩlu okuti, pa pita ale otembo yalua tunde eci vamanji vamue va kundilamo. Manji umue o tukuiwa hati Michael, wa popia hati va kuata usumba, momo pa pita otembo yalua tunde eci va lingile upange waco. Eye wa amisako hati: “Yehova wa kũlĩha esakalalo lietu, momo eteke limue komẽle, tua linga upange wa tu nenela onima yiwa. Tua kuatavo esanju lialua omo lioku kuama olonumbi vi sangiwa Vupange Wetu Wusoma, kuenda oku kolela ku Yehova!” O kuete hẽ onjongole yoku seteka oku kuama olonumbi viokaliye poku kundila vocikanjo cove?

10. Apongoloko api a lingiwa vocisoko ca Yehova vokuenda kuanyamo a pita?

¹⁰ Olonjanja vimue ko Betele kua siata oku lingiwa apongoloko amue. Vokuenda kuanyamo a pita, Olobetele vimue vitito via yikiwa, kuenje upange waco u kasi oku lingiwila Volobetele vinene. Vamanji va talavaya Volobetele viaco, va siata oku tava kapongoloko a lingiwa. Omo lioku tava  kapongoloko aco, va limbuka esilivilo liaco. (Ukundi 7:8) Omo lionjongole va lekisa, va kuete esanju lioku panga onepa kupange wafendeli va Yehova koloneke vilo!

11-13. Ovitangi vipi vamanji vamue va siata oku liyaka lavio omo liapongoloko a kasi oku lingiwa vocisoko ca Yehova?

¹¹ Tu pondola oku lilongisa ovina vialua ku vamanji va tunda Kolobetele vimue, kuenje va kongeliwa Kolobetele vikuavo. Momo valua pokati kavo va talavaya Kolobetele viaco vokuenda kuanyamo alua. Manji umue o tukuiwa hati Rogelio kumue lukãi waye, va kala ko Betele yimue yitito, kuenje va tumiwa ko Betele yo ko Mesiku kuli vamanji valua. Eye wa popia hati: “Ka ca lelukile oku siapo epata liange kumue lakamba vange.” Manji ukuavo o tukuiwa hati Juan okuti wa tumiwavo ko Betele yo Mesiku, wa kala ndu okuti, ndopo a fetika oku talavaya ko Betele. Eye wa popia hati: “O sukila oku linga ukamba la vamanji vakuavo. Pole, oco o linge ukamba waco, o sukila oku lilongisa ovituwa viokaliye, kuenda oku kapako ovisimĩlo viavo.”

¹² Eci Olobetele vimue vio kocifuka co Europa via kongeliwa, vamanji valua va tumiwa ko Betele yo kofeka yo Alemanya. Eci va ilukila ko Betele yaco, va liyaka lovitangi vialua, momo ka ca lelukile oku tunda vofeka omunu a citiwila. Vamanji vamue va tunda kofeka yo Suisa, va kuatela ongeva olomunda via posoka vio Alpes. Pole, vamanji vakuavo va tunda kofeka yo Austria, va kuatelavo ongeva vamanji vana va kala lavo ko Betele yitito va tunda.

¹³ Vamanji vana va tunda Kolobetele vimue, kuenje va tumiwa Kolobetele vio kolofeka vikuavo, va linga apongoloko alua. Momo va ilukila vohondo yikuavo, oku talavaya la vamanji vakuavo, kuenda pamue va linga upange ukuavo. Va tumiwavo kakongelo akuavo kuna va tambula ovikanjo viokaliye, kuenda pamue va sukila oku lilongisa elimi likuavo. Ndaño okuti ka ca lelukile oku linga apongoloko aco, pole, vamanji vaco va siata oku kuata esanju. Momo lie? Tu konomuisi esunga liaco.

14, 15. (a) Vamanji valua va siata oku lekisa ndati okuti va sanjukila ocikele cavo coku talavaya la Yehova? (b) Nye tu pondola oku lilongisa kokuavo?

¹⁴ Manji Grethel wa popia hati: “Nda tava kelaleko nda tambula, momo poku ci linga, nda lekisa okuti, ocisola cange ku Yehova ka ci sokisiwa leci ndi kuetele ofeka nda citiwila, onjo yimue yiwa, ale ovikele vikuavo.” Manji ukuavo o tukuiwa hati Dayska wa popia hati: “Eci nda ivaluka okuti elaleko liaco lia tunda ku Yehova, nda tava lesanju lialua.” Manji André lukãi waye Gabriela va popia vati: “Oku ilukila kofeka yikuavo kua tu kuatisa oku kuata epuluvi lioku velisapo oku vumba Yehova okuti, ka tu pitisa kovaso olonjongole vietu.” Ovo va sima okuti, nda ocisoko ca Yehova ci linga apongoloko amue, tu sukila oku tava lesanju okuti, ka tu tamãlala kapongoloko a lingiwa.

¹⁵ Eci Olobetele vimue vi kongeliwa, vamanji vamue va siata oku tambula ovikele vioku kala akundi valikasi. Ocitangi caco ca pita la vamanji valua eci o Betele yo kofeka yo Dinamarka, yo Noruega, kuenda yo ko Suesia via kongeliwa, kuenje via linga o Betele yimosi yo Eskandinavia. Manji umue o tukuiwa hati Florian kumue lukãi  waye Anja, va popia vati: “Ndaño lovitangi vimue, pole, tua siata oku sanjukila ocikele cetu cokaliye. Oku linga upange wa Yehova kuosi tu tumiwa, ci tu nenela asumũlũho alua. Omo liaco, tu pondola oku popia tuti, tua siata oku tambula asumũlũho alua!” Ndaño okuti ekalo lietu ka li sokisiwa leli lia vamanji va tukuiwa ndeti, pole, tu pondola oku kuama ongangu yavo poku lekisa onjongole ndeyi yavo, kuenda oku pitisa kovaso Usoma wa Suku. (Isaya 6:8) Tua kolela okuti, Yehova o ka amamako oku sumũlũisa vamanji vana va sanjukila oku linga upange waye kolonepa viosi violuali.

16. (a) Nye ukanda wa Va Galatia 6:4 u tu vetiya oku linga? (b) Ocikele cipi ca velapo tu kuete?

¹⁶ Omo okuti ka tua lipuile, pamue tu kuata ovisimĩlo vioku li sokisa lomanu vakuavo. Pole, Embimbiliya li tu sapuila okuti, tu sukila oku tiamisila utima wetu kovina tu tẽla oku linga. (Tanga Va Galatia 6:4.) Vamue pokati ketu ka tu pondola oku kala akulu vekongelo, akundi votembo yosi, olomisionaliu, ale oku linga upange wo ko Betele. Ndaño okuti ovikele via tukuiwa ndeti viwa, pole, vosi yetu tu kuete ocikele ca velapo coku kunda olondaka viwa, momo tu londingupange via Yehova. Omo liaco, tu sanjukili esumũlũho liaco!

17. Ovitangi vipi tua siata oku liyaka lavio voluali lulo lua Satana ? Momo lie ka tu sukilila oku pua ekolelo?

¹⁷ Omo okuti tu kasi voluali lulo lua Satana, pamue ka tu pondola oku vumba Yehova lonjila yimue ya sunguluka. Pamue tu liyaka lovitangi vimue okuti, ka tu tẽla oku vi tetulula ndeci, oku tata epata, ale oku vela. Pole, tu sukila oku yuvula oku pua epandi. Ndaño lovitangi tua siata oku liyaka lavio, pole, tu sukila oku amamako oku  kundila omanu ovina viatiamẽla konduko ya Yehova, kuenda Kusoma waye. Ocina ca velapo ceci okuti, tu likolisilako oku linga ovina tu tẽla kupange wa Yehova, osimbu tu amamako oku likutilila oco eye a kuatise vamanji vana va kasi oku linga upange walua okuti wetu u sule. Ivaluka okuti, omunu wosi o sivaya Yehova, o soliwe calua laye!

18. Nye tu lavoka kovaso yoloneke, kuenda esumũlũho lipi tu kuete?

¹⁸ Ndaño ka tua lipuile, Yehova wa siata oku ecelela okuti tu linga olondingupange viaye. Koloneke vilo, oku linga upange wa Suku yetu, esumũlũho limue li komõhisa! Tu pondola oku tiamisila utima wetu kovina tu lavoka kovaso yoloneke okuti “omuenyo wocili,” una u ka tu nenela esanju okuti, ka ca lelukile oku u kuata koloneke vilo. Omo liaco, voluali luokaliye, Yehova o ka tu sumũlũisa lomuenyo ko pui wesanju kuenda ombembua.—1 Timoteo 6:18, 19.

19. Ovina vipi viwa Yehova a tu likuminya kovaso yoloneke?

¹⁹ Yehova wa linga ohuminyo yokuti, ndopo tu ka kala voluali luokaliye. Omo liaco, tu sukila oku ivaluka olondaka Mose a sapuilile va Isareli osimbu ka va iñilile Vofeka Yohuminyo. Eye wa va sapuila hati: “Yehova, Suku yove, oku salalisa calua kupange wosi wovaka ove.” (Esinumuĩlo 30:9) Noke liuyaki wo Harmagedo, Yehova o ka eca ongongo komanu va linga upange waye, ndomo a ci likuminya. Omo liaco, ocikele cetu cokaliye ci ka kala oku pongolola ongongo, oco yi linge yokaliye!