1, 2. (a) Momo lie ekongelo lio ko Kolosai lia kalela kohele? (b) Elungulo lipi lia kuatisa vamanji va Kolosai oco vamameko lukamba wavo la Suku?

KOCITA catete, elitokeko Liakristão vekongelo lia va Kolosai lia kala kohele! Vamanji vamue va enda oku popia okuti, omanu vosi va sukila oku pokola Kocihandeleko ca Mose. Vakuavo va enda oku popia okuti, ka ca sungulukile oku kuata ekalo liwa komuenyo. Paulu wa va lungula eci catiamẽla kovitangi va laikele oku kuata omo liovisimĩlo via litepa va kuatele poku va sapuila hati: “Lunguki sanga umue o nyõla etavo liene lovilongua viesanda liaño. Va sole oku tõlisa ño ovisila viomanu [loviholo] violuali, vina ka via tundile ku Kristu.”—Va Kolosai 2:8.

² Akristão olombuavekua nda va pokuile kovisimĩlo viomanu, nda ka va kuatele esumũlũho lioku kala omãla va Suku. (Va Kolosai 2:20-23) Oco Paulu a va kuatise oku amamako lukamba wavo la Suku wa va sapuila hati: ‘Tiamisili ovitima viene kovina vio kilu vio posi havioko.’ (Va Kolosai 3:2) Akristão vaco va sukilile oku ivaluka elavoko liavo  lilikasi, lioku ka kala kilu otembo ka yi pui.—Va Kolosai 1:4, 5.

3. (a) Elavoko lipi Akristão olombuavekua va kuete? (b) Apulilo api tu konomuisa vocipama cilo?

³ Koloneke vilo, Akristão olombuavekua va siatavo oku tiamisila ovitima viavo Kusoma wa Suku, kuenda kelavoko va kuete lioku “piñalela kumue la Kristu” kilu. (Va Roma 8:14-17) Pole, nye ci popiwa catiamẽla Kakristão vana va kuete elavoko lioku kala palo posi? Olondaka via Paulu vi tiamisiwila ndati kokuavo? Va tiamisila ndati ovitima viavo ‘kovina vio kilu’? (Yoano 10:16) Avirahama la Mose, va tiamisilile ovitima viavo kovina vio kilu, ndaño lovitangi va liyaka lavio. Tu kuama ndati ongangu yavo?

4. Akristão va kuete elavoko lioku kala palo posi, va sukila oku tiamisila ndati ovitima viavo kovina vio kilu?

⁴ Akristão va kuete elavoko lioku kala palo posi, va sukila oku tiamisila ovitima viavo kovina vio kilu. Va ci linga poku kapako Yehova, kuenda oku pitisa kovaso Usoma waye komuenyo wavo. (Luka 10:25-27) Eci oco Kristu a linga, kuenda oco tu sukilavo oku linga. (1 Petulu 2:21) Akristão vo kocita catete, va ñualiwile lomanu vana va kuatele ovisimĩlo viesanda, vakuavilongua viesanda, kuenda vana va pitisile kovaso ovokuasi. Cimuamue haico ci kasi oku pita voluali lulo lua Satana koloneke vilo. (Tanga 2 Va Korindo 10:5.) Omo liaco, tu sukila oku kuama ongangu ya Yesu, kuenda oku yuvula ovina viosi vi kapa kohele ukamba wetu la Yehova.

5. Nye tu sukila oku lipulisa etu muẽle catiamẽla kolombongo, kuenda kovokuasi?

⁵ Tua siata hẽ oku ecelela oku yapuisiwa locituwa comanu coku sola olombongo, kuenda ovokuasi oluali lulo? Ovina tu linga, levi tu sima, ovio vi eca uvangi wokuti, tu sole ovina viaco, ale sio. Yesu wa lombolola ondaka yaco poku popia hati: “Oku ku kasi ukuasi wove haiko ku kala utima wove.” (Mateo 6:21) Tu sukila oku lipula etu muẽle, ovina vi kuete esilivilo lia velapo kokuetu. Tua sakalala hẽ loku sandiliya olombongo, loku sokolola oku kuata upange umue uwa woku sanda eteku, ale oku seteka oku kuata ekalo liwa komuenyo? Ale tu yongola oku kuata omuenyo wa leluka, oco tu pamise ukamba wetu la Yehova? (Mateo 6:22) Yesu wa popia okuti, nda tua tiamisila ovitima vietu ‘koku lisolekela ukuasi palo posi,’ tu nyõla ukamba wetu la Yehova.—Mateo 6:19, 20, 24.

6. Tu pondola oku yula ndati uyaki wekambo lietu lioku lipua?

⁶ Omo okuti ka tua lipuile, ca leluka oku kuata ovisimĩlo ka via sungulukile. (Tanga Va Roma 7:21-25.) Nda ka tua kuatele ekolelo kespiritu sandu lia Suku, tu yapuisiwa ‘layele, uholua, kuenda ukahonga,’ kuenje ka tu lekisa esumbilo kovihandeleko via Suku. (Va Roma 13:12, 13) Ndaño tua siata oku liyaka lekambo lietu lioku lipua, pole, tu pondola oku yula uyaki waco nda tua  tiamisila ovitima vietu kovina vio kilu. Oco tu linge ovina viaco, tu sukila oku likolisilako ndomo Paulu a ci popia hati: “Mbeta etimba liange loku li pokuisa [ndupika].” (1 Va Korindo 9:27) Tu sukilavo oku likolisilako oco ka tu ka yapuisiwe. Omo liaco, tu konomuisi ovolandu alume vavali vakuekolelo va linga ovina vi sanjuisa Suku.—Va Heveru 11:6.

7, 8. (a) Ovitangi vipi Avirahama la Sara va kuata? (b) Ovina vipi Avirahama a enda oku sokolola olonjanja viosi?

⁷ Eci Yehova a pinga ku Avirahama oco kumue lepata liaye va ende kofeka yo Kanana, eye wa pokola. Noke, Yehova wo sumũlũisa omo liepokolo kuenda ekolelo a lekisa kokuaye, kuenje Yehova wa linga laye ocisila. Omo liaco, Yehova wo sapuila hati: “Hu lingisa ofeka yinene; [kuenda] hu sumũlũisa.” (Efetikilo 12:2) Avirahama la Sara va pita anyamo alua okuti, ka va kuatele omãla. Anga hẽ Avirahama wa simĩle okuti, Yehova wa ivalako ohuminyo yaye? Kotembo yaco, Avirahama ka kuatele omuenyo wa leluka. Momo wa silepo omuenyo uwa a kuata volupale luo Uri, kuenje wa linga ungende weci ci soka 1.600 kolokilometulu, oco a pitĩle kofeka yo Kanana. Eye kumue lepata liaye, va kala volombalaka okuti, pamue ka va kuatele okulia, kuenda olonjanja vimue va enda oku puluka peka liovingumba. (Efetikilo 12:5, 10; 13:18; 14:10-16) Pole, Avirahama kumue lepata liaye, ka va yonguile oku tiukila volupale luo Uri, muna va kuatele ekalo liwa komuenyo.—Tanga Va Heveru 11:8-12, 15.

⁸ Omo okuti Avirahama ‘wa kolelele Yehova,’ wa yuvula oku tiamisila utima waye ‘kovina via palo posi.’ (Efetikilo 15:6) Eye wa enda oku sokolola ovina Yehova o likuminyile. Omo okuti Yehova wa limbuka ekolelo Avirahama a kuata, wo sapuila hati: “‘Vanja handi kilu, tenda olombungululu nda o ... tẽla oku vi tenda.’ Kuenje wo sapuila hati: ‘Haico ci kala ombuto yove.’” (Efetikilo 15:5) Eci Avirahama a yeva olondaka evi, wa limbuka okuti, Yehova ko wivalele. Poku tala olombungululu olonjanja viosi, ca enda oku ivaluisa Avirahama ohuminyo Yehova a lingile kokuaye yoku u wĩha ovitumbulukila vialua. Eci otembo yaco ya pitĩlapo, Avirahama wa kuata omõla, ndomo Yehova o likuminyile.—Efetikilo 21:1, 2.

9. Tu pondola oku kuama ndati ongangu ya Avirahama?

⁹ Ndeci ca pita la Avirahama, tu kasivo oku lavoka oku tẽlisiwa kuolohuminyo via Yehova. (2 Petulu 3:13) Nda ka tua tiamisilile ovitima vietu kovina vio kilu, tu fetika oku sima okuti, Yehova ka kasi oku tẽlisa lonjanga olohuminyo viaye, kuenje tu tepulula ombili yetu. Citava okuti kosimbu wa enda oku likolisilako kupange wa Yehova ndeci, oku kala ukundi wotembo yosi, ale kupange ukuavo ulikasi. Pole, nye o kasi oku linga cilo? O kasi hẽ oku kuama ongangu  ya Avirahama wa linga upange wa Yehova loku tiamisila utima kasumũlũho a laikele oku tambula kovaso yoloneke? (Va Heveru 11:10) Omo okuti Avirahama wa ‘kolelele Yehova’ Suku, wa tukuiwa okuti, ekamba liaye.—Va Roma 4:3.

10. Pi Mose a kulila?

¹⁰ Mose wa kalavo ulume umue wa tiamisila utima waye kovina vio kilu. Eye, wa kulila vepata lia soma yo ko Egito okuti, kotembo yaco ofeka yo Egito ya kuata unene walua voluali luosi. Embimbiliya li popia okuti, Mose ‘wa longisiwa uloño wosi wa va Egito.’ Kuenje elilongiso liaco lia velapo, lio kuatisa oku kuata unene ‘kueci a popia, kuenda kovina a linga.’ (Ovilinga 7:22) Omo liuloño Mose a kuata, wa kuatele epuluvi lioku kala ulume umue wa velapo kofeka Yegito. Pole, kua kala elongiso likuavo lia kuata esilivilo lia velapo ku Mose.

11, 12. Elongiso lipi lia kuatele esilivilo lia velapo ku Mose? Tua ci kũlĩha ndati?

¹¹ Eci Mose a kala umalẽhe inaye o tukuiwa hati Yokevede wo sapuila ovina viatiamẽla ku Suku ya va Heveru. Ukũlĩhĩso wa Yehova, owo wa velelepo okuti ovina vikuavo vi sule. Kuenje wa siapo ovokuasi lekemãlo, oco a linge ocipango ca Yehova. (Tanga Va Heveru 11:24-27.) Epindiso Mose a tambula tete, kuenda ekolelo a lekisile ku Yehova, lio kuatisa oku tiamisila utima waye kovina vio kilu.

¹² Ndaño okuti Mose wa tambuile epindiso lia velapo lio ko Egito, pole ka ecelele oku kuata unene, ekemãlo, ale oku kala ohuasi kofeka yaco. Embimbiliya li popia hati: “[Mose] ka tavele oku tukuiwa [hati,] omõla womõla a Fareo ukãi. Wa nõlapo oku tala ohali kumue lomanu va Suku, oku sanjukila asanju akandu, hao asanju a pua pua, hacoko.” Noke, ukũlĩhĩso Mose a tambula ku Yehova, wo kuatisa oku songuila afendeli Vaye.

13, 14. (a) Osimbu Mose ka yovuile afendeli va Yehova, nye a sukilile oku lilongisa? (b) Nye tu sukilavo oku lilongisa?

¹³ Mose wa solele Yehova lafendeli vaye va kala apika kofeka Yegito kotembo yaco. Eci Mose a tẽlisa 40 kanyamo, wa kuatele ovisimĩlo vioku tila vofeka yaco. (Ovilinga 7:23-25) Pole, Yehova wa kũlĩhĩle okuti, ka ya pitĩlilepo otembo oco Mose a ci linge. Eye wa sukilile oku lilongisa oku kuata umbombe,  epandi, kuenda esuluviko. (Olosapo 15:33) Mose wa sukilile epindiso liu kuatisa oku tetulula ovitangi a laikele oku liyaka lavio. Ci soka 40 kanyamo Mose a kala ungombo, co kuatisa oku lekisa ovituwa via tukuiwa ndeti.

¹⁴ Anga hẽ epindiso Mose a tambula lio kuatisa? Mose wa kuatisiwa, ndomo Embimbiliya li ci popia okuti, wa kala ‘ulume umue womboka calua okuti, omanu vosi vo kilu lieve va sule.’ (Atendelo 12:3) Omo okuti Mose wa lilongisa oku kala embombe, wa tẽla oku lekisa epandi poku tetulula ovitangi viomanu va litepa. (Etundilo 18:26) Tu sukilavo oku lekisa ovituwa vi ka tu kuatisa oku puluka ‘kohali ya piãla,’ oco tu iñile voluali luokaliye lua Suku. (Esituluilo 7:14) Tua siata hẽ oku kala ciwa lomanu vosi oku kongelamo vana okuti, va tema lonjanga, ale va sumua? Olondaka viupostolo Petulu vi pondola oku tu kuatisa. Eye wa popia hati: “Sumbili omanu vosi. Soli [vamanji vosi].”—1 Petulu 2:17.

15, 16. (a) Momo lie tu sukilila oku tiamisila ovitima vietu kovina via sunguluka? (b) Momo lie Akristão vocili va sukilila oku amamako oku lekisa ovituwa viwa?

¹⁵ Tu kasi ‘kotembo yohali.’ (2 Timoteo 3:1) Eli olio esunga lieci tu sukilila oku tiamisila ovitima vietu kovina via sunguluka, oco tu pamise ukamba wetu la Suku. (1 Va Tesalonike 5:6-9) Tu konomuisi ovina vitatu vi tu kuatisa oku ci linga.

¹⁶ Ovituwa vietu: Petulu wa lombolola okuti, oku kuata ovituwa viwa, ci kuete esilivilo, eci a popia hati: “Kali lovituwa via sunguluka pokati ka vakualofeka.” Noke, wa popiavo hati, omanu vana ka va kũlĩhĩle Yehova, pamue va pondola oku limbuka ovilinga vietu, kuenje ci va vetiya ‘oku eca esivayo Kokuaye.’ (1 Petulu 2:12) Tu sukila oku likolisilako oku linga ovina vi eca esivayo ku Yehova lekuatiso liovituwa vietu viwa, ci kale okuti, tu kasi konjo, kupange woku sanda eteku, kosikola, kolomapalo, ale kupange woku kunda. Omo okuti vosi yetu ka tua lipuile, tua siata oku lueya. (Va Roma 3:23) Pole, ka tu ka pui epandi. Lekuatiso lia Yehova, tu pondola oku “yaka uyaki uwa wekolelo.”—1 Timoteo 6:12.

17. Tu pondola oku kuama ndati ocituwa Yesu a lekisa? (Tala elitalatu kefetikilo liocipama cilo.)

¹⁷ Ovisimĩlo vietu: Oco tu amameko lovituwa viwa, tu sukila oku lekisa esunguluko. Upostolo Paulu wa popia hati: “Upi ongangu ku Kristu Yesu. Kali lutima ndowu eye a kala lawo.” (Va Filipoi 2:5) Ocituwa cipi Yesu a kuatele? Eye wa lekisile umbombe, kuenje ocituwa caco co kuatisa oku pitisa kovaso upange wa Yehova. Utima waye wa u tiamisilile lika koku kunda olondaka viwa Viusoma wa Suku. (Marko 1:38; 13:10) Yesu wa velisilepo Ondaka ya Suku okuti oyo yo songuila. (Yoano 7:16; 8:28) Eye wa konomuisa lutate Ovisonehua vi Kola oco a vi tukule poku longisa omanu, oku vi teyuila, kuenda oku vi lombolola. Nda tua kuata ovisimĩlo ndevi via Kristu, tu kalavo ambombe, vakuambili kupange woku kunda, kuenda oku lilongisa Embimbiliya oloneke viosi.

18. Tu pondola oku kuatisa ndati kupange wa Yehova?

¹⁸ Ekuatiso lietu: Ocipango ca Suku ceci okuti, ‘vosi va kasi kilu, lava va kasi posi,’ va pokola ku Yesu. (Va Filipoi 2:9-11) Ndaño okuti Yesu wa kala pomangu yimue ya kemãla, pole, wa lekisa umbombe ku Isiaye. Tu pondolavo oku kuama ongangu yaye. (1 Va Korindo 15:28) Tua siata oku panga onepa kupange wa Yehova eci tu ‘longisa omanu vo kolofeka viosi oco va linge olondonge.’ (Mateo 28:19) Tu ‘lingavo eci ciwa komanu vosi,’ eci tu lingila ovina viwa vana tu lisungue lavo, kuenda vamanjetu.—Va Galatia 6:10.

19. Nye tua nõlapo okuti, oco tu sukila oku linga?

¹⁹ Tu eca olopandu ku Yehova omo lioku tu vetiya oco tu tiamisile ovitima vietu kovina vio kilu! Tu “lupuki lepandi,” kuenda tu tiamisili ovitima vietu kovina via sunguluka. (Va Heveru 12:1) Omo liaco, tu amamiko oku linga upange ‘lutima wosi ndava va vumba Yehova,’ momo tua kũlĩha okuti, Isietu wo kilu o ka tu ĩha asumũlũho ka a pui.—Va Kolosai 3:23, 24.