MANJI Guy Hollis Pierce wa pangele onepa Kocimunga Cosungu Yolombangi Via Yehova, wa fa Vovali keteke 18 kosãi Yelombo yunyamo wo 2014 eci a tẽlisa 79 kanyamo. Omo okuti o panga onepa ku vamanji ya Kristu, wa pinduiwa, kuenje wa tambula onima yaye kilu.—Va Heveru 2:10-12; 1 Petulu 3:18.

Manji Guy Pierce wa citiwa keteke 6 kosãi ya Kuvala yunyamo wo 1934 ko Estados Unidos vimbo lio Auburn, volupale luo Kalifornia, kuenda wa papatisiwa kunyamo wo 1955. Noke, wa tokekisa olohuela la manji Penny, kunyamo wo 1977, kuenda va kuata omãla. Eye wa kalavo ndonjali ya vamanji vakuavo. Kunyamo wo 1982 eye kumue lukãi waye va fetikila kumosi upange wakundi votembo yosi. Oku upisa kunyamo wo 1986 va kala kupange woku nyula akongelo kofeka yo Estados Unidos vokuenda kueci ci soka 11 kanyamo.

Manji Guy kumue lukãi waye va fetika oku talavaya ko Betele yo Estados Unidos kunyamo wo 1997. Eye wa talavaya Voseketa Yupange, kuenje kunyamo wo 1998 wa nõliwa oco a kuatise Osungu Yolombangi Via Yehova kupange Wocisoko ci Tata Vana va Litumbika Kupange Ulikasi. Keteke 2 kosãi ya Mbalavipembe yunyamo wo 1999 kohongele ya siata oku lingiwa onjanja yimosi vunyamo kua lingiwa esapulo liokuti, wa nõliwa oco a pange onepa Kosungu Yolombangi Via Yehova. Vanyamo a sulako wa talavaya lovisoko vialua ndeci: Ocisoko ci Tata Vana va Litumbika Kupange Ulikasi, Ocisoko Casonehi, Ocisoko Coku Sandeka Alivulu, kuenda Ocisoko Colomitavaso.

Manji Pierce wa lianjele lomanu vosi, kuenda wa sanjukile lavo. Vamanji vakuapata a litepa va enda oku kuata ukamba laye. Omo okuti wa kala ukuacisola, wa lekisa umbombe, esumbilo kolonumbi via Yehova, kuenda ekolelo kokuaye. Ovina viaco via enda oku vetiya omanu oku kuata ukamba laye. Olonjanja vimue vombangulo yaye wa enda oku popia hati ca velapo okuti ekumbi ka li tundi, pole olohuminyo via Yehova vi tẽlisiwa. Eye wa yonguile okuti omanu vosi va kũlĩha ovina viaco.

Manji Pierce wa talavaya calua kupange wa Yehova, momo olonjanja vimue wa enda oku fetika upange waye komẽle toke kuteke. Eye wa linga ovongende kolonepa vialua violuali oku vetiya vamanji, pole, nda manji umue o yongola oku sapela laye wa enda oku sokiya otembo yoku u kuatisa, ale oku eca elungulo kokuaye. Ndaño okuti pa pitile otembo yalua tunde eci a linga ovina viaco, pole, vamanji va ivaluka ndomo a enda oku va yekisa konjo yaye, ukamba a kuata lavo, kuenda ndomo a pamisa ekolelo liavo Lovisonehua.

Ukãi waye kumue lomãla vavo epandu, onekulu yavo kuenda oneka oku kongelamo vamanji vana a longisa Embimbiliya, vosi yavo va ko kuatela ongeva. Manji Mark Sanderson okuti o panga onepa Kosungu Yolombangi Via Yehova, wa linga ohundo yonambi ya manji Pierce ko Betele yo Brooklyn, vo Casapalo keteke 22 kosãi Yelombo yunyamo wo 2014. Eye wa lombolola eci catiamẽla kelavoko lioku ka kala kilu manji Pierce a kuatele, kuenje wa tanga olondaka via Yesu wa popia hati: “Vimbo lia Tate muli olonjo via lua. . . . Eci ngenda oku vu angiliyila ocitumãlo, njiya vali, ndu vu wupilili okuti oku ñasi, haiko vukalavo. Oku ngenda wiko, lonjila yaco vu yi.”—Yoano 14:2-4.

Tu ka kuata ongeva yalua la manji Pierce. Pole, tua sanjuka calua omo wa ‘kũlĩhĩle onjila yocitumãlo a laikele oku kala otembo ka yi pui.’