1, 2. Yesu wa pamisa ndati olondonge viaye keteke a pinduiwa?

OLONDONGE vivali via Yesu via kala oku enda kimbo limue lia kala ocinãla ci soka 11 kolokilometulu lolupale luo Yerusalãi. Ovio via sumuile calua omo lia Yesu wa fa, kuenda ka via kũlĩhĩle okuti wa pinduka. Vocipikipiki Yesu wa moleha pokati kavo, kuenje wa fetika oku endela kumue lavo. Noke wa fetika oku “va lomboluila ovisonehua viosi viatiamẽla kokuaye, [wa] fetika levi via Mose kuenda evi viovaprofeto vosi.” (Luka 24:13-15, 27) Olondonge via pamisiwa kuenda via kuata esanju, momo ‘ovitima viavo via situluiwa,’ ale Yesu wa va “situluila ovisonehua.”—Luka 24:32.

² Veteke liaco koñolosi olondonge viaco vivali via tiukila ko Yerusalãi. Eci via sanga ovapostolo vakuavo via lombolola ovina va pita lavio. Osimbu ovapostolo va kala oku sapela, Yesu wa molẽha pokati kavo. Noke va kuata usumba, kuenje va fetika oku kuata atatahãi nda omunu waco wa molẽha kokuavo eye muẽle Yesu. Embimbiliya li lombolola ndomo a pamisa ekolelo liavo poku popia hati: “Wa situlula ovitima viavo okuti va limbuka Ovisonehua.”—Luka 24:45.

3. Momo lie pamue tua siatela oku sumua kupange wa Yehova, pole tu pondola oku kuata ndati esanju?

 ³ Olonjanja vimue tua siata oku sumua calua ndeci ca pita lolondonge via tukuiwa. Ndaño okuti tua litumbika koku linga upange wa Yehova, pamue tu sumua nda omanu ka va lekisa onjongole kesapulo tu va kundila. (1 Va Korindo 15:58) Citava okuti tu sumuavo nda omanu tu longisa Embimbiliya ka va yongola oku kula konepa yespiritu. Vamue pokati kavo pamue ka va tava oku lilongisa ovina viatiamẽla ku Yehova. Tu pondola oku amamako ndati lesanju lietu kupange woku kunda? Oku kuata elomboloko lia suapo liatiamẽla kalusapo a Yesu, oco ci pondola oku tu kuatisa oku amamako lesanju. Cilo tu konomuisi alusapo atatu a Yesu oco tu limbuke eci tu pondola oku lilongisa valusapo aco.

4. Olusapo lua Yesu luatiamẽla kukuakuimba ombuto o pekela lu lomboloka nye?

⁴ Tanga Marko 4:26-29. Olusapo lua Yesu luatiamẽla kukuakuimba ombuto o pekela lu lomboloka nye? Ukuakuimba ombuto o lomboloka akundi Vusoma, ombuto yi lomboloka esapulo va siata oku kundila omanu vakuavitima via sunguluka. Ukuakuimba ombuto o linga ovina omanu vakuavo va siata oku linga okuti, ‘o pekela kuteke kuenje o pasuka kutanya.’ Oku kula kuombuto ku pita otembo yimue oku upisa keteke yi kũliwa toke kotembo yoku ungula. Vokuenda kuotembo yaco ‘ombuto yi tunda, kuenda yi fetika oku kula.’ Pole ‘yi kula oyo muẽle levando’ vapuluvi a litepa. Cimuamue haico ci pita lomunu okuti oco a fetike oku kula konepa yespiritu, ale oku kuata ukamba la Yehova pa pita otembo yimue. Eci a nõlapo oku amamako oku vumba Yehova, o litumbika kokuaye kuenje ‘eca apako awa,’ poku papatisiwa.

5. Momo lie Yesu a tukuila olusapo luatiamẽla kukuakuimba ombuto o pekela?

⁵ Momo lie Yesu a tukuila olusapo olu? Eye o yongola oco tu kuate elomboloko liokuti Yehova eye wa siata oku ecelela okuti ocili ci kulila ‘vovitima viomanu va sunguluka.’ (Ovilinga 13:48; 1 Va Korindo 3:7) Etu tu kũla kuenda tu tapela, pole ka tu kuete epondolo lioku kisika oku kula kuaco. Ndeci ca pita lulume wa tukuiwa volusapo, ka tua kũlĩhĩle ndomo oku kula kuaco ku pita. Osimbu tu amamako oku linga ovopange etu eteke leteke, pamue ka tu limbuka ndomo ombuto Yusoma yi kulila vomunu umue. Vokuenda kuotembo ondonge yaco yokaliye yeca apako, kuenje yi  talavayela kumosi letu kupange woku ungula.—Yoano 4:36-38.

6. Nye tu sukila oku ivaluka catiamẽla koku kula kuomunu tu longisa Embimbiliya?

⁶ Olusapo olu lu tu longisa nye? Catete, tu sukila oku ivaluka okuti, ka tu tẽla oku lavulula ndomo omunu tu longisa Embimbiliya a pondola oku kula lonjanga vocili. Ndaño okuti tu pondola oku likolisilako loku kuatisa omunu tu longisa Embimbiliya, pole, tu sukila oku yuvula oku u kisika oco a papatisiwe. Omo liaco, tu sukila oku ivaluka okuti, ondonge oyo lika yi kuete omoko yoku nõla nda yi yongola oku tumbika omuenyo waye ku Yehova Suku ale sio. Momo o tava lika elitumbiko lietu nda tu u kuetele ocisola.—Osamo 51:12; 54:6; 110:3.

7, 8. (a) Ocina cipi cikuavo tu lilongisa volusapo lua Yesu luatiamẽla kukuakuimba ombuto o pekela? Lombolola ulandu umue. (b) Olusapo luaco lu tu longisa nye catiamẽla ku Yehova kuenda ku Yesu?

⁷ Cavali, oku kuata elomboloko lieci tu lilongisa volusapo lua tukuiwa ndeti, ci tu kuatisa oku yuvula esumuo nda tua limbuka okuti ka tu kasi oku kuata onima kupange woku longisa omanu. Pole, tu sukila oku kala vakuepandi. (Tiago 5:7, 8) Nda tu likolisilako oku kuatisa omunu tu longisa Embimbiliya pole tu limbuka okuti ocili ka ci kasi oku kulila vutima waye, ka ci lomboloka okuti ka tu tẽla oku longisa ciwa. Yehova ecelela okuti ombuto yocili yi kulila lika vutima womunu o lekisa umbombe haeye o kuete onjongole yoku linga apongoloko. (Mateo 13:23) Ka tu ka simi okuti upange woku kunda wenda lika ciwa eci tu limbuka etendelo liomanu va kasi oku papatisiwa. Momo ku Yehova ocina ca velapo hanimako yupange woku kunda kuenda ndomo omanu va tava kovina tu va longisa. Pole, eci ca velapo kokuaye alikolisilo etu tua siata oku lekisa kupange woku kunda.—Tanga Luka 10:17-20; 1 Va Korindo 3:8.

⁸ Catatu, ka tu pondola oku limbuka apongoloko omunu a pondola oku linga vutima waye. Ulume umue lukãi waye va kala oku lilongisa Embimbiliya la manji umue omisionaliu va yonguile oku kala akundi. Noke manji yaco wa va ivaluisa hati, tete va sukila oku liwekapo oku sipa. Pole, manji wa komõha eci olohueli viaco vio sapuila okuti pa pita ale olosãi vialua tunde eci via liwekapo oku sipa. Momo via limbuka okuti, nda via amamako oku sipila vuyombeki Yehova o pondola oku va mola, kuenda o nyale ombambe. Omo liaco, va nõlapo onjila yokuti, va sipila kovaso yomisionaliu, ale va liwekapo oku sipa. Ndaño okuti manji yaco ka limbukile apongoloko olohueli viaco via linga, pole, ocisola va kuetele Yehova ca va kuatisa oku nõla onjila ya sunguluka.

9. Olusapo luowanda lu lomboloka nye?

⁹ Tanga Mateo 13:47-50. Olusapo lua Yesu luatiamẽla kowanda lu lomboloka nye? Yesu wa popia hati oku kundiwa kuesapulo Liusoma ku sokisiwa loku  imba owanda vokalunga. Ndeci owanda u pondola oku kuata ‘olõsi vialua via litepa,’ upange wetu woku kunda wa siata oku vetiya omanu valua va litepa. (Isaya 60:5) Ulandu waco tu u limbukila komanu valua va siata oku enda kolohongele viofeka kuenda Kocipito Conjivaluko anyamo osi. Vamue pokati komanu vaco va sokisiwa ‘lolõsi viwa’ kuenje va panga onepa vekongelo Liakristão vocili. Omanu vakuavo va sokisiwa lolõsi “kaviwako,” kuenje ka va taviwa la Yehova.

10. Momo lie Yesu a tukuila olusapo luatiamẽla kowanda?

¹⁰ Momo lie Yesu a tukuila olusapo olu? Oku tepiwa kuolõsi via tukuiwa volusapo, ka ku tiamisiwila kesombiso lia sulako li ka lingiwa vokuenda kuohali ya piãla. Pole, ku lomboloka ovina vi pita vokuenda kuoloneke via sulako violuali lulo. Yesu wa lekisa okuti vamue pokati komanu va sole esapulo Liusoma, ka va ka lekisa onjongole yoku linga afendeli va Yehova. Omanu valua va siata oku endaenda kolohongele vietu, ale vana tu longisa Embimbiliya ka va yongola oku tumbika omuenyo wavo ku Yehova. (1 Olosoma 18:21) Vamue pokati kavo va liwekapo oku endaenda kolohongele. Ndaño okuti amalẽhe vamue olonjali viavo Olombangi Via Yehova, pole, ka va lilongisile ovo muẽle oku sola Yehova. Yesu wa popia hati, omunu lomunu pokati ketu o sukila oku nõla onjila a yongola oku kuama. Nda tua nõlapo onjila ya sunguluka, Yehova o ka tu tenda “ndovina via velapo.”—Hagai 2:7.

11, 12. (a) Tu kuatisiwa ndati lolusapo luatiamẽla kowanda? (b) Olusapo olu lu tu longisa nye catiamẽla ku Yehova kuenda ku Yesu?

¹¹ Tu kuatisiwa ndati lolusapo luatiamẽla kowanda? Oku kuata elomboloko lieci tu lilongisa kolusapo lua tukuiwa ndeti, ci tu kuatisa oku yuvula esumuo nda omunu umue tu longisa Embimbiliya ale omõla wetu ka yongola oku vumba Yehova. Momo pamue tua likolisilako calua loku u pindisa. Omunu ka lingi ekamba lia Yehova ocipikipiki omo lioku tava oku lilongisa Embimbiliya, ale omo lioku kulila vocisoko ca Yehova. Nda ka yongola oku pokola ku Yehova ka pondola oku kala ufendeli waye.

¹² Anga hẽ eci ci lomboloka okuti omanu vana va tunda vocisoko ca Yehova lalimue eteke va ka taviwa vali oco va tiuke vekongelo? Ci lomboloka hẽ okuti omanu vana ka va litumbikile handi ku  Yehova ka va kuete elavoko lioku ci linga? Sio, momo handi va kuete epuluvi lioku linga akamba va Yehova osimbu ohali ya piãla ka ya fetikile. Yehova o kasi oku va vilikiya hati: “Tiuki kokuange, kuenje ame niukila kokuene.” (Malakiya 3:7) Ulandu owu u tiamisiwila kolusapo lua Yesu luatiamẽla komõla ocisandui.—Tanga Luka 15:11-32.

¹³ Olusapo lua Yesu luatiamẽla komõla ocisandui lu lomboloka nye? Isia ukuahenda wa tukuiwa volusapo, o lomboloka Yehova Isietu ukuacisola wo kilu. Omõla o pesila ukuasi waye kovina ka vi kuete esilivilo, o lomboloka omanu vana va tunda vekongelo Liakristão vocili. Ovo va panga onepa koluali lua Satana lu sokisiwa ‘lofeka yimue yi kasi ocipãla’ la Yehova. (Va Efeso 4:18; Va Kolosai 1:21) Noke, vamue pokati komanu vaco va limbuka okuti va linga ocina cimue ka ca sungulukile, kuenje va nõlapo oku tiuka vocisoko ca Yehova. Oco va ci linge va sukila oku likolisilako oku lekisa umbombe loku likekembela kovina vĩvi va linga, oco Yehova a va ecele, kuenje o va tambula vali.—Isaya 44:22; 1 Petulu 2:25.

14. Momo lie Yesu a tukuila olusapo luatiamẽla komõla ocisandui?

¹⁴ Momo lie Yesu a tukuila olusapo olu? Yesu wa lekisa okuti, Yehova o yongola okuti vana vo yanduluka va tiukila vocisoko caye. Isia wa tukuiwa volusapo ka puile elavoko liokuti omõla waye ka pondola oku tiuka. Eci a limbuka okuti omõla waye wa kala ‘ocipãla’ o kasi oku iya, wa lupukila kokuaye oco o yolele. Isia wa yonguile okuti omõla waye o limbuka okuti o taviwa vali konjo. Olusapo olu lu vetiya vana va siapo ocili oco va tiuke vali ku Yehova. Ndaño pamue ukamba wavo la Yehova wa tepuluka kuenda va kuete osõi okuti ci va tateka oku tiuka, va sukila oku likolisilako! Eci va tiuka, Yehova la  Yesu kumue lovangelo va kuata esanju lialua.—Luka 15:7.

15, 16. (a) Nye tu pondola oku lilongisa kolusapo lua Yesu luatiamẽla komõla ocisandui? Tukula ovolandu amue. (b) Olusapo luaco lu tu longisa nye catiamẽla ku Yehova kuenda ku Yesu?

¹⁵ Tu kuatisiwa ndati lolusapo luatiamẽla komõla ocisandui? Tu sukila oku kuama ongangu ya Yehova yoku lekisa ocisola. Nda omunu umue wa tundile vekongelo wa tiuka, tu sukila oku yuvula oku litenda ‘ndavakuesunga lialua’ okuti ka tu u tambula lesanju. Nda tua ci linga, ci kapa kohele ukamba wetu la Yehova. (Ukundi 7:16) Ulandu wa tukuiwa ndeti u tu longisavo okuti, tu sukila oku tenda omunu wa tunda vekongelo ‘ndomeme ya nyelẽla’ okuti pamue o pondola oku tiuka. (Osamo 119:176) Nda tua sanga omunu umue wa tunda vekongelo anga hẽ tu sanda onjila yoku u kuatisa oco a tiuke? Tu sukila hẽ oku sapuilako lonjanga akulu vekongelo oco a kuatisiwe? Nda tu kuete elomboloko liolusapo lua Yesu kuenda tu kapako eci ulandu waco u tu longisa, tu ci linga.

¹⁶ Omanu vana va tiuka vocisoko ca Yehova va eca olopandu kokuaye omo liohenda yaye, ocisola caye, kuenda ekuatiso va tambula vekongelo. Manji umue ulume wa tundisiwile vokuenda kueci ci soka 25 kanyamo wa popia hati: “Tunde eci nda tambuiwa vali vocisoko ca Yehova esanju liange lia siata oku livokiya calua osimbu nda amamako oku tambula ‘ekavuluko’ li tunda ku Yehova.” (Ovilinga 3:19) Vamanji vosi vekongelo va ndi kuatisa, kuenda va lekisa ocisola kokuange! Cilo ndi kuete epata limue liwa vekongelo.” Manji umue ukãi wa tiuka vekongelo noke lianyamo atãlo wa popia hati: “Si tẽla oku ku lomboluila esanju nda kuata poku limbuka ocisola Yesu a tukula ndomo ca kala oku tẽlisiwa kokuange. Oku kala vocisoko ca Yehova oco ocina ca velapo!”

17, 18. (a) Nye tua lilongisa valusapo atatu a tukuiwa ndeti? (b) Nye tua nõlapo oku linga?

¹⁷ Nye tua lilongisa kalusapo atatu a tukuiwa ndeti? Catete, tu sukila oku ivaluka okuti, ka tu tẽla oku lavulula ndomo omunu tu longisa Embimbiliya a pondola oku kula vocili. Pole, Yehova eye o ci linga. Cavali, ka tu ka lavoki okuti omanu vosi va siata oku endaenda kolohongele kuenda vana tu longisa Embimbiliya va ka yongola oku fendela Yehova. Catatu, ndaño omanu vamue va siata oku tunda vekongelo, pole ka tu ka pui elavoko liokuti ka va pondola oku tiuka. Nda va tiuka tu sukila oku va yolela lonjila yimue yi situlula ocisola ca Yehova.

¹⁸ Omo liaco, omunu lomunu pokati ketu o sukila oku amamako oku sandiliya ukũlĩhĩso, elomboloko, kuenda uloño. Osimbu wamamako oku lilongisa alusapo a Yesu o sukila oku lipula ndoco: ‘Olusapo olu lu lomboloka nye? Momo lie lua sonehiwila Vembimbiliya? Tu pondola oku kapako ndati ovolandu aco? Nye nda lilongisa kovolandu aco catiamẽla ku Yehova kuenda ku Yesu?’ Nda tu linga ovina viaco tu lekisa okuti tu kasi oku kuata elomboloko liolondaka via Yesu.