Olombangi Via Yehova via kapako calua vamanjavo vekolelo. (1 Petulu 2:17) Valua pokati ketu tua siata oku liyeva ndeci manji Tannis wo ko Kenia. Eye hati: “Ndi sole oku kũlĩha ovina vi kasi oku li pita la vamanjange ndi sole calua voluali luosi.” Manji Tannis kuenda Olombangi vialua Via Yehova via siata oku ci linga ndati oco va kũlĩhe asapulo aco? Tunde kunyamo 2013, tua siata oku ci linga pocakati conumbi yetu ponepa Asapulo vo jw.org.

 Onepa Yasapulo yi lekisa asapulo a suapo atiamẽla Kolombangi Via Yehova volosapi ndeci, oku sandekiwa Kuambimbiliya, upange woku kuatisa vana va pita lovilunga, ovopange oku tunga kuenda ovolandu akuavo a kuete esilivilo. Yi tu sapuilavo catiamẽla ku vamanjetu va kasi volokayike omo liekolelo liavo. Ponepa Yasapulo, tu sangapovo ovolandu a pamisa, atiamẽla kupange ulikasi woku kunda kuenda ocipito Conjivaluko. Helie wa siata oku konomuisa ovipama viaco kuenda vi pongiyiwa ndati?

 Onepa Yasapulo yi songuiwa Loseketa Yeca Asapulo Kowiñi (OPI). Oseketa yaco, yi sangiwa kombala Yolombangi Via Yehova kuenda yi songuiwa Locimunga Casongui Cosungu Yolombangi Via Yehova. O (OPI) yi kuete eci ci pitahãla 100 ya vamanji okuti valua pokati kavo, vamanji va talavayela kolonjo viavo loku lieca olumue oku kongelamo asonehi, vakuakukonomuisa, vakuakupanga oviluvialuvia kuenda vakuakupongoluila kalimi. Vakuavo va nõliwa oco va sapele lolonalavayi violombiali, alongisi kuenda vakuavingungu viasapulo. Oseketa yo OPI yi kuatisiwa leci ci pitahãla 80 kolotando vi eca olonumbi kowiñi (PID) kolo Betele viosi voluali.

 Oco ku pongiyiwe esapulo liokaliye, o OPI yi talavayela kumue lo PIDs. Vamanji nda va limbuka okuti ulandu umue u kuete esilivilo, ovo va konomuisa osapi yaco kuenje vongolola asapulo a koleliwa. Vupange waco mua kongela oku linga apulilo kuenda oku sapela la vana va kũlĩha ulandu waco. Noke ku kongeliwa ovovangi, ovipama viokaliye via sonehiwa, via sokiyiwa ciwa, via konomuisiwa, vi lekisiwa lalitalatu, kuenje vi tumisiwa Kocimunga Casongui oco va ci konomuise.

 Vamanjetu va li yevite ndati catiamẽla Konepa Yasapulo? Manji Cheryl wo Kolofilipina wa popia hati: “Ndi sole calua oku fetika eteke poku tanga asapulo atiamẽla kocisoko ca Yehova kuenda kafendeli vaye.”

 Valua vakuakutanga, va popia eci catiamẽla ketepiso li kasi pokati Konepa Yasapulo yo jw.org, lovingungu vikuavo viasapulo. Tatiana, wo ko Kazakistãu wa popia hati: “Ndi pandula omo nda kolela kasapulo o jw.org. Asapulo aco a koleliwa kuenda a teta onimbu.” Manji Alma wo ko Mexiku wa popia ndoco: “Nda oku sokisa asapulo a sakalaisa a siata oku eciwa vovingungu vikuavo, o Vonepa Yasapulo, a sanjuisa calua.”

 Onepa Yasapulo, ka ya koleliwile lika; oyo yi pamisavo ekolelo. Bernard wo ko Kenia wa popia hati: “Onepa Yasapulo ya siata oku ñuatisa oku tenda vamanji vo voluali luosi ndepata liange, ndaño va kasi kovitumãlo via litepa. Ndi tẽla oku kongela olonduko kuenda ovitangi viavo volohutililo viange.” Manji Bybron wo ko Kenia wa popiavo ndoco: “Olonjanja viosi ndi sanjuka eci ndi mola ocipama cimue coku sandekiwa Kuembimbiliya kelimi limue lia litepa! Ovipama viaco, vi ndi ivaluisa okuti, Yehova hokuacameko.”

 Ndaño muẽle asapulo atiamẽla ku vamanjetu va kasi oku lambalaliwa, a pondolavo oku tu pamisa. Jackline wo ko Kenia wa popia hati: “Oku sokolola kutõi wavo, ca siata oku pamisa ekolelo liange. Olonjanja viosi ndi sanda oku kũlĩha eci ca siata oku va kuatisa oku pandikisa. Nda siata oku lilongisa ovina omanu va tenda ndu okuti ‘ka vi kuete esilivilo’ ndeci, oku likutilila, oku tanga Embimbiliya loku imba ovisungo vina vi kuete esilivilo koku pamisa ekolelo lia vamanjetu.”

 Manji Beatriz wo ko Kosta Rika, o sole oku tanga onepa yasapulo yatiamẽla kovilunga. Eye hati: “Onepa yasapulo yi ngecelela oku tala ndomo ocisoko cetu ceca ekuatiso li sukiliwa lonjanga yalua ku vamanjetu lonjila ya suapo kuenda locisola. Eci ci ndi vetiya oku tava okuti, eci ocisoko ca Yehova.”

 Tu pandula calua omo lioku tambula asapulo okaliye atiamẽla kongongela ya vamanjetu voluali luosi! Nda kua ecele olombanjaile viove kupange u lingiwa voluali luosi okuti, vialua pokati kavio vi eciwa pocakati conumbi donate.pr418.com, nda ka ci tẽliwa. Tu pandula calua omo liolombanjaile viove vi eciwa lutima wosi.