Kunyamo 2020, koluali luosi kua lipita ovilunga vialua kuenda oco efengi lio COVID-19 lia fetika. Olombangi via Yehova via kuatisa ndati vana va lipita lovilunga viaco?

 Vokuenda kunyamo wupange wo 2020, a kua pesiwa eci ci pitahãla 28 kolohuluwa violondolale b oco ku kuatisiwe vana va li pita lovilunga, cina ca taviwa Locimunga Casongui Cosungu Yolombangi Via Yehova. Olombongo viaco via talavayiwa lavio oco ku kuatisiwe eci ci pitahãla 200 komanu va vetiwa lovilunga oku kongelamo efengi COVID-19, ofela yonupi, andunde ovava vo Afrika, ekambo liokulia ko Venezuela kuenda ocitenya ko Zimbabue. Olombanjaile via kuatisa oku angiliya okulia, ovava, olonjo, ovowalo, oku tatiwa lolondotolo, ovina vioku yelisa, oku semulula kuenda ovopange oku tumbulula. Tala ovolandu amue a lekisa ndomo ovopange aco a lingiwa.

 COVID-19. Voluali luosi efengi eli, lia vetavo vamanji cikaile ketimba, kovisimĩlo kuenda konepa yolombungo. Ci pitahãla 800 Kovimunga Vioku Eca Ekuatiso ku Vana va li Pita Lovilunga CAHs via sokiyiwa voluali luosi oco vi kuatise vamanji. Ovimunga viaco via enda oku kũlĩhĩsa ovitangi via vamanji kuenda lonjanga yalua va sapuilako Ocimunga Casongui kuenje va kuama ovolandu aco oco va nõle ndomo va eca ekuatiso ku vana va li pita lovilunga.

 Vokuenda kunyamo wosi, ovimunga viaco via kuatisa omanu valua oku kuata okulia, ovava, ovihemba, ovina vioku yelisa kuenda viutate. Kovitumãlo vimue, ovimunga viaco kumosi lakulu vekongelo vopocitumãlo, va kuatisa vamanji oku tambula ekuatiso kombiali.

 Omanu vana okuti Halombangiko Via Yehova va lombolola eci catiamẽla kupange wetu woku kuatisa vana va lipita lovilunga. Ndeci, Field Simwinga, okuti ndimini yocivanja co Nakonde, ko Zâmbia, wa sapuila vamanji ndoco: “Tu kuete ofuka yimue yolopandu kokuene. Ekuatiso ene wa eci kapata a suka lieya vepuluvi lia sunguluka.”

 Ekambo Lio Kulia Vongola. Efengi lio COVID-19 lia koka okuti olosila viokulia Vongola vi tepuluka kuenda ondando yi livokiya calua. Valua pokati ka vamanjetu, ka ca lelukile kokuavo oku landa okulia.

 O filiale yo Brasil ya lalekiwa oku kuatisa vamanji vo Vongola poku va tumisa okulia. Oco va talavaye ciwa lolombongo vioku kuatisa vana va lipita lovilunga, kua lingiwa akonomuiso alua atiamẽla kokulia ku sukiliwa kuenda olonjila vioku vi tumisa, kuenje kualandiwa okulia kualua. Oco ku landiwe loku tumisa epunda lepunda kua pesiwa lika 22 kolondolale, pole, epunda lepunda lia kuatele eci ci panda 20 kolokilograma viokulia ndeci oluoso, ocipoke kuenda ulela. Toke cilo, kua tumiwa ale eci ci soka 33.544 kapunda, vocosi citẽla 654 kolotonelada. Olombanjaile viaco, levi via landiwa pocitumãlo, via kuatisa koku tekula ci pitahãla 50 kolohukãi komanu!

 Ndamupi vamanjetu va liyeva poku tambula ekuatiso liaco? Alexandre okuti o kasi kocitumãlo cimue ci kasi ocipãla Vongola, wa popia hati: “Kokuange, uvangi wokuti Yehova o ndi sole kuenda si kasi ulika. Ñuete esilivilo kocisoko ca Yehova!” Mariza, okuti onjali yi tekula omãla likawaye hati: Yehova wa yelela olohutililo viange. Ngeca olopandu kokuaye kuenda kocisoko caye!”

 Ocitenya ko Zimbábue. Konyamo wupange 2020, ofeka yo Zimbábue ya kuatiwa locitenya cimue cakãla calua cina cakoka okuti olohuluwa vialua viomanu vi kamba okulia. Olohuluwa vialua Violombangi Via Yehova kofeka yaco ka va kuatele okulia kutẽla.

 Kua sokiyiwa ovimunga vitãlo Vieca Ekuatiso ku Vana va li Pita Lovilunga oco vi kuatise vamanji oku kuata okulia. Ovita vialua viakundi va lieca olumue koku longeka okulia, loku yukisa akãlo lovina via eciwa ndolombanjaile. c Vokuenda konyamo wupange 2020 kua pesiwa eci cisoka 691.561 kolondolale oco vi kuatise oku tekula eci ci pitahãla 22.700 komanu.

 Eci ekuatiso liaco lieya, vamanji ka vakuetele okulia kolonjo. Ovo va pandula Yehova eci va tambula ovikulia. Toke muẽle vamue va fetika oku imba ovisungo.

 Vimbo limue kua lingiwa ohongele yimue lolonungi viaco oco va vangule eci catiamẽla kokulia kua kala oku eciwa locisoko cimue combiali (NGO). Olombangi Vivali via Yehova ovimbumba va kala vimbo liaco, va enda kohongele yaco. Pole, ohongele yaco ya kala oku tiamisiwila vali kopulitika kuenje vamanji va limbuka okuti ka va ponduile oku linga ovina via kisikiwile kokuavo oco va tambule ekuatiso. Eci ovo va tunda kohongele yaco omanu va va sepula loku va sapuila hati: “Noke ku keyi kulo oku pinga okulia.” Pole, noke yolosemana vivali vamanjetu veya vimbo liaco kuenje va eca okulia ku vamanji vaco akãi osimbu ekuatiso lia liocisoko combiali (NGO) ka ceyile.

 Ekuatiso lia vana va lipita lovilunga lia eciwa ko Zimbábue lia ecavo uvangi uwa. Ndeci, kũlĩhĩsa eci ca lipita la Prisca okuti o kasi vimbo limue. Ndaño lovitangi via kokiwa locitenya, Prisca wa enda oku sokiya okuti votatu kuenda votãlo enda koku kunda ndaño vepuluvi lioku pongiya osi oco yi kulĩwe. Vana va lisungue laye va enda oku u sepula loku popia hati: “O ka koka okuti epata liove li fa lonjala omo lioku kunda.” Prisca wa va tambolola hoti: “Yehova lalimue eteke a yanduluka afendeli vaye.” Noke yokatembo kamue eye wa tambula okulia kuocisoko cetu. Vamue va lisungue laye va komõha kuenda vo sapuila hati: “Suku lalimue eteke a ku yandulukile, omo liaco tu yongola oku lilongisa vali catiamẽla kokuaye.” Cisoka epandu vali viava va lisungue va siata oku kuama olohongele viekongelo via siata oku pitiyiwa vo radio.

 Osimbu esulilo ka lieyile, tu kamamako oku liyaka lovilunga. (Mateo 24:3, 7) Tu pandula calua olombanjaile wa siati oku eca pocakati colonjila via sonehiwa ponumbi donate.pr418.com. Omo liocali cove, ci tẽliwa oku kuatisa vana va tala ohali vepuluvi lina ovo va sukila vali ekuatiso.