Anyamo osi, akundi votembo yosi va likasi voluali luosi va siata oku lalekiwa oco va pindisiwe kosikola yo Gileade yo Torre de Vigia, Kombala Yoku Pindisila Vamanji ko Patterson, ko Nova Yorke. a Kosikola yaco, olondonge vi pindisiwa oco vi tẽlise ovikele viavo vocisoko ca Yehova lonjila ya sunguluka. Epindiso liaco li va kuatisa oku pamisa akongele kuenda olo filiale voluali luosi.

 O Gileada osikola yimue yoluali luosi. Ndeci, ocisoko 147 ca pindisiwa kunyamo 2019, ca kuata 56 kolondonge via tunda kolofeka 29. Vamanji va lalekiwa ko Gileada va kasi ale oku talavaya kovopange a liyekaila wotembo yosi ulikasi; ndeci, vana va talavaya ko Betele, vanyula akongelo, olomisionario ale akundi va likasi.

 Oku li pongiyila o sikola ku fetika osimbu ka kua fetikile epindiso lia tate. Ndeci, Oseketa yi Sokiya Ovongende Kombala Yoluali Luosi yi landa ovicapa viopasasi yombalão via vana va lalikiwa kosikola. Catiamẽla kocisoko 147 yo Gileada, olombongo via pesiwa viokuenda loku tiuka viondonge londonge yi soka 1.075 kolondolale. Olondonge via tunda Ilhas Salomão via sukilile oku kuata olombalão vikuãla oco va pitĩle ko Patterson, noke va kuata vali olombalão vitatu oco va tuikile kolonjo viavo. Vo cosi ovo va linga ungende weci cisoka 35.400 kolokilometulu! Ondando yolombalão viaco yi panda 2.300 kolondolale ondonge londonge. Oco ku tetẽliwe olombongo Oseketa yi Sokiya Ovongende yi talavaya locipama cimue vokombutador oco vi sange olondando vi sulemo viopasasi. Ndaño ceci va soleka ale opasasi yimue, ocipama caco camamako oku sanda olosemana vialua kuenda olosãi oco ci kũlĩhĩse nda ondando yi tepuluka. Oseketa yi Sokiya Ovongende yi talavayavo lolo milhas kuenda olondimbukiso via eciwa ndolombanjaile oco ku landiwe opasasi.

 Olondonge vialua vi sukila ovicapa viuvangi vi va ecelela oku iñila ko Estados Unidos. Olio esunga lieci Oseketa Yoku Tetulula Ovitangi Viombonge Kombala Yoluali Luosi, yi kuatisa olondonge oku kuata ovicapa viaco. Voku citenda, ondando yi pesiwa kocicapa caco kuenda ondimbukiso yecelela omunu oku iñila loku tunda yi soka 510 kolondolale.

 Tu kuatisiwa ndati lepindiso olondonge vi tambula? Hendra Gunawan, okuti ukulu umue wekongelo o kasi Kombuelo yo Asia okuti wa tiamẽla kekongelo limue muli ohueli yimue ya pindisiwa kosikola yo Gileada wa popia hati: “Kosimbu ekongelo lietu ka lia kuatele ndaño ukundi umosi wotembo yosi. Pole, noke yohueli eyi oku pitĩla ko Gileada, vamanji va vetiyiwa lombili yavo kuenda vamue va linga akundi votembo yosi. Noke manji umue ukãi wovekongelo lietu wa pindisiwa Kosikola Yakundi Vusoma!”

 Sergio Panjaitan o talavaya ko Betele Kombuelo yo Asia la vamanji va pindisiwa ko Gileada. Eye wa popia hati: “Epindiso va tambula lia linga esumũlũho kokuavo kuenda kokuetu ovo va lilongisa ovina vialua! Pole, ovo ka va talavaya lepindiso va tambula oco va limuise, ovo va kuatisa vakuavo lovina va lilongisa. Eci ci tu pamisa kuenda ci pamisavo vakuetu.”

 Ovina vi sukiliwa kosikola yaco via siata oku fetiwa ndati? Pocakati colombanjaile vi eciwa oco vi kuatise kupange u lingiwa voluali luosi, okuti olonjanja vialua via siata oku eciwa lonumbi donate.pr418.com. Tu eca olopandu omo liolombanjaile wa siata oku eca locisola, okuti vi kuatisa oku amamako lolosikola viaco voluali luosi.