“Nda pita 19 kanyamo loku talamẽla.” Nye manji u kala oku lavoka otembo yalua? Epuluvi lioku kuata Epongoluilo Lio Luali Luokaliye Viovisonehua vio Helasi kelimi liaye lio bengali. Omanu valua va yeva esanju limuamue eci ku sandikiwa Epongoluilo Lio Luali Luokaliye kelimi liavo. Wa sokoluile ale upange wosi wa kongela ko ku pongoluiwa kuenda koku pangiwa Kuembimbiliya?

 Catete, ocimunga cimue coku pongolola cataviwa ci nõliwa Locimunga casonehi Yosungu Yolombangi Via Yehova. Otembo yiñami yambata oco ocimunga cimue ci pongolole Embimbiliya? Nicholas Ahladis, okuti o talavaya Koseketa Yupange Woku Pongolola ko Warwick, Nova York, wa lombolola ndoco: “Ovina vialua vi pondola oku kongelamo, ndeci, etendelo lia vamanji va pondola oku talavaya kupange waco, oku tĩla kuelaka, ndomo va kuakutanga va kũlĩha catiamẽla komuenyo wovolandu Embimbiliya kuenda nda elimi li pongoloka calua kocitumãlo locitumãlo. Vocosi, ocimanga cimue cambata anyamo atatu oco ci pongolole Ovisonehua vio Helasi. Oco ku pongoluiwe Embimbiliya liosi ci sukila anyamo akuãla. Upange waco u pondola oku cilua kelimi lioku ilaika.”

 Voku pongolola Embimbiliya ka mua kongelele lika oku sokiya ocimunga. Ku nõliwa ocimunga cimue ca vakuakutanga va liyekala vo kosamua, muna olonjanja vialua mua kongela omanu vokolofaka via litepa, oco ci kũlĩhĩse ulandu wa pongoluiwa. Ovo va linga upange waco ocali. Ovisimĩlo viavo vi kuatisa vakuakupongola oku pongolola Embimbiliya lia suapo, lilomboloka kuenda li vetiya utima. Eci ci kuete esilivilo ndomo ca lomboluiwa lamanji umue wa siata oku pindisa ovimunga vi pongolola Embimbiliya ko Afrika do Sul, eye hati: “Vakuakupongolola va kũlĩha okuti va kuete ocikele cinene kuenda va yongola oku linga upange wa velapo wa Yehova kuenda ku vana va tanga Ondaka yaye.”

 Noke yoku malusula oku pongolola, Ambimbiliya a sukila oku sokiyiwa oco a kale alivulu o peka. Oco ku pangiwe Embimbiliya limue, olomakina vioku panga vi sukila oku kuata ovimalẽho ekũi ndeci: o papelo, o tinda, ovimalẽho viokapa, atokekiso, ukolo wevala lio palata, ukolo wondimbukiso yocipama, onanga yovokati yo kapa, olofita vio ko losungu, evindikiyo lioñoño kuenda ocimalẽho cimue ci kuatisa oku tokeka amela lokapa. Kunyamo 2019, kupange woku panga Ambimbiliya, kua pesiwa eci ci pitahãla 20 kolohuluwa violondolare oco ku landiwe ovina viaco. Kunyamo umuamue ci pitahãla 300 kolowola via pesiwa kolomakina vietu oco kupangiwe loku tumisa Ambimbiliya.

 Momo lie kua pesiwila otembo lolombongo vialua kupange waco? Joel Blue, okuti o talavaya Koseketa Yoluali Luosi Yoku Panga Alivulu wa lombolola ndoco: “Pokati ka livulu osi tua linga, Embimbiliya olio lia velapo vali.” Kuenje tu yongola okuti emolẽho liayo lieca esivayo ku Suku tu fendela kuenda esumbilo kesapulo tu kunda.”

 Ka tu kuete lika Ambimbiliya Liepongoluilo Lio Luali Luokaliye viololetala via sokamo, kua sokiyiwavo Ambimbiliya atiamẽla komanu va kuete asukila a likasi. Ndeci, Epongoluilo Lio Luali Luokaliye kelimi liolomeke lia sandekiwa kalimi ekũi. Oku panga Embimbiliya liosi kelimi liolomeke ci pondola oku ambata olowola ecelãla. Olio li kuete amela lua kuenda vo cosi li pondola oku kuata olometulu 2 ale 3 vociseleko. Kulivo Embimbiliya limue lilikasi li talavayiwa lalio volokayike okuti ka va tava alivulu a kuete olokapa via kõla.

 Embimbiliya Epongoluilo Lio Luali Luokaliye lia siata oku vitiya calua ovimuenyo lia va kuakutanga. Ndeci, tala eci ca lipita vekongelo lielimi lio kiluba ko Tombe, ko Repúblika Demokrátika yo Kongo. O Tombe yi kasi ocinãla ci soka 1.700 kolokilometulu lombala yofeka. Vamanji vekongelo liaco va kuatele lika Embimbiliya limosi, lia kuatele upopi wosimbu. Embimbiliya liaco lia enda oku eciwa ku manji la manji oco va tẽle oku pongiya olonepa viavo. Pole, kosãi Yenyenye wo 2018 Epongoluilo Lio Luali Luokaliye lia malusuiwa liosi, lia sandekiwa kelimi lio kiluba kuenda akongelo osi va tambula Embimbiliya limue mu kuete upopi wo kaliye.

 Manji umue ukãi wa vangula eci catiamẽla Kepongoluilo Lio Luali Luokaliye mua lingiwa apongoloko kelimi lio Alemão ndoco: Si popi vali okuti ndi sukila oku tanga Embimbiliya. Cilo mopia siti: Si lete elivala lioku tangapo vali kamue! O mandekua yimue ya soneha hati: Nda tambula Epongoluilo Lio Luali Luokaliye kuenda olio li kasi oku pongolola omuenyo wange. Tunde eci nda fetika oku tanga Embimbiliya eli, ñasi oku kuata elomboloko Liondaka ya Suku okuti kosimbu ci sule. Njongola oku kũlĩha vali catiamẽla Kolombangi Via Yehova kuenda ndomo ndi kala umue watiamẽla kokuene.

 Omanu vosi vakuakutanga Epongoluilo Lio Luali Luokaliye va pandula calua omo liolombajaile vi kuatisa koku pangiwa Kuembimbiliya. Olombonjaile viaco vi kuatisa kupange woluali luosi, via siata oku eciwa pocakati colonjila via sonehiwa vonumbi yetu donate.pr418.com. tua pandula calua omo liocali cove.