Kosãi Yevambi Linene kuenda Yenyenye 2020, vamanji voluali luosi va ka tala ocipama cohongele yofeka vepuluvi limuamue. Eyi oyo onjanja yatete ci pita. Oco ci tẽliwe ocipama caco ca sukilile oku gãlavaliwa kueci ci pitahãla 500 kalimi. Handi vali, upange ndowu nda wambata unyamo umosi ale anyamo alua oco u sokiyiwe kuenda oku u linga. Pole, omo liekalo lia kokiwa lokoronaviru, vakuakupongolola va kuata lika ci panda ololosãi vikuãla oco va pongolole Ohongele Yofeka losapi hati : “Sanjuki Olonjanja Viosi”!

 Oseketa Yupange woku Pongolola kuenda Oseketa Yupange woku Landa Voluali Luosi vi kasi kombala yoluali luosi Yolombangi Via Yehova, via kuatisa kupange waco. Oseketa Yupange woku Pongolola ya limbuka okuti ovimunga vialua vioku pongolola via sukilile vali ovimãleho oco va tẽlise upange, ca piãla enene anguena awa. Oseketa Yupange woku Landa Voluali Luosi, ya sokiya oku landa eci cisoka 1000 yanguena loku vituma kueci cisoka 200 kovitumãlo.

 Oco ku tetẽliwe olombongo, kua landiwa anguena alua. A eciwa kocitumãlo cimue, noke a tumiwa kovitumalo vialua violuali. Onjila ya nõliwa yoku landa anguena alua ya kuatisa koku tetẽlela eci ci pitahãla 20 kolopurcento. Enguena limosi lia landiwa 170 kolondolale, oku kongelamo olombongo via pesiwa poku vi tumisa.

 Oseketa Yupange Woku Landa Voluali Luosi, ya sokiya oku landa loku tumisa ovimalẽho viaco vokuenda kuosãi ya Kupupu kuenda ya Kupemba yunyamo 2020. Vokuenda kuotembo yaco, valua va kualomilo ka vakuatele ovina vialua vioku landisa omo liefengi. Pole, ndaño ndoco, toke kesulilo liosãi ya Kupemba oloseketa vialua vioku pongolola levi vi sangiwa ko filiale kuenda kovitumãlo vikuavo vioku pongolola, via tambula ovimãleho vi sukiliwa.

 Jay Swinney, o songuila Oseketa Yupange Woku Landa Voluali Luosi wa popia hati: “Vokuenda kupange wosi owu, pa kala omunga yiwa pokati koloseketa vio Betele kuenda la va kualomilu vokosamua.” Tua tẽla lika oku linga upange waco lonjanga kuenda oku tetẽlela olombongo, lekuatiso lia Yehova.”

 Nicholas Ahladis, o talavaya Koseketa Yupange woku Pongolola wa lombolola ndoco: “Vakuakupongolola upange wavo wa tatekiwile omo liefengi, pole, va kuata esanju lialua poku tambula ovimalẽho.” Oku linga olohongele vioku pongolola pocakati colovideokoferencia ca kala ekuatiso linene. Ndomo manji Nicholas a ci popia, “ndaño okuti vakuakupongolola ka va kaile kumosi la vakuavo va panga onepa kocimunga coku pongolola, ovo va tẽla oku pongolola olohundo, olovideo kuenda ovisungo kueci cipitahãla 500 kalimi.”

 Upange owu umue pokati kovopange alua a lingiwa oco ku lekisiwe ohongele yofeka losapi hati “Sanjuki Olonjanja Viosi!” ku vamanji voluali luosi. Pocakati colombanjaile viove wa eca ponepa donate.pr418.com kuenda onjila yikuavo, kua tẽliwa oku landa ovimãleho vi sukiliwa oco ku tẽlisiwe upange waco.