Ko Amerika Latina, kuli olohuluwa viomanu. Pokati kolohuluwa viaco, pali omanu va vangula alimi avo muẽle kuenda va kuete oviholo viavo. Valua pokati kolonyitiwe viaco, vamanjetu kuenda va kapako calua oku tuwa kuavo. Oco va kuatise omanu oku kũlĩha ocili Cembimbiliya, ovo va pongolola loku sandeka alivulu Olombangi Via Yehova kueci ci pitahãla 130 kalimi a vanguiwa lolonyitiwe vio Amerika Latina. a Vamue pokati kavo, va siata oku liyaka lelambalalo omo lioku nõlapo oku vumba Yehova kuenda omo lioku likala oku panga onepa kovihilahila vio posongo va kasi okuti, ka vi sangiwa Vembimbiliya. Olombanjaile wa siata oku eca, vi talavayiwa lavio ndati oco vamanji vaco va kuatisiwe?

 Ko Mesiku, vamanjetu va Huichol va kasi kolomunda viocivanja co Jalisko, lesumbilo lialua va likala oku panga onepa kovihilahila vietavo vina ka vi likuata Lembimbiliya. b Pole, eci ca temisa vamue posongo. Keteke 4 lia Cembanima 2017, owiñi umue wa katukila lungangala ocimunga cimue Colombangi Via Yehova la vana va kala lavo. Owiñi waco, wa tundisa vamanji posongo, wa nyõla ovipako viavo kuenda wa lipañela oku ponda omunu wosi o seteka oku tiuka.

 Olombangi Via Yehova via kala valupale a kasi ocipepi, lonjanga yalua via eca ku vamanjetu ovina va sukilile. Pole, nye ca sukilile oku lingiwa oco ovo va tiukile kolonjo viavo? Manji umue o tukuiwa Agustín wa popia hati: “Ka tua kuatele olombongo vi tẽla oco tu pañinye onganji yimue kuenda ka tua kũlĩhĩle oku tu sandiliya olonumbi viovihandeleko violonganji.”

 Omo okuti elianjo lioku fendela lia vamanjetu lia kala oku tatekiwa, o filiale yo Amerika Central ya eca lonjanga yalua ekuatiso. Tete, o filiale ya pinga kolombiali viocivanja caco oco vi kũlĩhĩse ungangala waco. Noke o filiale yo Amerika Central, ya tambula onumbi Kocimunga Casongui Cosungu Yolombangi Via Yehova yoku talavayela kumosi Loseketa Yoku Tetulula Ovitangi Lombiali oku upisa kombala Yolombangi Via Yehova. Kuenje kua fetikiwa oku tetuluiwa ocitangi ca vamanjetu va Huichol. Noke ocitangi caco cambatiwa Kombonge ya Velapo Yofeka Yoku Teyuila Esunga okuti, oyo ombonge ya velapo ko Mesiku.

 Ocimunga cimue colonganji vio kolofeka via litepa, ca pongiya ulandu umue. Vulandu waco ovo va lombolola okuti, ndeci omanu vakuavo va sukila oku sumbila oviholo viomanu olonyitiwe, omanu vaco olonyitiwe va sukilavo oku sumbila loku teyuila elianjo liomanu vosi va kasi posongo yaco. Omanu vosi kuosi va kasi, va kuete elianjo limue.

 Keteke 8 Yevambi Linene 2020, Ombonge ya Velapo Yoku Teyuila Esunga, vosi va nõlapo oku kuatisa Olombangi Via Yehova. Ombonge ya handeleka okuti vosi vana va tundisiwile, va kuatele omoko yoku tiukila posongo yavo. Manji Agustín wa tukuiwa kefetikilo, wa situlula ndomo eye la vakuavo va eca olopandu poku popia hati: “Tua sanjuka calua kuenda tu pandula eci vamanji va tu lingila. Nda ka va tu kuatisile, nda ka tua lingile cimue.”

 Vamanjetu ko San Juan yo Ilumán, vimbo limue lio Ekuador okuti, valua pokati komanu vaco olonyitiwe Viocimbota co Otavalo, va liyakavo lelambalalo ndeli. Kunyamo 2014, noke yoku tambula ovicapa viosi via sukiliwile, va fetika oku tunga Onjango Yusoma. Pole, owiñi umue u pitahãla 100 komanu ca kala oku songuiwa locitunda cimue, va kisika vamanji oku liwekapo oku tunga. Noke omanu vo posongo yavo va handeleka Olombangi Via Yehova oco vi liwekepo oku linga olohongele.

 Oloseketa vioku tetulula ovitangi lombiali vio filiale yo Ekuador kuenda vio kombala Yolombangi Via Yehova, via talavayela kumosi oco vi teyuile elianjo lioku fendela liekongelo. Vamanjetu vambata ocitangi caco kombonge. Eci ca lingisa okuti, omanu vo posongo va liwekapo oku lambalala vamanjetu. Kuenje ekongelo lia fetika vali oku linga olohongele loku malusula oku tunga Onjango yavo Yusoma. Pole, oco ku teyuiwe elianjo lia vamanjetu kovaso yoloneke, olonumiwa vietu via pinga kolombonge via velapo oco vi nõlepo onjila yimue ya tiamẽla kepulilo li kuete esilivilo lialua liokuti: Anga hẽ omanu olonyitiwe vi sukila oku sumbila elianjo liomanu lia tumbikiwa lolofeka?

 Keteke 16 Yevambi Linene 2020, Ombonge yi Teyuila Ovihandeleko Viofeka ko Ekuador okuti, oyo ombonge ya velapo vofeka, ya yevelela ocitangi caco. Vamanji okuti olonganji ko Ekuador, va kala olonumiwa viekongelo. Handi vali, vamanji vakuãla vo kolofeka via litepa okuti, olonganji via loñoloha, va vangula kombonge. Omo liatateko o COVID-19 ovo va vanguila oku upisa kolofeka vialua pocakati covideo koferencia. Eyi oyo onjanja yatete ombonge yimue ya ecelela okuti, ocimunga cimue colonganji violonumiwa Violombangi Via Yehova voluali luosi, ci vangula lombonge lonjila eyi. c Ocimunga caco ca tukula olonganji vio kolofeka via litepa oco vi ece uvangi wokuti, omanu olonyitiwe ka vi ka pumbe elianjo liavo omo okuti, va panga onepa kolonyitiwe vimue.

 Vamanjetu Kocimbota co Otavalo, va lavoka onjila yi nõliwapo Lombonge yi Teyuila Ovihandeleko Viofeka. Handi vali, va sanjukila ekuatiso va siata oku tambula. Manji César okuti ukulu wekongelo kelimi lio Quichua ko Ilumán, wa popia hati: “Yehova pocakati cocisoko caye, eye lika o pondola oku lingila vialua komanu vatito.”

 Olonganji vina via kongeliwa vocitangi caco, vosi yavo Olombangi Via Yehova kuenda via sanjukila oku talavaya lukũlĩhĩso wavo wovihandeleko okuti ka via fetiwile lacimue. Ndaño ndoco, oku sokiya ovicapa vioku fetika oku teyuila ovitangi viaco, oku vi pongiya, loku vi vanguila kombonge, ci pesela otembo kuenda olombongo. Olonganji vietu kuenda vamanji vakuavo, va pesela eci ci pitahãla 380 kolowola poku pongiya olondaka va laikele oku vangula kombonge kuenda va peselavo 240 kolowola vikuavo poku pongoluila ovicapa viaco oco vi kuatise olonjeveleli ko Mesiku. Ci panda 40 kolonganji vio kolonepa vikuavo violuali, va pesela olowola vialua kocitangi co ko Ekuador. Tua tẽla ndati oku feta asukila atiamẽla koku teyuila vamanjetu? Ca lingiwa pocakati colombanjaile ove wa siata oku eca poku kuama olonjila via litepa vionumbi donate.pr418.com. Tua pandula omo liocituwa cove coku eca lutima wosi.